Tushimpi 23 - Baibo Busansulushi Bwa Libuku Ili

-6-

¹ Na wekala ayi ulye pantu pomwi amuleli, ulyeelete kulanga kabotu shakulya shili kunembo lyako.

² Ono na ulisusukite, ncibotu kuteengana kulya.

³ Utakumbwi shakulya shakwe ceebo nshakulya shakukweena.

-7-

⁴ Utalipenshi kuyanda kubila, tondesha busongo bwakulicata.

⁵ Bubile nabi wabucana mbwa ciindi ciniibo. Ndushinisho bulaakuba amapapaminwa akuuluka anga ngumumbankwashi.

-8-

⁶ Utaliti pantu pomwi amuntu mwiinyu nabi kupetelela shakulya shakwe shibotu

⁷ ceebo ngumuntu uyo ubikabo maano kumweelo wa shakulya isho. Pakulya ulaamba ayi, “Kolyabo, konwabo,” sombi mumoyo kaacimitwe.

⁸ Ulaakuluka toonse uto ntowalya natuceyi, amaswi akulumba ngowaamba alababo akunyonyoola.

-9-

⁹ Utanoobandika amuluya ceebo ulaakusebaanya maswi ako abusongo.

-10-

¹⁰ Utaseenyi libwe likulukulu lya panyinsa nabi kunyaya bana banshiwa myuunda yabo

¹¹ ceebo Mwaami Lesa ngooshikubafuna ucite nkusu. Ncakwiila ulaakubeemikanina mumulandu wabo andiwe.

-11-

¹² Ubike moyo wako kumilasho akuteya matwi ako kumaswi a lushibo.

-12-

¹³ Utakaki kufunda mwanaako. Na wamuuma amusako taakoonshi kufwa, sobwe.

¹⁴ Kumuuma amusako, nkufuna buumi bwakwe kulufu.

-13-

¹⁵ Omwanaangu na uli musongo mumoyo, citoonengesha kusangalala mumoyo wangu.

¹⁶ Ncakwiila moyo wangu ulaakukondwa wakunokwaamba shintu shiluleme.

-14-

¹⁷ Utalekeli moyo wako kukumbwa shicita bamucita shibi, sombi utolelele kuloonda Mwaami Lesa lyoonse.

¹⁸ Na wacita boobo ulaakulangila shintu shimwi kunembo. Ncakwiila kulangila kwako uko teshi kukeelebo munshila, sobwe.

-15-

¹⁹ Kutika omwanaangu ube musongo. Ensha buumi bwako munshila iluleme.

²⁰ Utapaankani abeshikunwa bunene waini nabi bantu balya bunene nyama.

²¹ Ceebo bacakolwa abalyabi balaba bakandu abutolo bulabapa kuba abusakula.

-16-

²² Kokutika baiso abo bakakushala akutanyanshilisha banyoko na bacembela.

²³ Lushinisho, busongo, kulilemeka amaano akunyumfwisha shintu nshamakwebo abuumbi alimwi shilyeelete kuulwa, sombi tasheelete kuulishikwa.

²⁴ Baishi muntu ululeme balasangalala abuumbi pali nguwe. Uyo ucite mwaana musongo ulakondwa ceebo ca nguwe.

²⁵ Lengesha baiso abanyoko kukondwa pali ndiwe ee, banyoko abo bakakuyamwisha abasangalale.

-17-

²⁶ Kutikisha nsheeŋamba omwanaangu alimwi ukonkele citondesho ca buumi bwangu.

²⁷ Mwanakashi mufuule uli anga ncilindi cilaamfu. Mwanakashi coonoone uli anga ngumukalo ulakeme.

²⁸ Ulekalabo kaalindilila bweenka mbuli mwiipi, akulengesha basankwa baanji kutashomeka.

-18-

²⁹ Ngani uli mumapensho lyoonse, ngani ucite buumba, ngani upikishana abantu, ngani ucite matongooshi, ngani wakatululwa luuma pataapu mulandu, ngani ucite meenso asalala?

³⁰ Ngulya muntu ukalilila pamibala yakunwa waini. Ncakwiila mbaabo basuni waini wakasenkanishikwa ashimwi.

³¹ Utanookusha moyo kubona waini nabi usalale buyani kabotu, nabi utoobila buyani munkomeshi, ee, nabi utookweleka kabotu panshingo.

³² Sombi pesule ulalumabo anga ninsoka, ee, ulicite busoka bukali anga mbwa mpili,

³³ Meenso ako alaakunoobona shintu sheensu, akalo kalango kako kalaakunooyeeyabo shintu shifulunganya.

³⁴ Ulaakunoonyumfwabo anga ngumuntu ulete pamaaba apalweenge, nabi anga ngumuntu ulete pansonga ya cisamu cicata nsalu yakweenshenshako bwaato.

³⁵ Ulaakulyaamboosha ayi, “Sa bakanguma? Ono taapu mpobakancisa. Na ndakoomwa, ndushinisho nshikwe kunyumfwaako. Ino ono ntoobuka lili kwaamba ayi nkacibuleemo alimwi?”