Tushimpi 31 - Baibo Busansulushi Bwa Libuku Ili

Kufunda mwaami

¹ Aya ngamaswi a mwaami Lemwelo ayo banyina ngobakamwiisha.

² Bakamwaambila ayi, “Omwanaangu, mwaana wakushala nemwiine, ee, omwanaangu uyo ngondakapekwa kwiinda mukupaila.

³ Utanyonyooli nkusu shako shoonse kubanakashi alimwi utasoweeli maali ako kubaabo banyonyoola bamaami.

⁴ “Lemwelo, kunwa shilengesha kukolwa teshi cintu cibotu kubamaami. Kunwa waini teshi cintu cibotu kuli mbabo, ncakwiila teshi cintu cibotu baleli kuba anyotwa ya bwalwa.

⁵ Ceebo na banwa inga baluba milawo mboyaamba akusuula sheelete kupekwa baabo balyatililwa.

⁶ Bwalwa bupe baabo batooya kulufu, ee, waini upe baabo bali mubuumba.

⁷ Ubape banwe kwaamba ayi balube bukandu bwabo, ncakwiila kwaamba ayi bateebaluki lyobilo buumba bwabo.

⁸ “Koimikanina baabo batakoonshi kuliimikanina. Koambililako bakandu abo batacite beshikubacafwa pasheesho nshebeelete.

⁹ Kobaambililaako akoombolosha cakutanyengelela. Ee, kotabilila bakandu abapengete kwaamba ayi batanoolitwa masuku pamitwi.”

Mukamuntu ucite mibo ibotu

¹⁰ Nciyumu kucana mwanakashi ucite mibo ibotu. Mwanakashi weelete uleenda mabwe amakwebo eetwa ayi lubi.

¹¹ Ibaye ulamushoma amoyo wakwe woonse, alimwi taaku cibotu nceshi akabuleewo nabi comwi.

¹² Ulamucitila shibotu kuteshi shakumucisa kwanshiku sha buumi bwakwe boonse.

¹³ Ulasaloola booya abusalu buteshimite akusebensa cankusu alimwi camoyo womwi.

¹⁴ Ulaleta shakulya kuswa kumisena ya kulaale anga ngamaato abeshimakwebo.

¹⁵ Ulabuka macuunsacuunsa, ulabambila bamuŋanda yakwe shakulya akupa ncito basebenshi bakwe banakashi.

¹⁶ Ulayeeya muunda mboobete akuula, mumaali ngaacana ulashanga muunda wa minyansa.

¹⁷ Ngumwanakashi usebensa cankusu maansaakwe ngayumu kumilimo yakwe yoonse.

¹⁸ Ulabona kwaamba ayi makwebo akwe atooleta mpindu. Lilampi lyakwe talishimiki mashiku.

¹⁹ Busalu ulalipangila mwiine akupikula shakufwala shakwe.

²⁰ Ulafungulula lyaansa kubakandu, ncakwiila bapengete ulabacafwa.

²¹ Na kwaba caandwa lakwe taalisukamiiwo pabamuŋanda yakwe ceebo boonse balicite kale shakufwala shilemu.

²² Ulatunga manduumba a pabulo bwakwe alimwi ulafwala insalu shamakwebo shifubelafubela.

²³ Ibaye ulishibikitwe abuumbi kumwinjililo wa ndabala uko nkwaaya mukwikala pakati ka bacinenenene ba mundabala.

²⁴ Ulatunga shakufwala sha nsalu iteshimite akushuulisha. Uloolisha balamba kubeshimakwebo.

²⁵ Ngumwanakashi muyumu alimwi ulemekwa. Taalisukami ayi ciilo ndaakucita buyani.

²⁶ Lakwe ngumuntu waamba cabusongo alimwi ulapa milasho cakushomeka.

²⁷ Ngoobona bwikaalo bwa bamuŋanda yakwe alimwi taali shakulya shakutasebensela.

²⁸ Bana bakwe balamulumbaisha, alakwe ibaye ulamulumbaisha ayi,

²⁹ “Ee, mbaanji banakashi bacita shintu shibotu, sombi webo ulabeendaawo boonse.”

³⁰ Kacawa kalacenjeeka akwalo kuboneka kabotu kulamana sombi mwanakashi ulemeka Mwaami Lesa ulyeelete kulumbaishikwa.

³¹ Aapekwe cilambu ceelete pamilimo yakwe. Ncakwiila milimo yakwe aimuletele kulumbaishikwa kumwinjililo wandabala inene.