1 Samuele 12 - Bibilia Buk na Ŋun nagon koti luŋu a

Samuele a jambu ko lodir lo ŋutu

¹ A Samuele kulyani ko ŋutu liŋ ti Yisaraele adi, Mete ta, nan aje yiŋga gworo losu i ŋo liŋ nagon ta a jamakin nan kune, nan aje tiŋdu ta mor logon tumatyan ko ta.

² Nyena mete ta, maŋilo mor lo wöro kasu ŋerot; nan gwe a modoŋ, kupir kwe aje kwekweja. Mete ta, ŋwajik kwe makilo gwon ko ta i pirit na geleŋ; nan aje wörö kasu i komor suluja i toteton nio tojo ko lo lor.

³ Nan malo; tokuruki-ŋdye ta kulya kwe ko MATAT i komor, ko i komor na lo ŋuto logon nye a wela-kin a mor lo. Nan ŋona a riŋuŋdya dwot liŋ a? Kode nan ŋona a pisuŋdya kaine niŋa? Kode nan ŋona a mumulugga ŋa? Nan ŋona a ru ’ya ŋa? Kode nan ŋona a ’dumuŋdya ropet ko ŋa i könin anyen ’daŋ konyen kwe ko se? Nan de nyönyokökin ta.

⁴ A se kulyani adi, Do a ko mumulugga yi kode ru ’ya yi, kode luŋa wuju nene ŋo ko lele ŋuto i könin na ropaki a lwon.

⁵ A nye kulyani ko se adi, MATAT lo gwe a katokoronit losu, a koti mor lo welaki lo gwe a katokoronit i lo lor adi, ta a ko ryö nene ŋo köyö i könin. A se ruŋge adi, ’Diri nye a katokoronit.

⁶ A Samuele kulyani ko ŋutu kulo adi, ŋilo a MATAT logon a wuluŋdyö Mose ko Arona, iŋkoi logon a joŋdya merenyejin kasu kaŋo i jur lo Ejipeto lo.

⁷ Nyenagon gwo ’de ta go, anyen nan bubulö nyönyökökiŋdyö ta ko MATAT i komor kulya ti lwökesi liŋ ti MATAT nagon nye a tetenakin ta ko merenyejin kasu kunu.

⁸ I diŋit nagon Yakobo a tu Ejipeto, a merenyejin kasu köju gwiki ko MATAT, a MATAT soŋdi Mose ko Arona, logon a joŋdya merenyejin kasu kaŋo Ejipeto yu, a tiŋdi se i si ’da i na pirit.

⁹ Ama se aje böŋöri MATAT ŋun lose; a nye pakiŋdye se i könisi ti Sisera duma lo kamörök ti Kasor, ko i könisi ti ŋutu ti Pelesete, ko ti mor lo Moaba; a se möröni ko lepeŋat.

¹⁰ A se gwiki ko MATAT, a kulyani adi, Pon MATAT, yi aje toroŋdya, kogwon yi aje böŋöri do, a kitakiŋdye ŋunyen logon a Balajin ko Asatarot; ama soŋinana lwökuŋdye yi i könisi ti merok kaŋ a yi kitakiŋdye do.

¹¹ A MATAT sonyoddi Yerubala, ko Barak, ko Yepeta, se ko nan, a lwökun-dye ta i könisi ti merok kasu i swötön liŋ; a ta si ’dani ko taliŋ.

¹² A nagon ta aje meddya adi Nakasa mor lo ŋutu ti Amon po i morö ko ta nu, a ta kulyani ko nan adi, ’Bayin, ama ti mor lo saŋi yi. Kudyakan MATAT ŋun losu lo gwon a mor losu.

¹³ Nyenagon mete ta, malo mor logon ta a wulun lo, logon ta a piyun lo. Mete ta, MATAT aje tiŋdu ta mor i tumatyan ko ta.

¹⁴ Ko ködyö ta mo kukuk MATAT, a kitakiŋdye lepeŋ, a yiŋge gworo lonyit, a tine renya saresi ti MATAT, ko ködyö ta se ko mor logon saŋu ta ŋilo mo gwon a kakepok ti MATAT ŋun losu, a ŋina mo gwe a ŋo na ’but parik;

¹⁵ ama ko ta mo ti yiŋga gworo lo MATAT, ama a lauŋdye saresi ti MATAT, nyena a könin lo MATAT mo möröni ko ta, gwoso na möröni nye ko merenyejin kasu köju nu.

¹⁶ Nyenagon soŋinana gwo ’de ta go, ko meddi ta na ŋo duma nagon MATAT de kökon kasu i komor na.

¹⁷ Lo lor ti gwon a ’butun ŋeret lo ’bolot le? A nan de momo ’yi MATAT anyen nye böŋö sunyuŋdyo kipya lo ki ko kudu, anyen ta deden ko memet adi toron nasu gwe a duma nagon ta a kon ko MATAT i komor, i piyuŋdya nasu na mor.

¹⁸ a Samuele gwiki ko MATAT, a MATAT sunyuŋdye kipya lo ki ko kudu i ŋilu lor; a ŋutu liŋ iŋge kujönö MATAT ko Samuele parik.

¹⁹ A ŋutu liŋ kulyani ko Samuele adi, Böŋö mumuluki yi köliŋönök kulök ko MATAT Ŋun ilot, anyen yi gwon ti twatwa; kogwon yi a ’yalakiŋdya na toron i loki na toronjin kao liŋ nagon yi a pikiŋdye ’börik mor na.

²⁰ a Samuele kulyani ko ŋutu adi, Ko kujönö ta; ma ’di nagon ta aje koŋdya kine toronjin liŋ, ama an ta ko girara kaŋo i kepöddu na MATAT, ama kita-kiŋdye ta MATAT ko töilyet kasu liŋ;

²¹ ko an ta ko girara a swöt i kepöddu na nyömuejin logon ’bak ’bulit, logon ti bulö lwöggu, kogwon se a ŋo kana.

²² Kogwon MATAT mo ti paju ŋutu kanyit, kogwon a ’deket na MATAT i tiŋdu na ta i gwon a ŋutu kanyit lomoriot kogwon karin kanyit na bubula.

²³ Ama nan kwöŋ ti bulö toroŋdya MATAT i kö ’yu na momo ’yu na lepeŋ i kulya kasu; a nan mo todinikiŋdye ta kiko logon a lo ’but ko a lo rigwo.

²⁴ tuŋ kuŋge ta MATAT, ko kitakiŋdye ta lepeŋ ko to ’diri ko töilyet kasu liŋ; ko yeyeji ta ŋo temejik gwakunen nagon nye a konakin ta.

²⁵ Ama ko ta nyuŋ koŋdya toron, a ta mo tukarani kaŋo mora ko mor losu liŋ.