Tushimpi 30 - Baibo Busansulushi Bwa Libuku Ili

MASWI AKWE AGULI

¹ Ngaaya maswi akwe Aguli mwanaakwe Jake wa kuMasa. Aguli wakalwiitako Itiyelo. Itiyelo aUkalu wakabalwiita ayi,

² “Ncakwiila ndi muluya weeleleshako kubaluya boonse. Nshiciteewo kalango kacite bantuma, sobwe.

³ Nshikwe kwiiyawo busongo, nabi kubaawo alushibo pali Wooyo Usalalite.

⁴ Ngani wakayaawo kale kwiculu alimwi waseluka? Ngani wakacatawo kale muuwo mumapakaakwe? Ngani wakafungilishawo kale maanshi mucakufwala cakwe capeculu? Ngani wakapima mweelete kweela cishi? Ngani ushi liina lyakwe aliina lya mwanaakwe? Amundwiite na mulicite lushibo!

⁵ “Maswi a Mwaami Lesa oonse ngalushinisho. Lakwe ndyeliyawo lya baabo bacicila kuli nguwe.

⁶ Utanungiiko kumaswi ngweenga waamba. Na wacita boobo inga wakukalalila akutondesha ayi uli mubeshi.”

TUSHIMPI TUMWI

⁷ “NoBaami baLesa, kuli shintu shobilo nsheentoosenga kuli ndimwe. Mutanjimi shintu isho kaantana kufwa.

⁸ Amutalamushe kubeca kuswa kuli ndime. Mutanengeshi kuba mukandu nabi kuba mubile, sombi mumpebo cakulya cangu ca nshiku shoonse.

⁹ Ceebo na ndaba ashiinji inga ndamuluba akwaamba ayi, ‘Anu Mwaami Lesa ngani?’ Sombi na ndaba mukandu inga ndeepa akusebaanya liina lyanu nobaLesa bangu.

¹⁰ “Utabekeshi musebenshi kumwaami wakwe ceebo ulaakukushingana akukupa mulandu.

¹¹ “Kuli bantu bashingana bamaishiwabo alimwi batatondeshi kulumba kubamanyinawabo.

¹² “Kuli bantu balibona ayi balisalalite, sombi tabasalaliteewo, napaceyi.

¹³ “Kuli bantu balisumpula, ee, abo balanga babyaabo cakunaama.

¹⁴ Kuli bantu bacite meeno ali anga njimipeeni, ee, balicite micendwa ili anga nshibeshi kwaamba ayi balye akumana bakandu pacishi ca panshi, ncakwiila kwaamba ayi balobye bapenshi boonse pakati ka bantu.

¹⁵ “Munshuundu ulicite baana banakashi bobilo. Balo balalilabo ayi, ‘Leta, leta!’ “Kuli shintu shotatwe shitakuti nabibo shone shitaambi ayi, ‘Mbubo.’

¹⁶ Shintu isho ncuumbwe, ŋumba, inshi iyumu itoolila mfula, amulilo uya cinyakabo cakutashimika.

¹⁷ “Muntu ucelebula baishi akunyansha banyina, meenso akwe alaakulobolwaamo kubacikwangala bamucinyika alimwi ulaakulikwa kumakubi.

¹⁸ “Kuli shintu shotatwe shinkankamika abuumbi, nabibo shone nsheentanyumfwishi.

¹⁹ Shintu isho nkuuluka kwa nkwashi mwiculu, kweenda kwa nsoka pamwaandami, kweenda kwa bwaato palweenge amusankwa mbwaasuna mwanakashi.

²⁰ “Mwanakashi mufuule ulacita bobulya. Ulacita bulale, amanisha wasamba akwaamba ayi, ‘Taaku cibiibi ncendacita.’

²¹ “Kuli shintu shotatwe cishi ca panshi ncecitutuma nabibo shone shitakoonshi kucitika pali ncico.

²² Shintu isho ngumusebenshi kuba mwaami, muntu muluya kuba ashakulya shiinji,

²³ mwanakashi weebwa sombi musankwa kaatamusuniiwo alimwi amusebenshi mwanakashi ubwesa musena wa mwaami wakwe mwanakashi.

²⁴ “Kuli shilengwa shone mucishi shiniini sombi shilicenjete abuumbi.

²⁵ Tulongolo ntulengwa tutacite nkusu, sombi tulabunjika shakulya sha ntuto cilimo.

²⁶ Bacibila ntunyama tucite nkusu shiniini, sombi tulapanga mwakoona mumyaandami.

²⁷ Cisoshi tacicite mwaami, sombi cileenda anga ndikoto lya bashilumamba.

²⁸ Naantombeleka ulakonsha kucatikwabo alyaansa, sombi ulacanika mumaanda abwaami.

²⁹ “Kuli shintu shotatwe shikondelesha kweenda, nabibo shone sheenda cakantingeelile.

³⁰ Shintu isho ninkalamu icite nkusu kwiinda banyama boonse alimwi teeloondi cintu cili coonse,

³¹ Kombwe weenda cakulinyumfwa, peepe alimwi amwaami ushingulukitwe alikoto lya bashilumamba bakwe.

³² “Na walinga waba muluya akutalika kulisumpula, nabi na walinga watalika kupanga miyeeyo ya bubi cileke akulicata pamulomo, uyeeye kabotu.

³³ Ono bweenka kusuwa mukupa mbokulengesha bwaanda kwisa peculu, akwalo kuuma panshono mbokulengesha bulowa kuswa, mbweeke ubo kusonkomona bukali mbokuleta kwaambana.”