Tushimpi 3 - Baibo Busansulushi Bwa Libuku Ili

Kupanda maano bacikula bwangu basankwa

¹ Omwanaangu utanoolubaako nsheenkwiisha. Kolama milawo yangu mumoyo wako.

² Kwiisha kwangu kulaakukulengesha kwikala buumi bulaamfu abuumbi alimwi kulaakukulengesha kuswitilila mushintu shoonse.

³ Utakasuminishi lusuno akushomeka kwaamba ayi shikushiiye. Ulyeelete kushifwala lyoonse anga mbulungu bwa munshingo, ncakwiila ulyeelete kushilemba mumoyo wako.

⁴ Lyalo Lesa abantu balaakusangalala pali ndiwe alimwi ulaakuba ampuuwo ibotu.

⁵ Cinka manungo muMwaami Lesa amoyo wako woonse. Kutacinka manungo mumaano ako akunyumfwisha shintu.

⁶ Koyeeya Lesa mumilimo yako yoonse alakwe ndyeshi akakululamikile nshila shako.

⁷ Kuteelesha kuliyeeyela ayi ulicite busongo, sombi koloonda Mwaami Lesa akutalamuka kushibiibi.

⁸ Ici cilaakulengesha mubili wako ayi unooli uyumu lyoonse akulengesha shifuwa shako kushimpa.

⁹ Lemeka Mwaami Lesa abuboni bwako boonse ansoomo sha shisepo sha mumuunda wako.

¹⁰ Na wacita boobo ulaakucana kwaamba ayi matala ako esula apamilomo awalo waini ulaakunootikeekabo, kubula amwakuubika.

¹¹ Omwanaangu, utanyanshi kululamika kwa Mwaami Lesa, nabi kuba amfundilishi mumoyo na kaakukalalila.

¹² Ceebo Mwaami Lesa ulalulamika muntu woonse ngwaasuni, bweenka mushali musankwa mbwaalulika mwanaakwe uyo umusangalasha.

¹³ Ulicite coolwe muntu uyo ucana busongo ee, muntu uba amaano akunyumfwisha shintu.

¹⁴ Ceebo mubusongo muli mpindu kwiinda amusilifa. Ndushinisho muli mpindu isotoka apagolodi.

¹⁵ Ncakwiila mbubotu kwiinda mabwe amakwebo eetwa ayi lubi alimwi taakuuwo cintu nabi comwi ncoosunishi nceenga ceelana ambubo.

¹⁶ Busongo inga bwakulengesha kuba abuumi bulaamfu, ncakwiila inga bwakulengesha kubila akuba abulemu.

¹⁷ Nshila sha busongo ninshila shisangalasha alimwi ninshila shitola kuluumuno.

¹⁸ Busongo buli anga cisamu cipa buumi kubaabo babukakatila alimwi bulapa coolwe kubantu babucatisha.

¹⁹ Mwaami Lesa wakalenga cishi kwiinda mubusongo bwakwe akubika liculu mumusena wa ndilyo kwiinda mumaano akwe akunyumfwisha shintu.

²⁰ Kwiinda mulushibo lwakwe wakapansaanya maanshi alaamfu akulengesha makumbi kulosha mfula.

²¹ Omwanaangu kakatila kubusongo amaano akunyumfwisha shintu, utashisuminishi kwaamba ayi shikushiiye.

²² Ceebo shalo nsheshi shikakupe buumi busangalasha bweenka mbuli bulungu mbobubotesha nshingo.

²³ Lyalo ulaakunokweenda kwakubula cakulisukama, ncakwiila ulaakunokweenda cakubula kulisuntula napaceyi.

²⁴ Ulaakunooya mukoona kwakubula cakuloonda, ee, ulaakunoolyonenabo cakusutulako amutwi.

²⁵ Webo teshi ukanooloondawo mapensho esa cakuteengashila nabi kunyonyoolwa uko kupolela bamucita shibi anga ncipuupu cinene.

²⁶ Ceebo lushomo lwako lulaakuba muMwaami Lesa, aboobo ulaakukufuna ayi utacatwi mutoose twabo.

²⁷ Utakaki kucitila bamwi bantu shintu shibotu nshebeelete kucitilwa. Utakaki kubacafwa na webo kookonsha kubacafwa.

²⁸ Kutaambila mubyo ayi, “Koyabo ukese ciilo ndyeshi nkakupe,” na ulakonsha kumucafwa peenka apo.

²⁹ Utayeeyi kucitila mubyo cintu nceenga camucisa mukwiinga ulekala pafwaafwi awebo alimwi ulakushoma.

³⁰ Kutabekesha mubyo utacite mulandu, muntu uyo utana kukubishishaawo napaceyi.

³¹ Utakumbwi nshila sha muntu shilunkutwe nabi kukonkela mibo yakwe.

³² Ceebo Mwaami Lesa ulipatite muntu utaluleme, sombi balo baluleme ulanyumfwanaabo.

³³ Mwaami Lesa ulashingana ba muŋanda ya bamucita shibi sombi ulapa coolwe bamuŋanda ya baluleme.

³⁴ Ncakwiila ulaweluluka bantu balisumpula, sombi ulapa luse kubaabo baliceesha.

³⁵ Basongo balaakulemekwa, sombi baluya balo ulaakubalensha nsoni.