1 Petero 2 - Bibilia Buk na Ŋun nagon koti luŋu a

Ŋurupit lo gwon jorun se ko jur loke

¹ Nyenagon paji ta manesi liŋ, ko mumulukesi liŋ, ko ’burönö, ko yulön, se ko jamesi lorok liŋ.

² Gwe ta gwoso lupudiet lo pete ta ’due logon yöŋö ŋöggu le. Nyena yöŋöni ta kinyo logon Mulökötyo Loke lo tiŋdu logon ’bak mumuluket, anyen ta böŋö ’duruŋdyö ki i lwökö kogwon nye.

³ Kogwon ta aje waŋ ’busan na Matat adi nye a lo ’but.

⁴ Lepeŋ a ŋurupit lo gwon jörun logon ŋutu a renya lepeŋ, ama Ŋun a wulun lepeŋ a ’bulit nanyit duma. Po ta ko lepeŋ ni,

⁵ anyen ta ’dukö gwoso ŋurupö lo gwon jörun a kadi na Mulö kötyo, anyen ta gwon a koanejin loke, i wukiŋdya na rubaŋgajin ti töilyet kasu logon Ŋun a ruk kogwon Yesu Kristo.

⁶ Kogwon a wurö adi, Meddi nan lo petakiŋdya ŋurupit Siona, ŋurupit lo goŋet logon a wulwe a gwe ko ’bulit a duma. Ŋuto logon a yubbö lepeŋ lo mo ti toyuö kwe.

⁷ Nyenagon ta logon a yubbö lepeŋ kilo, ŋilo ŋurupit gwon kasu a ’bulit duma, ama i ŋutu logon a ko yubbö kilo, ŋurupit logon ka ’dukök a renya lo. aje wora a ŋurupit tutuŋet lo goŋet lo kadi; koti adi,

⁸ Nye a ŋurupit köpuket ko a lurutat to ’dorowet. Lepeŋat kopuko kogwon se a renya lo kulyaet. Lepeŋat a wuloki i koŋdya sona.

⁹ Ama ta a kötumit na wulwe, a koanejin ti mor, a jur lo gelwe a loke, ko a ŋutu lomoriot ti Ŋun, anyen ta böŋö tokuoddu konesi na ’but parik nakwekwelen ti lepeŋ logon aje lupuŋdya ta kaŋo i mudwe anyen po i parara nanyit sorit lo.

¹⁰ Ta köju ’bayin a ŋutu, ama soŋinana ta gwe a ŋutu ti Gun; ta koju a ko yataki, ama soŋinana ta aje yataki.

Gwe ta a ’dupi ti ŋun

¹¹ Julin kwe lo nyanyaia, nan mamaŋöju ta ko konisi murek adi, ta a lepelok ko a lo momonuŋdyö, nyena paji ta ’dekesi ti mugun nagon mömörö ko kodudwo kine.

¹² Gwe ta ko gwiliŋit lo ’but ko paganojin i komor, anyen na ŋökiŋdye se adi ta a katoronyak na, a se boŋo meddi konesi kasu na ’but a pupurje Ŋun i lor lo pöri nye lu.

¹³ Nyena kogwon kulya ti Matat likaŋ, twoji ta saresi liŋ logon temejik ti Jur a teten kilo. Twöji ta mor logon a duma lo ŋutu liŋ lo,

¹⁴ koti twoji ta modirön logon lepeŋ a sunyun anyen riŋga katoronyak ko anyen pupurja ŋutu logon koŋdya ’bura kilo.

¹⁵ Kogwon Ŋun ’de ’dekan adi ti ta koŋdi ’bura anyen ŋutu lu ’bbo logon ti den kulya kilo böŋö yiŋa taliŋ.

¹⁶ Gwe ta a luwi; ama ko kitari ta tolien nasu a muket na toron, ama gwe ta a ’dupi ti Ŋun.

¹⁷ Twoji ta ŋutu liŋ. Nyare ta nyar luŋasirik lo yubbo kilo. Kuŋge ta Ŋun. Twoji ta mor.

Mirakiŋdye ta ŋoŋga na Kristo

¹⁸ Ta kölipönök, ruŋge ta sara ko komonye kita ko twoyit. Ti gwon adi ta twoju ŋutu logon a lo ’but ko logon töilyet lilik tuŋ, ama köti twoji ta ŋutu logon a kaŋajin kilo.

¹⁹ Kogwon kodyö na a ŋo na ’but ko ŋuto ŋoŋgo taliŋ kogwon lepeŋ yeyeju Ŋun, ma ’di nagon nye a tomie ’bak kwe na kulya.

²⁰ Kogwon ’bulit a nyo ko ta ŋoŋgo taliŋ i diŋit nagon ta a koŋdya arabat a ta ’bitoni ’bito? Ama ko ta ŋoŋgo taliŋ i diŋit nagon ta a koŋdya ’bura a ta tomieni tomie, ŋina a ŋo na ’but nagon tulyöŋgu Ŋun.

²¹ Kogwon ta aje luŋuki i kine kulya, kogwon Kristo koti aje ŋoŋgo kogwon kulya kasu, a kolökiŋdye ta miret anyen ta kodyo kepoddu mokosi kanyit.

²² Lepeŋ a ko koŋdya toron kwoŋ, a mumulukesi gwe a ko rye kanyit i kutuk.

²³ Ko ŋutu a moru lepeŋ a nye tine ropakiŋdya moru; na ŋoŋgi nye nu, a nye gwe a ko tokujoŋdu ŋutu, ama a nye yinikiŋdye mugun ko lepeŋ logon lilija kulya rigwo lo.

²⁴ Nye lepeŋ lo ’doŋu toronjin kaŋ kanyit i mugun i kodini, anyen yi boŋo twatwa i kulya ti toron ko anyen ruru i kulya ti loti lo rigwo.

²⁵ Ta aje tobiala kogwon ’dikasin kanyit na ’bitoki kune.Ta koju aje gigiri gwoso yidin, ama soŋinana ta aje yitwe ko Kayukunit ni logon a Kametanit lo ködudwölön kasu lo.