Tushimpi 4 - Baibo Busansulushi Bwa Libuku Ili

Mpindu icanwa mubusongo

¹ Nobana bangu, kamukutika shitoomufunda baishiwanu amuteye matwi akucana maano akunyumfwisha shintu.

² Shintu nsheentoomwiisha, nshibotu abuumbi, aboobo mutashisoweeli, napaceyi.

³ Nebo kaancili mwaana muniini muŋanda muli bata, kaandibo mwanike alimwi kaandibo neenka nemwaana,

⁴ bata bakalinga kunjiisha akunoondwiita ayi, “Ulame maswi ngoontookwaambila amoyo wako woonse. Koshikonkela nsheenkwaambila, ingaawo ukabe abuumi.

⁵ Ba abusongo alimwi ube amaano akunyumfwisha shintu. Kuteelesha kuluba maswi angu nabi kwaasuula napaceyi.

⁶ Kutafutatila busongo, lyalo abwalo bulaakukutabilila. Ubusuune abwalo ndyeshi bukanookulama kabotu.

⁷ Busongo ncecintu ciindaawo pashintu shoonse, aboobo ulyeelete kuba abusongo. Pashintu shoonse isho nsheenga wabaasho, ulyeelete kwiilikaawo amaano akunyumfwisha shintu.

⁸ Suna busongo, abwalo bulaakukusumpula. Bukakatile, lyalo bulaakukuletela bulemu.

⁹ Bulaakukufwalika ngala ibotu abuumbi pamutwi wako akukupa mushini wa bulemu.”

¹⁰ Omwanaangu, kokutika nsheentookwaambila akushikonkela. Lyalo myaaka ya buumi bwako ilaakufula abuumbi.

¹¹ Ndakutanjilila munshila sha busongo akukwiisha nshila shiluleme shakwikalilamo.

¹² Waakunooya bweenda munshila, taaku ceshi cikakushinkilishe apakunooya bucica teshi ukalisuntulewo, sobwe.

¹³ Uyumininebo kwiisha, kutakufutatila, sombi ukakulaame kabotu ceebo mbobuumi bwako.

¹⁴ Utakeeleshi kukonkela bucita bantu babiibi alimwi kuteenda munshila sha bamucita shibi.

¹⁵ Shisoonoke, uteendi muli nshisho, usweeko, akululamabo nshila yako.

¹⁶ Ceebo bantu aba tabooni kabatana kucitawo cintu cibiibi. Balo balaba acilabila na tabana kucisawo muntu.

¹⁷ Balo kucita shibiibi cilibo anga nkulya shinkwa akwalo kucita shintu shalunkutwe kulibo anga nkunwa waini.

¹⁸ Nshila ya baluleme ili anga ngumumuni wa kumuyamaca uyo uya ciindaawo kutuba kushikila lisuba lyaswa.

¹⁹ Sombi nshila ya bamucita shibi ili anga ngumunshinshe ushiya mbi cakwaamba ayi tabashibi anshebaya bulisuntulaako.

²⁰ Omwanaangu, teya kutwi kushintu nsheentokwaamba. Kutikisha kumaswi angu.

²¹ Kutaasuminisha ayi akushiiye, sombi waasuunge mumoyo wako.

²² Ceebo alo alapa buumi kuli baabo baacana akulengesha mubili wa muntu woonse kuyuma.

²³ Bunene bunene, ulame moyo wako ceebo nkokantupu ka buumi bwako.

²⁴ Kuteelesha kwaamba maswi abumpele alimwi kuteelesha kwaamba makani abubeshi.

²⁵ Meenso ako kaalangitebo kunembo, kutacebookacebooka, sobwe.

²⁶ Kotaanguna kuyeeya munshila mwiinda myeendo yako, lyalo ulaakunokweenda munshila shiluleme.

²⁷ Kuteelesha kupambookapambooka. Kasha myeendo yako kuya mukucita shibiibi.