Tushimpi 25 - Baibo Busansulushi Bwa Libuku Ili

Tushimpi atumwi twakwe Solomoni

¹ Utu ntushimpi tumwi twakwe Solomoni twakalembulula basebenshi bakwe Esekiya mwaami wa cishi ca Juda.

² Mbulemu bwakwe Lesa kushisa makani, sombi mbulemu bwa bamaami kuyandoola makani ayo.

³ Bweenka kuya kwiculu mbokubete kulaamfu, ee, bweenka bulongolete inshi, mbweeke ubo mbotutakoonshi kwishiba miyeeyo ya bamaami.

⁴ Silifa ulyeelete kukushikwa matombe, kootana kusebenseshekwa kupanga cintu ciyandika.

⁵ Amukushe bacinenenene bacita shibiibi kunembo lya mwaami, lyalo bwaami bwakwe bulaakunokweendeleshekwa cabululami.

⁶ Utalisumpuli pameenso a mwaami, nabi kulibika pamusena wa ba peculu.

⁷ Ncibotu mwiine kukulwiita ayi, “Inda use ukalile kokuno,” kwiinda kwaamba ayi akulenshe nsoni pameenso a wacinenenene. Nshewabona ameenso ako

⁸ utafwambaani kushitola kunkuta ceebo taaku mbweenga wacita kumeelelesho na shimukobonyoko umwi wakushinina akukulensha nsoni.

⁹ Na wapusana ashikamukobonyoko, utayubululi makani ayo kumuntu umwi.

¹⁰ Ceebo bantu boonse inga beshiba ayi tookaliki makani mucaamba cako, lyalo mpuwo yako ibiibi teshi ikamaneewo, sobwe.

¹¹ Liswi lyeelete paciindi ceelete lilibo anga cisepo ca golodi cabikwa mucintu ca silifa.

¹² Kukalalila kwa musongo kumuntu usuni kunyumfwa, kuleenda masikiyo nabi cakulibotesha cimwi ca golodi wiine wiine.

¹³ Shinkombe ushomeka ulibo anga ngamaanshi atontola ciindi ca cilimo kuwooyo weenga wamutuma.

¹⁴ Muntu ushomesha kupa shipo isho nsheshi akabule kupa ncakwiila uli anga ngamakumbi amuuwo isho shitaleti mfula.

¹⁵ Kwiinda mukubula ncimwa mweendeleshi ulakonsha kutekeneshekwa. Ncakwiila mulaka ubombu ulakonsha kumana mapensho ali woonse.

¹⁶ Na wacana buuci ulyeeletebo kulya mboweelete ceebo na weendilisha inga waluuka.

¹⁷ Utanootampilabo kuya mukufwakasha kuŋanda ya mubyo, ceebo inga wakucimwa akukusuula.

¹⁸ Muntu upa bukamboni bwakubeca kumubye uli anga ninkoli, mupeeni nabi mufwi ukolete.

¹⁹ Kucinka manungo mumuntu utashomeki ciindi ca mapensho kuli anga nkutafunina kuliino litootenkaana nabi kweendela kumweendo ulema.

²⁰ Kwiimbila muntu uli mubuumba, kuli anga kufuula shakufwala bushiku bwa mpewo, nabi kubika mwiinyo pacilonda.

²¹ Na mulwani wako wanyumfwa nsala, mutebete, na wanyumfwa nyotwa, mupe cakunwa.

²² Mukwiinga mukucita boobo ulaakumulengesha kunyumfwa nsoni pabubi bwakwe. Aboobo Mwaami Lesa ulaakukulambula.

²³ Bweenka muuwo wakumatwa mbooleta mfula, mbweeke ubo kufuya mbokulengesha muntu kukalala.

²⁴ Ncibotu koona pansengwe kwiinda koona muŋanda yomwi amwanakashi shikutobwa.

²⁵ Makani abotu aswita kucishi cakulaale, alibo anga ngamaanshi atontola apekwa kumuntu ufwite nyotwa.

²⁶ Muntu ululeme unyumfwila mucita shibi, ulibo anga nkantupu ka maanshi afundeene, nabi mukalo ucite maanshi acite shintu shikola.

²⁷ Tacishi cibotu kulya bunene buuci akwalo kulilangweeta bulemu tacipi bulemu.

²⁸ Muntu ulya utakoonshi kulicata, uli anga nindabala icite lubumbu lumwaikite.