1 Petero 4 - Bibilia Buk na Ŋun nagon koti luŋu a

Ti ta sarani ko ’deket na Ŋun ti gwon ko ’dekesi ti mugun

¹ Nyena kogwon Kristo a ŋoŋga i mugun na, jupukiŋdye ta töili lo geleŋ anyen ta gaji ’börik, kogwon ko ŋuto aje ŋoŋga i mugun nye aje kö ’yu toronjin.

² Nyena ta ködyö joŋga pitönö na diŋit nasu i na kak anyen sara ko ’deket na Ŋun ti gwon ko ’dekesi ti mugun.

³ Diŋit na lwöŋgu aje temakindya ta i koŋdya na ŋo nagon paganojin ’de ’dekan. Ta aje gwon i koŋdya na ŋo ti yu na kwe, ko i ’dekesi ti mugun, ko i memeri, ko i to ’betan ko yawa, ko i mömöjutu na yawa i roriot, ko i koŋdya na ŋo na mamana nagon a twöju na nyömuejin logon a ŋunyen.

⁴ Paganojin sösöŋu kogwon ta a ko morakiŋdya ko se i gwiliŋit lose abur logon se koŋdya a wuya kana, a se liŋ i kiŋdye ta.

⁵ Se mo wawasakin kulya na kon se kine i nye logon gwe ajo i ’duŋö kiŋdyö na kulya ti ŋutu lo gwon jörun se ko ti lo twatwa lo.

⁶ Kogwon ŋina kwe, Loŋe Lo ’but a tokuki i ŋutu lo twatwa. Ŋutu lo twatwa a ’duŋöki putet na gwoŋdi se i na kak gwoso na ’duŋöki ’e ŋutu liŋ na. Loŋe Lo ’but a tokuki se anyen ködudwölön kase böŋö ruru gwoso na gwoŋdi Ŋun na.

Kametak lo ’but ti ’dokesi na po ko Ŋun

⁷ ’Dutet na ŋo liŋ gwe nyona, nyena gwe ta ajo kasu i yeyeesi. Tiji ta ’börik anyen ta kwakwaddu.

⁸ Lwölwöŋ ŋo liŋ ta ködyö tutunyar ko ’börik ko töilyet liŋ, kogwon nyaŋu muggö toronjin jore.

⁹ Wuji ta ’börik a komu kasu i midijik ’bak wiwinya.

¹⁰ Ŋun a ’dogga yi liŋ ko ’dokesi ka ’de ka ’de, nyena ti yi gwe a kametak lo ’but ti kine ’dokesi, anyen tutunarakin ko ’börik ko kine ’dokesi.

¹¹ Ko lele nuto totokujö ti nye tokuje kulyaesi gwoso lo lupe ko Ŋun i kutuk; ko lele ŋuto kikitakiŋdya, ti nye kitani i riŋit nagon po ko Ŋun, anyen Ŋun pupura i ŋo liŋ kogwon Yesu Kristo. Ti bulet ko riŋit gwe ko lepeŋ ŋupi ŋupi. Amin.

Ŋoŋga kogwon Tokristianan

¹² Julin kwe lo nyanyara, ko söŋu ta i ŋo na pokin i temba na ta gwoso na tembi kimaŋ na, adi ŋina ŋo a ŋo sörit nagon a pokin kasu ki.

¹³ Nyena gwoso na paruŋdye ta ŋoŋesi ti Kristo na lyöŋi ta lyöŋön, anyen molu na kweyari lepeŋ ko minyo lonyit nu, a ta mo nyolani nyola ko lyöŋön a duma.

¹⁴ Ta a kalyoŋok ko ŋutu a momoröju ta kogwon karin ti Kristo, kogwon Mulökötyo lo bubula logon a Mulökötyo lo Ŋun lo gwon ko ta.

¹⁵ ko ta ŋoŋoŋgo, ti gwe ti gwon kogwon ta a tatuja ŋutu, kode ta a koko ’ya, kode ta a koŋdya arabat, kode ta a ŋutu logon pokin i kulya nagon ’bayin a kasu;

¹⁶ ama ko lele ŋuto a ŋoŋgo kogwon nye a Kristianityo ti kwe nanyit gwe ti yu, ama ti nye bu ’ye Ŋun kogwon kine karin.

¹⁷ Kogwon diŋit aje po nagon ’duŋdri putet; a ŋutu ti mede na Ŋun ’duŋökine putet a kokwe. Nyena koyi lo ’duŋöki putet a kokwe, a ’dutet nase mo gwe ada se logon rerenya Loŋe Lo ’but lo Ŋun kilo?

¹⁸ A wurö adi, Ko ŋutu lo rigwo a lwökö go, a nyo mo na poki i ŋutu logon ti twöju Ŋun ko i katoronyak kilo?

¹⁹ Nyenagon ti se logon a ŋoŋgo gwoso na ’deggi Ŋun na, ti se yeŋe koŋdya ’bura, ko ti se yinikiŋdye ’börik i Ka gweyanit lose logon jojo yiniki ti Iöpuggö lo.