1 Petero 5 - Bibilia Buk na Ŋun nagon koti luŋu a

Yuŋge ta yidin ti Ŋun

¹ Nan gwon ko kulya na jamaki ŋutu kasu logon a temejik kilo. Nan jambu ko ta kogwon nan köti a lele temejiktyo. Nan a ŋuto logon ’diri a met Kristo i ŋoŋgo, a nan yeŋdi ŋaruŋdya na bulet nagon mo kwekweya nu.

² Yuŋge ta yidin ti Ŋun na gwon kasu kiden kine. Tiji ta se, ti gwon ko riŋaki, ama kogwon ta a wakun gwoso nagon Ŋun ’de ’dekan na. Tiji ta se ko pusök ti gwon kogwon gurut.

³ Ko tutumatyan ta ko ŋutu logon a wulöki ta anyen ta titi kilo, ama gwe ta a miresi ti teŋ na yidin.

⁴ A na pukuŋdye Kayukunit duma nu, a ta mo wuji Iŋguya telet logon a bulet lo ti riŋön.

⁵ Köti ta teton kodyö twötwö temejik kasu. Ta liŋ ködyö jupukiŋdya tokoyok gwoso boŋgo anyen tokitakin ko ’börik; kogwon a wurö adi, Ŋun rerenya ŋutu kabulak ti kusik ama kwekiŋdya ’busan i ŋutu lokoyokak.

⁶ Tokoyoke ta ’böriki mukuk na könin lo Ŋun lo riŋit, anyen nye böŋö ’bi ’yu ta ki i diŋit nanyit.

⁷ Gubara ta wiwinyesi kasu liŋ ko lepeŋ loki kogwon lepeŋ lo meddya ta.

⁸ Tiji ta tiju, ti konyen kasu gwe na, kogwon miriku losu kaŋöönit gwon gwoso kömiru lo wuwuŋi gaga ’yu ko nye koja ŋa.

⁹ Gwe ta a iŋgo i yupet i renya na lepeŋ, kogwon ta a den adi luŋasirik kasu lo yubbö i kak ’bukuluŋ kilo ködyö ŋoŋoŋgo kine ŋoŋesi na geleŋ kine.

¹⁰ A i mukök nagon ta aje ŋoŋgo ko diŋit a na ’dit nu, a Ŋun lepeŋ mo toluduŋge ta, a togo ’yi ta, a togwi’dikiŋdye ta go. Lepeŋ a Ŋun logon ’busan na nyaŋu liŋ gwon ko lepeŋ, logon a lupuŋdya ta i parundya na bulet na yeŋ nyin ko Kristo i mugun lo.

¹¹ Ti tumatyan gwe ko lepeŋ ŋupi ŋupi. Amin.

Romesi ti ’dutet

¹² Nan a wurökin ta ŋina leta na ’dit ko paret na Siliwano logon a luŋaser lo yubbö logon nan yiyinikin i kita lo. Nan wurokiŋöyti ta anyen togo ’yu ta ko anyen tokurukiŋdyö adi kine ŋo liŋ ’diri a ’busan na nyaŋu gwak na Ŋun. Gwo ’de ta go i na ’busan.

¹³ Teŋ na kayupok lo gwon Babela yu logon Ŋun a wulun gwoso ta kulu a roman ko ta. Koti Marako ŋuro lio roman ko ta.

¹⁴ Rome ta ko ’börik ko ’bi ’biyet na nyaŋu. Ta liŋ logon gwon ko Kristo i mugun kilo, nan roman ko ta adi, Ti taliŋ gwe ko ta.