1 Samuele 16 - Bibilia Buk na Ŋun nagon koti luŋu a

Dawidi a welaki a mor

¹ A MATAT kulyani ko Samuele adi, Diŋit ŋoman nagon do delyari Saula, kogwon nan a renya lepeŋ i gwon a mor lo Yisaraele na le? Tojorone uŋguri ilot ko welet ko ba-raddi lepeŋ; a nan de sonyoddi do ko Yisai yu ŋuto lo Beteleme, kogwon nan aje wulökiŋdyö mugun mor i kiden na ŋwajik kanyit.

² A Samuele kulyani adi, A nan de iti ada? Ko Saula a yiŋ kine kulya, a nye de tatuje nan. A MATAT kulyani adi, Baraddi kiteŋ ko do, a do kulyani adi do a po i ’duŋö-kiŋdyö na MATAT rubaŋga.

³ A do de luŋgi Yisai i ŋilu rubaŋga, a nan kwekiŋdye do ko do koŋdya nyo; a do welakiŋdye nan nye a mor logon nan tatakin do karin kanyit lu.

⁴ A Samuele koŋdi gwoso na kulyari MATAT na, a iti Beteleme. A temejik ti köji rume ko lepeŋ böböpuŋdyö, a pije adi, Do a po ko taliŋ le?

⁵ A nye nyobbi adi, Nan a po ko taliŋ. Nan poŋdya i ’duŋökiŋdyö na MATAT rubaŋga; toke ’yi ta ’börik ko moruŋdye ta ko nan i lo rubaŋga. A nye toke ’yi Yisai ko ŋwajik kanyit, a lupundye se i ŋilu rubaŋga.

⁶ A ko gwe sona na ’durökiŋdye se nu, a nye boŋgi Eliaba, a nye yeyeji adi, Nye ŋilo ŋona logon MATAT ’dek welakiŋdya a mor logon gwogwo ’dan ni kanyit i komor lo.

⁷ Ama a MATAT kulyani ko Samuele adi, An do ko meddya komor nanyit kode tojolan na mugun, kogwon nan a renya lepeŋ. Kogwon nan MATAT ti meddya gwoso ŋuto i meddya nanyit; ŋuto meddya gweya na kaŋo, ama MATAT meddya töili.

⁸ Nyena a Yisai luŋgi Abinadaba, a tiŋdi lepeŋ i lwöpöddu ko Samuele i komor. A Samuele kulyani adi, MATAT a ko wuluŋdyö ŋilo köti.

⁹ A kirut Yisai tiŋdi Sama i lwöpöddu. A Samuele kulyani adi, MATAT a ko wuluŋdyö ŋilo köti.

¹⁰ A Yisai tiŋdi ŋwajik kanyit buryo i lwöpöddu ko Samuele i komor. A Samuele kulyani ko Yisai adi, MATAT a ko wuluŋdyö kilo.

¹¹ A Samuele pije Yisai adi, Sekilo ŋwajik kulök liŋ? A nye waddi adi, Pituŋdye a ŋuro lo ’dutet, ama lepeŋ lu yu i yuggu na yidin. A Samuele kulyani ko Yisai adi, Soŋdi ŋuto i dogga na lepeŋ, kogwon yi ti bulö si ’daki kak tojo ko lepeŋ a po ni.

¹² A nye soŋdi ŋuto a joŋdi lepeŋ lukata. A ŋuro gwe a loliyuk, ko konyen a loke, ko mugun nanyit a nake parik. A MATAT kulyani adi, ŋine ki, ko welakiŋdye lepeŋ a mor, kogwon nye ŋilo.

¹³ A kirut Samuele ’dumuŋdye uŋguri lo welet, a welakiŋdye lepeŋ a mor i kiden na luŋasirik; a Mulökötyo lo MATAT poki to Dawidi i mugun ko riŋit a duma suluja i ŋilu lor tojo ko ŋerot. A Samuele ŋine ŋien, a iti Rama.

Dawidi a Julökiŋdyö Saula tom

¹⁴ A Mulökötyo lo MATAT kö ’yi Saula, kölum a Mulökötyo loron logon MATAT lo sunyuŋdyö toniŋe lepeŋ.

¹⁵ A köliŋönök ti Saula kulyani ko lepeŋ adi, Mete, soŋinana Mulökötyo loron logon Ŋun lo sunyuŋdyö gwe i tom ŋö na do.

¹⁶ Ti do duma likaŋ saŋi yi köliŋönök kulök lo gwon konut i komor kulo i galaddu na ŋuto logon a bodo i ju ’yö na tom, anyen ko Mulökötyo loron logon ŋun a sunyun lo a pokin konut i mugun, a nye de ju ’ye ju ’yö. a do de kele kelan.

¹⁷ A Saula kulyani ko köliŋönök kanyit kulo adi, Galaki ta nan ŋuto logon deden ju ’yö ’bura, ko joŋdi ta lepeŋ köyö ni.

¹⁸ A lele titinti lonyit waddi adi, Mete, nan a meddya lele ŋuro lo Yisai ŋuto lo Beteleme, lepeŋ a bodo i ju ’yö, lepeŋ a ŋuto wa ko jujukin i mörö, ko a lokoŋ i jambu, ko a ŋuto lokwekwe-len, köti MATAT gwon ko lepeŋ.

¹⁹ Nyenagon a Saula sonyoddi luyökie ko Yisai yu adi, Sunyuki nan ŋuro ilot Dawidi logon a kayukunit ŋilo.

²⁰ A Yisai ’dumuŋdye kaine, a sopakiŋdye ambatajin ko jurak gober lo binyo, ko kilolor, a sunyukiŋdye Saula kine ŋo ko ŋuro lonyit Dawidi i könin.

²¹ A Dawidi ’dure ko Saula yu, a kitakiŋdye lepeŋ, a Saula nyaŋi lepeŋ parik, a nye gwe a ka ’dokonit lo tito kanyit möriesi.

²² A Saula sonyoddi lore ko Yisai yu adi, Ti Dawidi böŋö möŋdi köyö ni, kogwon nan a ryö lepeŋ a lo ’but köyö i komor.

²³ A ko gwe sona nagon Mulökötyo loron lo sunyun ŋun lo ko poki ko Saula i mugun, a Dawidi ’dumuŋdye tom, a ju ’ye ju ’yö, a yeyeesi ti Saula nyökuŋdye a na ’but, a Mulökötyo loron kölökiŋdye lepeŋ.