Tushimpi 28 - Baibo Busansulushi Bwa Libuku Ili

¹ Bamucita shibi balacicabo nabi taakuuwo abatoobatandaanya, sombi baluleme mbayumu myoyo bweenka mbuli nkalamu.

² Na cishi kacicite baashu cilaba abaleli baanji, sombi muntu ucite maano akunyumfwisha shintu alushibo ulalelabo caluumuno.

³ Muleli ulyatilila bakandu ulibo anga nimfula yamuuwo iwisha shishango.

⁴ Abo batakonkeli milawo, bali kulubasu lwa bamucita shibi. Sombi abo beekonkela tababete kulubasu lwabo.

⁵ Bamucita shibi tabanyumfwishi koombolosha kululeme, sombi abo balemeka Mwaami Lesa balaakunyumfwisha kabotu kabotu.

⁶ Muntu mukandu ushomeka ngumubotu kwiinda mubile utashomeki.

⁷ Mwaana ukonkela milawo ulicite maano akunyumfwisha shintu, sombi uyo unyumfwana abalyabi ulalensha nsoni baishi.

⁸ Uyo ubilila mukukomenya mweelo wa cinyona mucila pankongole nshaapa, ulabikilabo babye abo bafwita nkumbu bakandu.

⁹ Na muntu kaasuula milawo nabi mupailo wakwe ulalensha bunya kuli Lesa.

¹⁰ Uyo woonse utanjilila kuya munshila ya bubi, ncakwiila ulaakucatwa mukoose kakwe mwiine. Sombi baluleme balaakupekwa shilambu sheelete.

¹¹ Mubile ulalibona kucenjela mwiine, sombi mukandu ucite maano akunyumfwisha shintu ulamwishiba mbwaabete.

¹² Na baluleme bakoma kulaba kusekelela kunene, sombi na mucita shibi wabwesa bweendeleshi bantu balaya mukuyuba.

¹³ Uyo ushisa shibiibi shakwe tabiiwo acoolwe, sombi uyo ulyaambilila shibiibi shakwe akushileka, ulaakulekelelwa.

¹⁴ Ulicite coolwe muntu ulemeka Mwaami Lesa lyoonse, sombi uyo uyumya moyo ulalokela mumapensho.

¹⁵ Bweenka bubuluma nkalamu nabi bukalala suntwe munene, mbweeke ubo amuleli upensha bakandu mbwaabete.

¹⁶ Muleli utacite maano ulalela bantu calunkutwe, sombi uyo upatite bubile bwakucanina munshila shibiibi ulaakukala buumi bulaamfu.

¹⁷ Muntu uyo upenshekwa aceebo cakutila bulowa bwa umwi ulaakunoocicacicabo kushikila akafwe, kuteelesha kumufuna.

¹⁸ Uyo weendabo kwakubula kampenda ulaakupulushikwa, sombi uyo weenda munshila shipilingene ulaakuwita mucilindi cakuteengashila.

¹⁹ Mulimi ulima cankusu ulatebula shiinji, sombi abo basowa ciindi cabo kushintu shitacite ncito, ulaakuba mukandu.

²⁰ Muntu ushomeka ulaakupekwa coolwe cinene abuumbi, sombi uyo usuni kubila cakufwambaana, ulaakupekwa mulandu.

²¹ Ncibiibi kuba akasalulushi, sombi muntu ulakonsha kubisha ceebobo cakuyanda kucana kakulya nakaceyi.

²² Muntu mwiinyu ulisunibo kubila cakufwambaana, sombi teeshi kwaamba ayi bukandu bulibo muliimfwa.

²³ Uyo ukalalila mubye ulaakusunwa kumeelelesho, kwiinda muntu ubonesha lusuno lwakubeca.

²⁴ Uyo upamba baishi abanyina akwaamba ayi “Taaku mbocibete,” ulyeelenebo amuntu shikunyonyoola shintu.

²⁵ Muntu mulyabi ngushikubalamuna nkondo, sombi uyo ucinkite manungo muMwaami Lesa ulaakuba acoolwe.

²⁶ Uyo ucinkite manungo muli nguwe mwiine, ngumuluya, sombi uyo weenda mubusongo, ulatabililwa.

²⁷ Uyo upako bakandu taaku nceshi akapenge, sombi uyo ushinshibata ababona, ulaakushinganwa ciine.

²⁸ Na bamucita shibi babwesa bweendeleshi, bantu balaya mukuyuba, sombi bamucita shibi na baloba, baluleme balafula alimwi.