Tushimpi 9 - Baibo Busansulushi Bwa Libuku Ili

Busongo abuluya

¹ Busongo bwakayaka ŋanda ya mbubo akubesa macinko a njiyo ali osanwe aobilo.

² Bwakacaya nyama, bwasenkanya waini akubamba kabotu patebulu.

³ Mpeeke bwakatuma basebenshi ba mbubo banakashi ayi baye peculu lya musena wiindaawo kulaampa mundabala inene akutamba bantu.

⁴ Bwakaamba ayi, “Kamwisa noonse nomutacite maano.” Ee, kubaluya bwakaamba ayi,

⁵ “Kamwisa mulye shakulya shangu akunwa waini uyo ngondakasenkanya.

⁶ Amuleke nshila shanu shakubula maano ayi mube abuumi. Amweendele munshila ya maano akunyumfwisha shintu.

⁷ “Uyo woonse ululika muntu shikucelebula, ulalitukanishabo mwiine. Awooyo ukalalila mucita shibi ulalicobweshabo mwiine.

⁸ Utakalalili shikucelebula ceebo inga wakupatabo. Kalalila musongo, lakwe ulaakukusuna.

⁹ Kopa milasho musongo, lyalo busongo bwakwe bulafulilaako. Koyiisha muntu ululeme, lyalo lushibo lwakwe lulafulilaako.

¹⁰ “Kuloonda Mwaami Lesa ngomatalikilo a busongo, kwishiba Wooyo Usalalite nkokuba amaano akunyumfwisha shintu.

¹¹ Nshiku shako shilaakufula kwiinda muli ndime ayalo myaaka ilaakunungwaako kubuumi bwako.

¹² Na webo uli musongo, ndushinisho busongo bwako bulaakukulambula. Ono na kooli shikucelebula, webo omwiine ndiwe weshi ukapengeleemo.”

¹³ Mwanakashi muluya ngwa pamulomo abuumbi, taalilemeki alimwi taacitewo maano.

¹⁴ Ulekala pamulyango wa ŋanda yakwe, ee, ulekala pacuuna pamusena wiindaawo kulaampa mundabala inene.

¹⁵ Uleeta baabo batokwiindila pafwaafwi a nguwe, abo basukemebo kucita sheesho nshebeendela beene.

¹⁶ Ulabaambila ayi, “Kamwisa noonse nomutacite maano.” Ee, kubaluya ulaamba ayi,

¹⁷ “Maanshi akwiipa ngamise, cakulya cakulita mubushishi cilabota abuumbi!”

¹⁸ Sombi abo beetwa tabeshi ayi boonse baya kuŋanda yakwe balafwa. Tabeshiiwo ayi boonse bakenjilawo kale muŋanda yakwe, bali panshi mumusena wa bafu.