1 Moran 3 - Bibilia Buk na Ŋun nagon koti luŋu a

Solomona a yemba ŋuro na Paro

¹ A Solomona teteŋdi töjulin ko Paro mor lo Ejipeto, a poŋdi a komonit lonyit, a joŋgi ŋuro na Paro a narakwan nanyit, a iŋge jon lepeŋ i köji na Dawidi, tojo nye aje tutuŋgö kadi nanyit, ko kadi na MATAT, ko gorom na lopakiŋdya Yerusalema kiden.

² Ama ŋutu nyuŋ gwon i ’duŋgo na rubaŋgajin i piritön kwakwasesi na gwon i ko ’dulan ti merya kune, kogwon nene kadi a ko nyuŋ ’duköki MATAT i karin kanyit.

Solomona a muluŋdyö kogon

³ A Solomona nyaŋi MATAT, awöröni i saresi lo wuröki monye lonyit Dawidi; ama tuŋ a nye ’duŋge rubaŋgajin ko a ’yuŋe bökur i piritön kwakwasesi na gwon i ko ’dulan ti merya kune.

⁴ A mor iti Gibeon i ’duŋgö na rubaŋga nyu, kogwon nu gwon a pirit kwakwaset duma na gwon i ko ’du, a Solomona yeŋ wuwukiŋdya rubaŋgajin aliŋ geleŋ lo ’yu ’yura ’buluŋ i ŋinu pirit ’yuret na rubaŋgajin.

⁵ a MATAT puköki ko Solomona i rudwe i tukwaje Gibeon yu; a ŋun kulyani adi, Pije ŋo nagon nan titin do.

⁶ A Solomona kulyani adi, Do a kwekiŋdya baba Dawidi kölipönit ilot nyaŋu inot duma nagon ti ’duddyö kwöŋ na, kogwon lepeŋ a wörö konut i komor ko to ’diri ko löti lo ’but, ko töili lo rigwo konut, a do aje ’delakiŋdya lepeŋ nyaŋu duma nagon ti ’duddyö kwöŋ na, ko aje tiŋdu lepeŋ ŋuro i si ’da kanyit i si ’daet na tumatyan i lo lor.

⁷ Nyenagon pon MATAT ŋun lio, do aje tiŋdu nan kölipönit ilot i gwon a mor i ruddya na pirit na monye lio Dawidi; nan nyuŋ gwon a ŋuro lo ’dit, a nan tine den kulya ’bura.

⁸ A nan kölipönit ilot lo gwe i kiden na ŋutu kulök logon do a wulun kulo, se a kötumit duma logon ti jukin dena kode kena kogwon se jore parik.

⁹ Böŋö tiki nan kölipönit ilot töili logon kukuruŋdyö kulya i nyaŋu na ŋutu kulök, anyen nan bubulö koŋa ko kulya na ’but ko kulya narok; kogwon ŋuto ŋona a ŋa logon jujukin saŋu na kötumit inot duma?

¹⁰ A MATAT iŋge lyöŋön ko kine kulya na piyun Solomona kune.

¹¹ A ŋun kulyani ko lepeŋ adi, Kogwon do a piyuŋdya ŋina ŋo, a gwe a ko pikiŋdya mugun i si ’da ko kiŋajin jore, kode tukwörien, kode luŋa i tolikiŋdyö na merok kulök, ama do aje pikiŋdya mugun kuruŋdyö na kulya anyen deŋdya ŋo nagon a na ’but,

¹² mete, soŋinana nan de kökon gwoso na kulyari do na. Mete, nan titikin do töili lokoŋ lo kuruŋdyö na kulya, a lele ŋuto köju gwe ’bayin konut ŋerot kode logon mo pupukun konut i mukök gwoso do.

¹³ Nan köti titikin do ŋo nagon do a ko piyuŋdya kune, kweja adi ko tukwörien ko bula, anyen lele mor mo gwon ’bayin logon jojo ko do i perok kulök liŋ.

