1 Moran 4 - Bibilia Buk na Ŋun nagon koti luŋu a

Ŋutu temejik ti miri na Solomona

¹ A mor Solomona gwe a kasaranit lo Yisaraele liŋ.

² Karin ti temejik kanyit ti miri makine: Ajaria ŋuro lo Sadok gwon a koane;

³ a Elikorep ko Aiya ŋwajik ti Sisa gwe a kawurök; a Yosapata ŋuro lo Akiluda gwe a katoyeyeonit;

⁴ a Benaya ŋuro lo Yoyada gwe a duma lo kamörök; a Sadok ko Abyatar gwe a koanejin;

⁵ a Ajaria ŋuro lo Natana gwe a duma lo kamemetak; a Tabuda ŋuro lo Natana gwe a koane ko köti a ju lo mor;

⁶ a Akisar gwe a kamemetanit lo kadi na mor; a Adoniram ŋuro lo Abida gwe a duma lo ŋutu lo riri ’diki i kita.

⁷ A Solomona gwe ko kamemetak puök wot murek ti Yisaraele lio, logon a kagalak ti kinyojin ti mor ko mede nanyit; ŋutu geleŋ geleŋ gwon ko yapa lonyit galet lo kinyo temba i kiŋa.

⁸ Karin kase makune; Ben-kur a kamemetanit lo jur lo merya ti Epuraima;

⁹ ko Ben-deker a kamemetanit lo Mukasa, ko Salebim, ko Bete-semese, ko Elon-bet-kanan;

¹⁰ ko Ben-keseda a kamemetanit lo Arubot (a Soko ko jur lo Keper lio gwe a lonyiŋ;)

¹¹ ko Ben-abinadaba a kamemetanit lo ko ’dulan ti Dor lio (Tapat ŋuro na Solomona a narakwan nanyiŋ)

¹² ko Bana ŋuro lo Akiluda a kamemetanit lo Tanak, ko Megido, ko Bete-sean lio logon nyona ko Saretan i lukak na Yejerele, köti suluja ko Bete-sean tojo ko Abele-mekola, teŋ ko swöt lo Yokemeam;

¹³ ko Ben-geber a kamemetanit lo Ramot-gilada (a turön ti Yair ŋuro lo Manase lo gwon Gilada yu kulo gwe a kanyit,) a jur lo Argoba lo gwon Basan, kweja adi köjinö temejik merya buker, nagon ko mariŋan ko rigilesi logon a mölwö kune a kanyit kötu;

¹⁴ ko Akinadaba ŋuro lo Ido a kamemetanit lo Makanayim;

¹⁵ ko Akimasa a kamemetanit lo Napatali yu (ŋilo ŋuto a yemba Basemat ŋuro na Solomona a nakwan nanyiŋ;)

¹⁶ ko Bana ŋuro lo Kusai a kamemetanit lo Aser ko Bealot;

¹⁷ ko Yosapata ŋuro lo Paruak a kamemetanit lo Yisakar;

¹⁸ ko Simei ŋuro lo Ela a kamemetanit lo Benyamina;

¹⁹ ko Geber ŋuro lo Uri a kamemetanit lo jur lo Gilada, logon köju a jur lo Sikon mor lo Amori ko lo Oga mor lo Basan. A kamemetanit gwe geleŋ i jur lo Yuda.

Solomona a lokoŋ parik ko a puputuru ŋerot

²⁰ A ŋutu ti Yuda ko ti Yisaraele gwe jore gwoso sese ti tör; a lepeŋat nyesi nyesu a möji möju a, gwe ko lyoŋon.

²¹ A Solomona gwe a kasaranit i tumatyanjin liŋ suluja i kare Perat tojo ko jur lo Pelesete ko tojo ko koret lo Ejipeto; a se joŋdi ’dokesi a kitakin-dye Solomona i perok liŋ ti gwiliŋit nanyit.

²² A kinyojin lo jaki Solomona i lor geleŋ kulo gwe a koresi merya musala ti ’bolot na jiö a naliliŋök, ko koresi merya buker ti ’bolot na rarayaka,

²³ ko dwönin puök lopir, ko kulye dwönin merya murek lo babaju abur, ko köbilu mia geleŋ, kökö ka ’bujin, ko nyama, ko aburiöt, ko sokoro napir.

²⁴ Kogwon lepeŋ gwon ko saret i na pele liŋ na kare Perat suluja Tipisak tojo ko Gaja kweja adi i moran liŋ ti na pele na kare; lepeŋ twötwöi ko ŋutu kanyit i swötön liŋ.

²⁵ A ŋutu ti Yuda ko ti Yisaraele si ’dani ’bak yöyöŋesi, suluja Dan tojo Ber-seba, a se liŋ sakani kase i mukökö ti kaden ti binyo ko ti ki ’bi, i perok liŋ ti Solomona.

²⁶ A Solomona köti gwe ko köjinö nagon a temakiŋdya kusanjin alipan merya iŋwan ti arabiajin lo jijikö, ko ŋutu kajoŋak ti kusanjin alipan puök wot murek.

²⁷ A kilo kamemetak galakiŋdye mor Solomona kinyojin a yapala se ko kulye liŋ lo po ko mor Solomona i ’baŋ i nyesu kulo; a se tine jaran i nene ŋo.

²⁸ A ŋutu liŋ koŋdi gwoso saret lonyit joŋdya ’bolot saora ko pudi ti kusanjin ko ti kusanjin lo wöwöki parik tojo i pirit nagon ’de ’de-karikin na.

²⁹ A ŋun tiŋdi Solomona koŋon ko kuruŋdyö na kulya nagon lwölwöŋgu parik ko yeyeesi nagululök gwoso sese ti kijit na tör.

³⁰ A koŋon na Solomona aje lwöŋ koŋon na ŋutu liŋ ti swöt lo ’yure ko na ŋutu liŋ ti Ejipeto.

³¹ A nye gwe a lokoŋ lwölwöŋ kulye ŋutu liŋ, nye a lokoŋ lwölwöŋ Etan lo po Ejira, ko Eman, ko Kalakola, ko Darada, logon a ŋwajik ti Makola; lepeŋ köti kukwön parik i jurön liŋ lo gwon kanyit i mara kulu.

³² Lepeŋ köti a jambu tolupesi alipan musala, ko a yiyiuŋdyö kölisi kanyit aliŋ geleŋ ko mukanat.

³³ Lepeŋ a jam kulya ti kaden suluja ko ködini lo Libanon logon gwoso tika tojo ko lömuryeje logon ’duruŋdyö i goroma; nye a jambu kulya ti kijakwa köti, ko ti kwen ko ti ŋo liŋ lo gwöŋtu kak, ko ti somot.

³⁴ a ŋutu poŋdi i jurön liŋ ka ’de ka ’de ko i moran liŋ ti kak logon a yiŋ lore lo koŋon nanyit kulo i yiŋga na koŋon na Solomona.