Tushimpi 27 - Baibo Busansulushi Bwa Libuku Ili

¹ Mutalilumbaishi palwa ciilo, ceebo tamwishi ciilo mbweshi bukace.

² Akukulumbaishe umwi muntu kuteshi omwiine, ee, umbibo, kuteshi mulomo wako omwiine, sobwe.

³ Libwe ndilemu a museese ngumukuli unene, sombi shoonse ishi inga tasheelaniiwo akukalashikwa kumuluya.

⁴ Bukali mbubiibi, kukalala ca lushinga kulanyonyoola, sombi munyono walo uleendaawo kubica.

⁵ Ncibotu kukalalila muntu patuba kwiinda kumusuna lakwe kaatacishi.

⁶ Mubyo nabi wakucisa taaku mbocibetewo, sombi mulwani wako na wakufyonta, ucenjele!

⁷ Muntu na ulikutite ulakaka abuuci boonse, sombi lakwe ufwite nsala ashilula shoonse shilabota.

⁸ Muntu wasoweka kuswa kuŋanda yakwe, ulibo anga nkayuni kaluba kucinswa ca nkako.

⁹ Mafuta anunkila kabotu abweema bukondelesha shilasangalasha moyo wa muntu, mbweeke ubo mbocinyumfwika kupandwa maano kumuntu ngoosunenaankwe.

¹⁰ Utasuuli mubyo amubyaabo baiso alimwi na waba amapensho utanoocicila kumukwanu. Ncibotu kuya kuli shikamukobonyoko uli pafwaafwi kwiinda kuya kumukwanu uli kulaamfu.

¹¹ Omwanaangu ba musongo akusangalasha moyo wangu, lyalo ndaakwishiba bwakukumbula baabo bantongoola.

¹² Muntu ucenjete ulabona mapensho ali kunembo akwaayuba, sombi muluya ulaya mukulinjishamobo akupengelaamo.

¹³ Na muntu washomesha kulipilila mweensu nkongole, ulyeelete kucatilwa cakufwala capeculu. Ee, na washomesha kucita boobo kumuswamashi ngooelete akuseswa nkongole iyo.

¹⁴ Na waansha mubyo aliswi lya koolobesha macuunsacuunsa, kwaansha kwako kulaba anga utoomushingana.

¹⁵ Mwanakashi ubweka bunene uli anga nimfula ya muyoba.

¹⁶ Kumukasha kubweka nciyumubo anga nkushinkilila muuwo nabi kufumbata mafuta mumapakaako.

¹⁷ Bweenka ceela mbocinonwa kuceelanyina mbweeke ubo muntu mbwaapekwa maano kumuntunyina.

¹⁸ Uyo ubambila kabotu cisamu ca nkuyu ulaakulya shisepo sha ncico. Mbweeke ubo musebenshi ucitila kabotu mwaami wakwe ulaakupekwa bulemu.

¹⁹ Bweenka ciwa mbociboneka mumaanshi, mbweeke ubo moyo wa muntu mbootondesha mbwaabete.

²⁰ Lufu akunyonyoola tashikutiiwo, mbweeke ubo aalo meenso taakuti.

²¹ Silifa uleeleshelwa munongo inene pamulilo, mumunyumbi muleeleshelwa golodi, sombi moyo wa muntu uleeleshekwa ampuuwo ya bulemu bwakwe.

²² Muluya nabi mumutwe muncili, ee, kumutwa amwiinshi anga ngamaila, sombi buluya teshi bukasweewo muli nguwe.

²³ Ulyeelete kwishiba kabotu shifubwa shako mboshibete, ncakwiila ulyeelete kubika maano kumatanga ako.

²⁴ Ceebo buboni teshi bwaciindi coonse, nabi mushini tookalilili kwa mashalane oonse.

²⁵ Na mwacesa bwiisu bwakusanina shifubwa, mweemfu ulasonsa. Kaucisonsa, bwiisu bwa mutulundu bulaceswa.

²⁶ Lyalo bana ba mbelele balaakumupa booya bwa shakufwala ashalo mpongo shilaakumuletela maali akuula muunda.

²⁷ Mpongo shilaakumupa mukupa uunji wakukwana kulisha ndiwe, bamuŋanda yako alimwi abasebenshi bako banakashi.