Tushimpi 8 - Baibo Busansulushi Bwa Libuku Ili

Kulumbaisha busongo

¹ Sa te busongo buleeta? Sa te maano akunyumfwisha shintu aloolobesha?

² Busongo buleemikana munshaanshila peculu lya tulundu alimwi buleemikana apakumanina nshila.

³ Buloolobesha pafwaafwi aminjililo ya mundabala inene, ncakwiila koolobesha kumilyango ayi,

⁴ “Ntokwiita ndimwe nobantu. Ntokoloobeshesha muntu uli woonse.

⁵ Mwebo nobaluya, amube atulango, ee, amube amaano akunyumfwisha shintu.

⁶ Amukutike ceebo ntoyanda kumwaambila makani amaano. Nebo shoonse nsheemwaambila shililuleme.

⁷ Nebo ndaambabo shalushinisho mukwiinga bubeshi ndibupatite abuumbi.

⁸ Shoonse shiswa mumulomo wangu shililuleme. Nshaambiwo shamampya nabi shilubya bantu, sobwe.

⁹ Kubaabo bacite maano akunyumfwisha shintu, shintu shoonse shililuleme. Ncakwiila tashicitewo kampenda kubaabo bacite lushibo.

¹⁰ Kukonkela milasho yangu akwiinde kuba asilifa. Kuba amaano akunyumfwisha shintu akwiinde kuba agolodi wiine wiine.

¹¹ “Nebo nebusongo nsheeleneewo amabwe amakwebo eetwa ayi lubi. Taakuuwo nabi comwi nceenga wasunisha ceenga ceenda ndime.

¹² Nebo ndekala pantu pomwi atulango. Ndime ncite lushibo alimwi ndime nshiba sheelete.

¹³ Kuloonda Mwaami Lesa nkupata bubi. Nebo ndipatite kulisumpula, kulyuuma mucaamba, mibo ibiibi akwaamba shintu shitaluleme.

¹⁴ Ndapa maano bantu akupansaanya bubi abubotu. Ndicite maano akunyumfwisha shintu alimwi ndi muyumu.

¹⁵ Ndacafwa bamaami kweendelesha. Ndacafwa baleli kupanga milawo ibotu.

¹⁶ Muleli woonse pacishi ca panshi uleendelesha kwiinda muli ndime. Abalo bacinenenene abamaloba balalela kwiinda muli ndime.

¹⁷ Nebo nebusongo ndisuni bantu abo bansuni. Abo boonse banyandoola cankusu, balancana.

¹⁸ Ndime nengesha bantu kubila akuba abulemu. Ee, ndime mbalengesha kuba abuboni akuswitilila.

¹⁹ Shisepo shangu nshibotu kwiinda golodi wiine wiine, Shishalwa muli ndime nshibotu kwiinda silifa wiine wiine.

²⁰ Ndakonkela nshila shiluleme, nshipambuki munshila shakoombolosha kululeme.

²¹ Ndaya bupa bubile kuli baabo bansuni akuya bususha maanda akusungilamo buboni.

²² “Nebo nebusongo ndakalinga aMwaami Lesa kumatalikilo. Ndakalinga anguwe kaatana kutalika kucita milimo yakwe imwi yoonse.

²³ Ndakalingaako kumatalikilo kwiine, cishi ca panshi kacitana kulengwa.

²⁴ Ndakashalwa lweenge kalutana kubaawo, ee, tuntupu twa maanshi katutana kubaawo.

²⁵ Ndakalingaako tulundu tunene katuna kulengwa, ee, nabi tulundu tuniini katutana kubikwa mumisena ya ntuto.

²⁶ Ncakwiila ndakalingaako Lesa kaatana kulenga cishi ca panshi, luundu lwa ncico nabi tubulongo natuceyi mucishi cino.

²⁷ Nebo ndakalingaako ndyaakabika liculu mumusena wa ndilyo, ee, ndyaakatala manyinsa a ndilyo peculu lya lweenge.

²⁸ Ndakalingaako ndyaakabika makumbi mwiculu alimwi andyaakabika tuntupu kabotu kabotu twa mulweenge.

²⁹ Ndakalingaako ndyaakabika manyinsa a lweenge akukasha maanshi kwiindilila manyinsa akwe. Ndakalingaako ndyaakapanga lwiimbi lwa cishi ca panshi.

³⁰ Ciindi ico ndakalinga kwikala anguwe mbuli mwaana muniini. Bushiku abushiku ndakalinga kumulengesha kusangalala anebo ndakalinga kusangalete pameenso akwe.

³¹ Ndakalinga kukondetwe acishi cakwe coonse, alimwi ndakalinga kusangalete ceebo ca bantu.

³² “Ono nobana bangu, amunkutike, balicite coolwe abo bakonkela nshila shangu.

³³ Amukutike milasho yangu njeentoomupa. Amube basongo mukutasuula milasho iyo.

³⁴ Ulicite coolwe muntu uyo unyumfwila, muntu uyo ulindilila paminjililo yangu nshiiku shoonse, ee, ulindilila pamilyango iya muŋanda yangu.

³⁵ Aboobo uyo woonse ucana ndime, ulacana buumi, Mwaami Lesa alakwe ulaakumupa shoolwe.

³⁶ Sombi uyo woonse utancaani, ulaliletela mapensho. Ncakwiila uyo woonse umpatite, ingayi ulisuni lufu.”