¹⁴ A ko do bubulö wörö i kikolin kwe i ’debba na saresi kwe lo wurö ko na jujuwesi kwe, gwoso na wöröri monye ilot Dawidi nu, a kirut a nan mo ’yala-kiŋdye perok kulök.

¹⁵ A Solomona purwene purwe, mete, a gwe a rudwe. A lepeŋ poŋdi Yerusalema, a gwo ’de i komor na saŋduk na tomoret na MATAT, a wukiŋdye ruba-ŋgajin lo ’yu ’yura ’buluŋ ko rubaŋgajin ti taliŋ, a konakiŋdye kölipönök kanyit liŋ rorwe.

Solomona a lilija putet ko koŋon

¹⁶ Nyena a ŋutu kalupejin murek poŋdi ko mor ni, a gwo ’de gwo ’dan kanyit i komor.

¹⁷ A nene nase kulyani adi, Pon duma lio, yi ko na ŋuto si ’da i pirit na geleŋ; a nan yuŋuŋdye lupudi i ŋinu kadi na gwoŋdi yi ko lepeŋ nu.

¹⁸ A gwe sona i lor tomusala i mukök na ta ’du nio, a na ŋuto köti na ruddye ta ’duuŋdyö, a yi gwe i pirit na geleŋ; a lepetyo gwe ’bayin lo gwon koyi i ŋinu kadi, tuŋ a yi ka ’de na gwon i ŋinu kadi.

¹⁹ A lupudi lo na ŋuto lo twane twan i tukwaje, kogwon lepeŋ a muju nye.

²⁰ A lepeŋ ŋine ki i tukwaje kiden, a ’dumuŋdye lupudi lio lo köyö i merete nagon nan ’dupiet inot nyuŋ dodoto nu, a tiŋdi lepeŋ kanyit i merete, a topirikiŋdye lupudi lonyit lo twan lo köyö i merete.

²¹ A nan ko ŋine i ko ’bure i tunöggu na ŋuro lio lo, mete, a lepeŋ aje twan; ama a nan ko gwulune ’bura i ko ’bure, mete, a gwe a leŋe ŋuro lio lo yuŋ nan lo.

²² A nene na ŋuto kulyani adi, ’Bayin; ŋilo lupudi lo gwon jörun lo a lio, ŋilu lupudi lo twan lo logon a ilot. Ama a na ŋuto kulyani adi, ’Bayin; lupudi lo twan lo a ilot, ŋilo logon jörun lo a lio. A se rerenyani sona ko mor i komor.

²³ A mor kulyani adi, Nene a jambu adi lo lupudi lo gwon jörun lo a lonyit, a lo lupudi lo twan lo a lo ŋina; ama a nene na rerenyani adi, ’Bayin, ama ŋilo lupudi lo twan lo a lo ŋina, lupudi lo gwon jörun lo gwe a lonyit.

²⁴ A mor kulyani adi, Taki ta nan baŋdu. Nyena a baŋdu lo jweni ko mor i komor.

²⁵ A mor kulyani adi, Kile ŋilo lupudi lo gwon jörun ŋilo, ko tiŋdi nene nase lele swöt, ko nene nase lele swöt.

²⁶ A ŋinu ŋuto nagon lupudi lo gwon jörun lo a lonyit na kulyani ko mor, kogwon töili lonyit yöyöŋo ŋuro lonyit, adi. A, pon duma lio, tiŋdi na ŋuto lupudi lo gwon jörun ŋilo, an do ko tatuja nye kwöŋ. Ama a nene na kulyani adi, Ti nye kilani! Nye de ti gwon a lio kode a ilot.

²⁷ A kirut mor waddi, adi, Tiŋdi ŋinu ŋuto ŋilo lupudi lo gwon jörun ŋilo, an do ko tatuja nye kwöŋ; nye ŋina ŋote nanyit na.

²⁸ a ŋutu lio ti Yisaraele yiŋge kulya ti ŋilo putet logon mor a lili lo; a se kujönöni kujönö mor, kogwon se a kurun adi koŋon na ŋun gwon kanyit i lilija na putesi.