1 Samuele 1 - Bibilia Buk na Ŋun nagon koti luŋu a

Yugwe na Samuele

¹ Lele ŋuto köju kata lo Ramataim-sopim lo jur lo merya ti Epuraima, karin kanyit a Elekana, ŋuro lo Yero-kam, ŋuro lo Eliyu, ŋuro lo Toku, ŋuro lo Supa, Epuraimatyo.

² A lepeŋ gwe ko wate murek; karin ti nene a Ana, a karin ti nene gwe a Penina. A Penina gwe ko ŋwajik, ama a Ana gwe ’bak ŋwajik.

³ Temba i kiŋa ŋilo ŋuto yeŋ woro kanyit köji tojo Silo i kwakwaddu ko i ’yurakiŋdya na MATAT lo kurumi rubaŋga. A ŋwajik murek ti Eli, logon a ko Openi ko Pinasa gwe nyu a koane-jin ti MATAT.

⁴ A i lor logon Elekana ’duŋge rubaŋga, a nye ŋupi korakiŋdye Penina narakwan nanyit ko ŋwajik kanyit liŋ, lyan ko nawate koresi kase;

⁵ nyena ma ’di nagon nye nyanyar Ana, kolumbo a nye korakiŋdye lepeŋ koret gepeŋ tuŋ; kogwon MATAT aje ’dija yoŋwe na Ana.

⁶ A koyini nanyit ŋupi sasaŋdi lepeŋ parik, a todelyaji nye kogwon MATAT a ’dija yoŋwe nanyit.

⁷ A gwe sona temba i kiŋa; a Penina ŋupi kekeŋdi arabat ko lepeŋ na worori nye ko MATAT kadi nu. Nyena-gon a Ana gwine gwien a tine nyesu.

⁸ A lalet lonyit Elekana pije lepeŋ adi, Ana, nyo nagon do gwigwien? Ko nyo do ti nyesu? Ko nyo tö ili ilot dedelya? Nan ’bayin a lo ’but konut i metet lwoŋgu ŋwajik lyan puök logon do ködyö yuyuŋun kulo le?

⁹ A i mukök na nyesu nase ko na möju nase Silo yu nu, a Ana ŋine ŋien. A koane Eli gwe i si ’da kanyit i si ’daet i kotumit na kadi na MATAT.

¹⁰ A Ana gwe ko delya duma kanyit i töili, a momo ’yi MATAT, a gwine gwien parik.

¹¹ A nye milyeji milyeju adi, Pon MATAT lo kurumi, ko do agu lolor a meddya na delya na na ’dupiet inot, a do yeyene nan, a ti do gwe ti böŋöri nan kölipönit inot, a ko do ködyö a tiŋdu ’dupiet inot ŋuro lulalet, a nan mo tiŋdi lepeŋ konut pon MATAT, i perok liŋ ti gwiliŋit nanyit, a kwe nanyit mo tine ’barinu.

¹² A nagon nye nyuŋ momo ’yu ko MATAT i komor nu, a Eli gwe i me-meddya na kutuk nanyit.

¹³ A Ana kulyani ko töili; a lo ’biyulan kanyit tuŋ lo böböŋdi, nagon a gworo lonyit tine yiŋa; nyenagon a Eli yeyeji adi nye a meran.

¹⁴ A Eli pije lepeŋ adi, Diŋit ŋoman nagon do ’de ’deggi meran? Teŋe teŋ mugun i möju na yawa.

¹⁵ Ama a Ana ruŋge adi, ’Bayin pon duma liŋ, nan aŋuto nagon gwon ko delyaesi jore i töili; nan a ko möju kode binyo ma ’di yawa na pötwör, ama nan gwon i yakakiŋdya na delyaesi kwe ko MATAT i komor.

¹⁶ Ko yeyeju adi köliŋönit inot aŋuto nagon wöworo abur, ama nan jambu sona i na diŋit na kogwon yöyöŋesi ko sasanyesi kwe gwe jore parik.

¹⁷ A Eli nyobbi adi, Iti ko taliŋ, ko ti ŋun lo Yisaraele tiŋdi do molet inot nagon do aje mulun kanyit na.

¹⁸ A Ana kulyani adi, Ti nan böŋö ryeji ’busan gwoso nagon do a meddi na. A ŋuto na iti tu, a nyesi nyesu, a komor nanyit tine meta ko delya köti.

¹⁹ A se ŋine ki ko ’bure kobubut a kwakwaddi kwakwaddu ko MATAT i komor; a se yitöni bot Rama kase i mede. A Elekana lupöni ko Ana narakwan nanyit yu, a MATAT yeyeji Ana.

²⁰ A ko gwe sona nagon diŋit aje temakiŋdya nu, a Ana piŋge pigga, a yuŋuŋdye ŋuro lulalet, a gwije lepeŋ a Samuele, kulya adi, Kogwon nan a mulun lepeŋ ko MATAT.

²¹ A lu ŋuto Elekana ko mede nanyit iti i ’duŋökiŋdyö na MATAT rubaŋga gwoso na saraki temba i kiŋa, ko i koŋdya na milye lonyit.

²² Ama a Ana gwe a ko tu, kogwon lepeŋ a kulya ko lalet adi, I diŋit nagon ko ŋuro lo a kö ’yu nöggu, a nan mo joŋgi lepeŋ i meta ko MATAT i komor anyen gwolor nyu asut.

²³ A lalet lonyit Elekana kulyani ko lepeŋ adi, Ti do koŋdi ŋo nagon do a met a na ’but konut; möŋdi tojo lepeŋ a kö ’yu nöggu; tuŋ ti MATAT togwi ’dikiŋdye kulyaet lonyit go. Nyena a ŋuto na möŋdi möŋdu, a tunoggi ŋuro lonyit tojo lepeŋ a kö ’yu nöggu, a ŋuto na möŋdi möŋdu, a tunoggi ŋuro lonyit tojo lepeŋ a kö ’yu nöggu.

²⁴ A nagon ŋuro aje kö ’yu nöggu nu, a ŋote joŋgi lepeŋ se ko dwöt lo kiŋajin musala ko epa gepeŋ ŋa ’bolot, ko jurak lo binyo; a nye joŋdi Samuele Silo ko MATAT kadi; a ŋuro lu nyuŋ gwon a lo ’dit.

²⁵ A se ’duŋge dwöt lo, a joŋdi lo ŋuro ko Eli ni.

²⁶ A Ana kulyani adi, Pon duma liŋ! ’Diri ’diri gwoso na gwoŋdi do na pon duma liŋ, nan a ŋuto nagon köju gwo ’dan ni konut i komor i kwakwaddu na MATAT na.

²⁷ Ma ŋilo ŋuro logon nan a mulun ko lepeŋ; a MATAT iŋge tiŋdu nan molet nio nagon nan a mulun ko lepeŋ na.

²⁸ Nyenagon nan aje tiŋdu lepeŋ ko MATAT; nye aje tiki MATAT temba i gwon nanyit jörun. A se kwakwaddi MATAT nyu.