Tushimpi 29 - Baibo Busansulushi Bwa Libuku Ili

¹ Muntu utolelela kuba shincimpamya pesule lyakululikwa mankanda aanji aanji, ulaakunyonyoolwa cakuteengashila alimwi cakutashilikikwaawo.

² Na baluleme balela bantu boonse balasangalala, sombi na bamucita shibi balela bantu balatongooka.

³ Mwaana musongo ulasangalasha baishi, sombi unyumfwana abafuule ulanyonyoolabo buboni bwakwe.

⁴ Kwiinda mukoombolosha kululeme, mwaami ulalengesha cishi cakwe kushimpa, sombi uyo usuni bunene makulo, ulacimwaya.

⁵ Uyo utondesha mubye lusuno lwakubeca ulaliteya koose mwiine.

⁶ Mucita shibi ulacatwa mushibiibi shakwe mwiine, sombi ululeme uleembabo akusangalala.

⁷ Ululeme ulishi bweelete kucitilwa bakandu, sombi mucita shibi lakwe taababikiko maano.

⁸ Beshikucelebula balabusha shimfulunganya mundabala, sombi basongo balatontosha bukali.

⁹ Na musongo watolana kunkuta amuluya, muluya uyo ulakalookabo akucobola, aboobo takubi luumuno.

¹⁰ Bacayi balipatite muntu ushomeka, ncakwiila balisuni kucaya baluleme.

¹¹ Muluya ulatondesha bukali bwakwe boonse, sombi musongo lakwe ulalicata na wakalala.

¹² Na muleli wanyumfwila makani abubeshi, bacinenenene bakwe boonse balaba bamucita shibi.

¹³ Mukandu ashikumulyatilila balicite cintu comwi mpobeelanina. Mwaami Lesa ngoobalengesha kubona boonse bobilo.

¹⁴ Na mwaami kaaombolosha bweelete milandu ya bakandu, ncakwiila ulaakweendelesha ciindi cilaamfu.

¹⁵ Musako wakululikishako mwaana, ulamupa busongo, sombi mwaana ulya ulangwabo ulalensha banyina nsoni.

¹⁶ Na bamucita shibi bafula, ashalo shibiibi shilafula, sombi baluleme balaakubabona kabanyonyoka.

¹⁷ Lulika mwanaako musankwa ndyeshi akacileke kukupensha, lyalo ulaakukulengesha kusangalala.

¹⁸ Kutaaku maswi abulaluki bantu balacileka kulilemeka, sombi ulicite coolwe uyo ukonkela milawo.

¹⁹ Musebenshi taakoonshi kunyumfwa kumwaambilabo, sobwe. Nabi wanyumfwa nshewamwaambila, teshi akashikonkeleewo.

²⁰ Muntu wiingana kwaamba ngumuluya kwiinda muluya wiinda pabaluya boonse.

²¹ Na muntu wayolosha musebenshi wakwe kuswa kumatalikilo, kumeelelesho ulaakupyana buboni bwakwe boonse.

²² Muntu mukali ulalengesha kwaambana, ucite kamoyo kaniini ulacita shibiibi shiinji.

²³ Kulisumpula kulalengesha muntu kuwa, sombi kulibombya kulaleta bulemu.

²⁴ Muntu ucafwa mwiipi ulalicaisha kashanga. Na waamba lushinisho kunkuta ulapekwa mulandu, na washisa, Lesa ulaakumushingana.

²⁵ Kuloonda muntu kuli anga nkoose, anu kubula cakulisukama nkucinkabo manungo muMwaami Lesa.

²⁶ Baanji balisuni ayi muleli abanyumfwile nkumbu, sombi koombolosha kululeme kulaswabo kuMwaami Lesa.

²⁷ Baluleme balipatite bantu batashomeki, abalo bamucita shibi balipatite bantu baluleme.