Tushimpi 6 - Baibo Busansulushi Bwa Libuku Ili

Kucenjesha akumwi

¹ Omwanaangu, sa wakashomesha kulipilila umwi muntu nkongole yakwe? Sa wakalumbila kucita camushobo uyo?

² Sa maswi ngowakaamba aba koose kuli ndiwe? Sa waangwa kukushomesha kwako omwiine?

³ Ono omwanaangu ubo ingayi uli mumaansa ashikamukobonyoko. Anu mbooelete kucita kwaamba ayi waanguluke mbulya. Fwambaana uye kuli nguwe ukaliboombye akumukombelela ayi akwaangulule.

⁴ Utalisuminishi kwaamba ayi woone, ee, kutalisuminisha kwikala ayi ookeshe.

⁵ Supuka bweenka busupuka nsefu mumwaando wa mupalu nabi mbuli muyuni mbwaaswa mukoose ka shikuteya.

⁶ Webo omutolo, bona tulongolo, bonesha mbotwikala ubwesewo busongo.

⁷ Twalo tatucite mutanjilili, tatucite mweendeleshi nabi muleli.

⁸ Sombi tulabambila limwi shakulya cilimo ee, kushibunganya paciindi cakutebula.

⁹ Webo omutolo, nciindi cilaamfu buyani koolete? Anu utoobuka lili kuswa mutulo twako?

¹⁰ Mutolo ulaamba ayi, “Taanguna ngoneeko paniini, ee, amuleke nshinshileeko paniini. Taanguna ntule maansaangu akookesha.”

¹¹ Sombi bukandu bulamupolela muciindi ceenka ico mbuli mwiipi, ee, bupenshi bulamulwana anga ngushilumamba.

¹² Bantu bataaku mbobabete batanyumfwi balaya bweendeenda kuya bubeca.

¹³ Bantu aba mbeshikukamina kumeenso mbeshikulilyatila kumyeendo alimwi mbeshikwaambisha kuminwe ayi babece bamwi.

¹⁴ Balayeeya bubi mubumpele bwabo nkokwaamba ayi balo mbeshikubalamuna makatasho ciindi coonse.

¹⁵ Aboobo balo mapensho alaakubapulumukilabo akubanyonyoola cakwaamba ayi kulaakubula aubafuna.

¹⁶ Kuli shintu shosanwe acomwi Mwaami Lesa nshaapatite nabibo shosanwe ashobilo isho shimufundoosha kumoyo.

¹⁷ Meenso acimeko, mulomo ubeca, Maansa atila bulowa bwa bantu batacite mulandu,

¹⁸ tulango tupanga miyeeyo ya bubi, myeendo iyo icicila kuya mukucita shibiibi,

¹⁹ kamboni mubeshi alimwi amuntu shikuleta lupato pakati ka baabo banyumfwana.

Kucenjesha pamakani a bulale

²⁰ Omwanaangu, kokutika shitookufunda baiso, akutanyansha shitokwiisha banyoko.

²¹ Ushilaame mumoyo wako ciindi coonse akushifwala lyoonse mbuli bulungu bwa munshingo.

²² Waakunooya bweenda, shilaakukutanjilila. Na woona mashiku, shilaakukufuna. Na wabuuka, shilaakukupandako maano.

²³ Shitookufunda baiso, ndilampi. Shitookwiisha banyoko, ngumumuni, akwalo kululamika kwabo, ndwiiyo lwa buumi.

²⁴ Shilakonsha kukukasha kuya kubanakashi babiibi, ee, kukukasha kumuka mwiine waamba maswi ayungoola basankwa.

²⁵ Utakumbwili mumoyo mbwaaimfwi alimwi meenso akwe ayungoola atakutoleli moyo.

²⁶ Ceebo mufuule ulakonsha kumubwesabo kushinkwa womwi, sombi shibulale ulaakutola buumi bwako boonse.

²⁷ Sa muntu inga wanyamwita mulilo pacaamba cakwe kwakubula kutenta shakufwala shakwe?

²⁸ Sa muntu inga weenda pamakalangasha a mulilo kwakubula kupyawo mukati mushimpanta?

²⁹ Mbweeke ubo mbocibete akumuntu ukumana amuka mubye. Uyo woonse ucita camushobo uyo ulaakupengelaamo.

³⁰ Bantu tabasebaanyi mwiipi na weepa ceebo ca nsala.

³¹ Nakubi boobo na wacatwa, ulalipilishikwa ico ncaaipa kucifusha mankanda osanwe aobilo, nabi cilaamba ayi nkulipila buboni boonse bwa muŋanda yakwe.

³² Ono muntu ucita bulale taacitewo maano mukwiinga uyo ulalinyonyoolabo mwiine.

³³ Ulaakuumwa akusebaanishikwa alimwi nsoni shakwe teshi shikamaneewo.

³⁴ Busuba bulasonkomona bukali bwa ibaye, aboobo taafwiwo nkumbu pakuboosha cishole.

³⁵ Teshi akasumineewo kulipilwa nakaceyi alimwi ulakaka kupekwa makulo nabi afule buyani.