1 Korinto 9 - Bibilia Buk na Ŋun nagon koti luŋu a

Kita se ko ŋo nagon a ’buruki luyökie i koŋdya

¹ Nan ’bayin a luitöt le? Nan ’bayina luyökie le? Nan a ko met Matat likaŋ Yesu le? Ta ŋona ’bayin a kita nio ko Matat i mugun le?

² Ma ’di nagon kulye ŋutu ti yeye adi nan a luyökie, ama ta ko ’börik deden adi nan a luyökie, kogwon yubbö nasu kwekiŋdya ’diri adi nan a luyökie ko Matat i mugun.

³ Ŋilo a waset liö i ŋutu logon lilija kulya kwe kilo.

⁴ Yi luyökie ŋona a ko ’buruki i nyesu ko i möju le?

⁵ Yi ŋona a ko ’buruki i wörö se ko kiasirik na yubbö kune a wate kaŋ, gwoso na koŋdi kulye luyökie ko luŋasirik ti Matat se ko Kepa na le?

⁶ Ta ’dek adi ti yi ko Barnaba ka ’de lo kitani ko könisi kaŋ i parakiŋdya na ’börik le?

⁷ Lon asekertyo logon kita a robbi mugun i ŋo liŋ? Da logon a ’yuddu kaden ti binyo i luköbi a tine nyesu ludweki kase? Da logon a yuggu yidin, a tine möju le kase?

⁸ Nan ŋona jambu kine kulya ko riŋit na ŋuto le? Saresi ti Ŋun ŋona ti jambu jojo le?

⁹ Kogwon a wurö i Saresi ti Mose adi, Ti do gwe ti toŋa kutuk na dwöt an nyesu i diŋit na ryokakiŋdye nye do ’bolot na. Ŋun ŋona yeyeju dwönin ka ’de?

¹⁰ Nye ŋona ’diri ’bayin jambu sona i kulya kaŋ le? Iŋkoi, kine kulya a wurö i kulya kaŋ, kogwon kakurunit kuŋu ko yenet, a kagwutönit lo ’bolot gwuddye ko yenet adi nye paparuŋdya kinyo.

¹¹ Koyi a wekiŋdya nyomot ti Mulökötyo Loke kasu kiden, ŋina ŋona a ŋo duma le koyi yeŋdu ŋepa ŋo kasu ti mugun?

¹² Ko ta a ’burukiŋdya kulye ŋutu i ŋepa na ŋo kasu ti mugun, a yi ŋona tine ’buruki bia parik i parundya le? Ama yi a ko kitari nene na kine ŋo nagon a ’buruki yi kune, kölumbö yi ŋoŋoŋga ŋo liŋ an yi teŋgu Loŋe Lo ’but lo Kristo i tu ŋerot.

¹³ Ta a ko den le adi ŋutu lo kita i diŋit kwakwaset i Kadi na Ŋun kulo nyesu kinyo lo ŋinu kadi, a se lo kita i pirit ’yuret na rubaŋgajin kulo paruŋdye rubaŋgajin?

¹⁴ Matat köti a saŋu sona adi, ŋutu lo tokujö Loŋe Lo ’but kilo ködyö ryeju pariesi kase ti mugunya i Loŋe Lo ’but.

¹⁵ Ama nan bu ’ya mugun adi nan a ko kitari nene na kine ŋo nagon a ’buruki ŋutu lo tokujö Loŋe Lo ’but kilo. Nan köti a ko wuŋö kine kulya anyen kine ŋo tiki nan. Bia nan ködyö twatwan! Ti lele ŋuto gwe ti joŋga bu ’ya nio na mugun adi a ŋo kana.

¹⁶ Ko nan tokujö Loŋe Lo ’but a nan tine bu ’ya mugun, kogwon saret lo ri ’dikiŋdya nan. Iŋkoi, gwon a delya köyö ko nan ti tokujö Loŋe Lo ’but!

¹⁷ Ko nan ködyö lo wuluŋdyö koŋdya ŋina kita a nan kodyö tikine ropet, ama nan a ko wulun mugun gwoso i ’dekesi kwe, ama kogwon Ŋun lo wuluŋdyö nan i koŋdya na ŋina kita.

¹⁸ A ko sona, ropet nio gwe a nyo? Ropet nio a tokujö na Loŋe Lo ’but ’bak luŋgu na ropet, kweja adi nan a ko luŋgu ŋo nagon nan a ’buruki kune i Loŋe Lo ’but.

¹⁹ Kogwon ma ’di nan ’bayin a ’dupiet lo lele ŋuto, nan a tiŋdu mugun a ’dupiet lo ŋutu liŋ anyen nan böŋö löpukuŋdyö ŋutu jore.

²⁰ Na gwoŋdi nan ko Yudayaki kiden na, a nan koŋdi mugun a Yudayakityo anyen nan böŋö löpukuŋdyö se. Lepeŋat gwon i mukök na Saresi ti Mose, a nan köti koŋdi mugun gwoso ŋuto lo gwon i mukök na kilo Saresi; ma ’di nagon nan ko mugun nio ’bayin i mukök na kilo Saresi. Nan koŋdya ’sona anyen nan boŋo löpukuŋdyö lepeŋat lo gwon i mukok na kilo Saresi.

²¹ Ko nan ’dek löpukuŋdyö lwaka logon ’bayin i Saresi ti Mose kulo, a nan koŋdi mugun gwoso nan ’bayin i kilo Saresi, ti gwon adi nan ’bayin gwon i saresi ti Ŋun, kogwon nan ’diri gwon i mukök na saresi ti Kristo.

²² Ko nan ’dek löpukuŋdyö ŋuto lomunyak, a nan köti koŋdi mugun a lomunyan. Nan a wora a po liŋ a lo ŋuto liŋ; nan kita i kikolin liŋ anyen nan böŋö lwöggu kulye kase.

²³ Nan koŋdya kine ŋo liŋ kogwon kulya ti Loŋe Lo ’but, anyen nan böŋö paruŋdya nye.

²⁴ Ta deden adi i ŋuto lo wökön i biryeesi kulo se liŋ wöwökön, ama ŋuro geleŋ lo wuju ’doket, ’bayin sona le? Nyena wöwökine ta anyen ta böŋö wuju ’doket.

²⁵ ŋuto liŋ logon mömöŋu i biryeesi kilo teteŋgu ’börik i ŋo liŋ.Lepeŋat koŋdya ’börik sona anyen wuju ’doket nagon a Iŋguya logon a koroŋo logon mo riripön lo, ama yi kulo teŋgu ’börik anyen wuju Iŋguya logon ti ripön kwoŋ.

²⁶ Nyenagon nan lo wöwökön ’bayin i jöjöŋgu. Nan gwoso kajokanit logon ti ’yako ’yu;

²⁷ nan jogga mugun nio anyen gwon a ’dupiet nio, anyen i mukök nagon nan a tokukiŋdyö kulye ŋuto Loŋe Lo ’but nu, an Ŋun ko paju nan adi nan a ko kek.