1 Samuele 23 - Bibilia Buk na Ŋun nagon koti luŋu a

Si ’da na Dawidi Keila ko i yöbu

¹ Nyena a se takiŋdye Dawidi adi, Mete, ŋutu ti Pelesete kulu gwe i mörö ko ŋutu ti köji na Keila, lepeŋat kulu gwe i ryaggu na piritön gwutesi ti ’b ’olot kase.

² Nyenagon a Dawidi muluŋdye ko MATAT adi, Nan ŋona bubulö tu i mörö ko kilu ŋutu ti Pelesete le? A MATAT kulyani ko Dawidi adi, Iti i mörö ko ŋutu ti Pelesete kulu, anyen lwökuŋdyö Keila.

³ Ama a ŋutu ti Dawidi kulo pije lepeŋ adi, Meddi, yigwon ko kujönö ni Yuda; a kirut mo gwe ada koyi a tu Keila i möro ko teŋon ti kamörök ti Pelesete?

⁴ A kirut Dawidi köti muluŋdye ko MATAT. A MATAT ruŋge lepeŋ adi, ŋine ŋien, ko lulurara kak Keila yu; kogwon nan mo puŋutukin ŋutu ti Pelesete konut i könisi.

⁵ A Dawidi ko ŋutu kanyit kulo lulurara kak Keila yu, a möröni ko ŋutu ti Pelesete, a joŋgi kisuk kase, a ŋinu gwe a torem duma kase kiden. Nyena Dawidi a lwökuŋdyö ŋutu ti Keila sona.

⁶ A ko gwe sona nagon Abyatar ŋuro lo Akimelek aje wökun ko Dawidi ni Keila nu, lepeŋ a po ko epoda kanyit i könin.

⁷ A kine kulya iŋge tuköki Saula adi, Dawidi a poŋdya Keila. A Saula kulyani adi, ŋun aje pakin lepeŋ köyö i könin; kogwon nye a kinuddu mugun lukata na lupöri nye i köji na gwon i mariŋ lukata nagon ko kötumitön ko rigilesi nu.

⁸ A Saula luŋgi ŋutu liŋ i mörö, anyen lulurara kak Keila i tumakiŋdya na Dawidi ko ŋutu kanyit.

⁹ A Dawidi iŋge timun adi Saula ga ’yu mwön ko nye; a lepeŋ takiŋdye koane Abyatar adi, Joŋdi epoda ni.

¹⁰ A kirut Dawidi kulyani adi, Pon MATAT ŋun lo Yisaraele, nan köliŋönit ilot aje yiŋga ’diri adi Saula ga ’yu poŋdya ni Keila i köŋu na köji kogwon kulya kwe.

¹¹ ŋutu ti Keila ŋona de wuwukin nan kanyit i könisi le? Saula ’diri de popo ni gwoso na yiŋge nan köliŋönit ilot na le? Nan mo ’yu do, pon MATAT ŋun lo Yisaraele, böŋö tuköki nan köliŋönit ilot. A kirut MATAT waddi adi, Saula de popo.

¹² A Dawidi pije adi, ŋutu ti Keila de wuwukin nan ko Saula i könin mora ko ŋutu kwe kulo le kode ’bayin? A MATAT nyobbi adi, lye, se de wuwukin do.

¹³ A kirut Dawidi se ko ŋutu kanyit kulo gwoso miajin buker, ŋine ŋien a kö ’yi Keila, a se wöki i piritön nagon se bubulö wöggiri kata kunu. A Saula iŋge tuköki adi Dawidi aje wökön kaŋo Keila yu, a nye tujaŋi jölö nanyit.

¹⁴ A Dawidi möŋdi mu ’diŋ i ’danaesi nago, i jur lo merya i yöbu na Jipi. A Saula ga ’yi lepeŋ perok liŋ, ama ŋun a ko wukin lepeŋ kanyit i könisi.

¹⁵ A Dawidi gwe ko kujönö kogwon Saula aje po kaŋo i ga ’yu na nye. A Dawidi gwe Koresa i yöbu na Jipi.

¹⁶ A Yonatana ŋuro lo Saula ŋine ŋien, a iti Koresa ko Dawidi yu, a togo ’yi lepeŋ ko kulyaesi ti ŋun.

¹⁷ A nye kulyani ko lepeŋ adi, Ko kujönö; kogwon könisi ti monye liŋ Saula de ti ryö do; do mo gwon a mor lo Yisaraele, a nan mo gwe a yumi ilot, ma ’di baba aje den kine kulya.

¹⁸ A se murek liŋ nyesi milye ko MATAT i komor; a Dawidi si ’dani Koresa nyu, a Yonatana yitöni mede.

¹⁹ A kirut Ŋutu ti Jipi iti Gibea ko Saula yu, a kulyani adi, Dawidi lu ’de ’ya mugun kayaŋ Koresa yu i ’danaesi nago, i mere Kakila lo gwon i swöt lo loki lo Yesimon.

²⁰ Nyenagon pon mor, poŋdi gwoso i ’deket inot; a lele swöt likaŋ mo wukiŋdye lepeŋ konut i könisi pon mor.

²¹ A Saula kulyani adi, Ti MATAT ’boroji ta kogwon ta aje won konyen ko nan.

²² Böŋö iti ta, ko ga ’yi ta ’bura; dene ta den ko mete ta met pirit wöriet nanyit nu, kode ŋa logon a met lepeŋ nyu; kogwon nan a yiŋ adi lepeŋ a lokoŋ parik.

²³ Nyenagon meddi ta ’bura ko deŋdi ta piritön ’danaesi liŋ na ’danari lepeŋ kunu, a i mukök ti ta yitwene köyö ni ko lore logon a gwak. A kirut nan mo moraddi ko ta; a ko lepeŋ ’diri kata i jur yu a nan mo ga ’yi lepeŋ i kiden na kötumitön liŋ ti Yuda.

²⁴ A se ŋine ŋien, a iti Jipi a kokwe na Saula. A Dawidi ko ŋutu kanyit kulo gwe i yöbu na Maon, i jur logon a Araba i swöt lo loki na Yesimon.

²⁵ A Saula ko ŋutu kanyit iti i ga ’yu na lepeŋ. A Dawidi iŋge yiŋ; nyenagon a lepeŋ iti i lurutat lo gwon kak i yöbu na Maon. A Saula ko yiŋge sona, a lepeŋ kepoddi Dawidi i yöbu na Maon.

²⁶ A Saula tiri lo swöt lo mere, a Dawidi ko ŋutu kanyit kulo gwe i lu swöt lo mere; a Dawidi rurumaddi wökön kaŋo kogwon nye kukujönö Saula, kogwon Saula ko ŋutu kanyit kulo tumuŋdye nyin ko Dawidi ni se ko ŋutu kanyit kulo anyen momorga se.

²⁷ A lore lo ’duröki ko Saula yu adi, Nyoŋgi ’de ’de i po; kogwon ŋutu ti Pelesete gwe i ryaggu na jur.

²⁸ A Saula yitwene bot i kepöddu na Dawidi, a iti i mörö ko ŋutu ti Pelesete; nyenagon a nu pirit luŋuni a mere Lwökit.

²⁹ A Dawidi kö ’yi ŋinu pirit, a tu si ’dani Engedi i ’danaesi nago.