Tushimpi 24 - Baibo Busansulushi Bwa Libuku Ili

-19-

¹ Utanookumbwa shicita bamucita shibi nabi kupetelela kunoonyumfwanaabo

² ceebo myoyo yabo balo ilayeeyabo kucita shalunkutwe. Ayalo milomo yabo ilaambabo shakubusha nshimfulunganya.

-20-

³ Ŋanda ilayakwa ceebo ca busongo. Ilayuma kwiinda mumaano akunyumfwisha shintu.

⁴ Ucite lushibo ulasusha shipinda sha njiyo abuboni butabonekiboneki bwamakwebo alimwi bubotu.

-21-

⁵ Musongo ulicite nkusu shiinji, muntu ucite lushibo uleendaawo nkusu.

⁶ Kutalika nkondo nkutaanguna walibambila, kwaamba ayi ukome kulyeelete kuba beshikukupandako maano baanji.

-22-

⁷ Ncintu ciyumu kumuluya kuba abusongo palibungano liba kumwinjililo taaku ancaawaalaawo nabi comwi.

-23-

⁸ Uyo upanga miyeeyo yakucita bubi, balamwiita ayi ngushishimfulunganya.

⁹ Miyeeyo ipanga muluya nkucita shibiibi, alimwi bantu balipatite muntu shikucelebula.

-24-

¹⁰ Na watentuka muciindi ca mapensho ngayi toobeteewo muyumu mumapensho ayo.

-25-

¹¹ Funa baabo batootolwa mukucaikwa, ee, ufune baabo batooya butalantanta kuya mukucaikwa.

¹² Na waamba ayi, “Taaku ncendakalinga kubwene,” sa uyo ubona mumyoyo ya bantu taaku nceeshi? Sa uyo ulama buumi bwako taaku ncaabwene? Sa teshi akalambule muntu kweelana amilimo yakwe?

-26-

¹³ Omwanaangu kolya buuci ceebo mbubotu. Ncakwiila mpuma ilicite mise iine njoolila.

¹⁴ Ono shiba alimwi ayi busongo bulicite mise anga mbuuci kubuumi bwako. Na wacana busongo, ingayi kunembo lya buumi bwako koonse kwatuba akulangila kwako teshi kukeelebo munshila.

-27-

¹⁵ Utanooyubilila ŋanda ya muntu ululeme anga ngumucita shibi. Ncakwiila tooelete kusaala ŋanda yakwe napaceyi.

¹⁶ Muntu ululeme nabi awe mankanda osanwe aobilo, ulabuka alimwi. Sombi balo bamucita shibi balawita limwi ceebo ca mapensho.

-28-

¹⁷ Utasangalali na wabona mulwani wako wawa, ee, utakoondwi na wamubona walisuntula.

¹⁸ Mwaami Lesa na wakubona, inga wacimwa akukusha bukali bwakwe pamulwani wako.

-29-

¹⁹ Utalisukami ceebo ca bamucita shibi nabi kukumbwa shicita bamucita shibi.

²⁰ Ceebo lakwe taakuuwo ncaalangila munshiku shili kunembo alimwi lilampi lya buumi bwa mucita shibi lilaakushimishikwa.

-30-

²¹ Omwanaangu, kolemeka Mwaami Lesa alimwi amwaami ukulela. Utacatani pomwi abaabo beshikubabukila

²² ceebo bantu abo bobilo mbweshi bakabanyonyoole kabateengashite. Ino ngani wishi amapensho ngweenga baleta?

Tushimpi atumwi

²³ Utu ntushimpi atumwi twa basongo, Ncibiibi kuba akasalulushi pakoombolosha.

²⁴ Uyo woonse weenga waambila ucite mulandu ayi, “Toocite mulandu.” Bantu balaakumushingana amishobo ya bantu ilaakumusebaanya.

²⁵ Sombi abo bapa mulandu muntu ucite mulandu, balaakupekwa shoolwe shiinji abuumbi.

²⁶ Kukumbula kwakushomeka, kulibo anga nkufyontwa pamulomo.

²⁷ Ulyeelete kutaanguna kumana milimo yako imwi yoonse, bunene bunene yakubamba myuunda yako, pesule ndyeenga wayaka ŋanda yako.

²⁸ Utapi bukamboni bwakubeca pamubyo. Ee, utasebenseshi mulomo wako kwaamba shakubeca.

²⁹ Utaambi ayi, “Anebo ntoomucita bweenka mbwaakancita. Ncakwiila ntooboosha cishole kuli nguwe pashintu nshaakancita.”

³⁰ Ndakeenda kumuunda wa mutolo, muunda wa minyansa wa muntu utacite maano.

³¹ Ndakacana ayi myuumfwa ilimenetebo muunda woonse. Ncakwiila muunda woonse wakalinga kushinkite kunsaku. Alwalo lubumbu lwa mabwe lwakalinga kuyakitweko lwakamwayuluka.

³² Ono ndindakabona boobo ndakakutumana akuyeeya, lyalo pasheesho nshendakabona ndakakushawo ciiyo.

³³ Mutolo ulaamba ayi, “Taanguna ngoneeko paniini, ee, amuleke nshinshileeko paniini. Taanguna ntule maansaangu akookesha.”

³⁴ Sombi bukandu bulamupolela muciindi ceenka ico mbuli mwiipi, ee, bupenshi bulamulwana anga ngushilumamba.