Tushimpi 22 - Baibo Busansulushi Bwa Libuku Ili

¹ Ncibotu kuba ampuuwo ibotu kwiinda kuba abubile buunji. Kulemekwa nkubotu kwiinda silifa nabi golodi.

² Muntu mubile taapuseneewo amukandu ceebo nguMwaami Lesa wakalenga boonse bobilo.

³ Muntu ucenjete ulabona mapensho ali kunembo akwaayuba, sombi muluya ulaya mukulinjishamobo akupengelaamo.

⁴ Kulibombya akuloonda Mwaami Lesa, nkokuletela bubile, bulemu abuumi bulaamfu.

⁵ Munshila sha bamucita shibi mulipilingenebo myuumfwa atoose. Sombi uyo usuni buumi bwakwe ulekala kulaale a nshisho.

⁶ Iisha mwaana nshila njaaelete kweendelamo, kwaamba ayi aakukomena atakaswiimo.

⁷ Mukandu ngumusha wa mubile alimwi shikukweleta ngumusha kuwooyo shikukweletesha.

⁸ Uyo ushanga bubi ulatebula mapensho, amusako wakwe wakulyatilila bamwi ulaakunyonyoolwa.

⁹ Muntu shikwaaba ulaakupekwa coolwe ceebo ulaabana shakulya shakwe abakandu.

¹⁰ Tandaanya shikucelebula, lyalo kupikishanya kulaswa. Ncakwiila kwaambana amatushi shilamana.

¹¹ Uyo usuni moyo usalalite akwaamba shankumbu, mwaami ulaakuba shicibusa wakwe.

¹² Mwaami Lesa ulalama bantu bacite lushibo, sombi ulapilinganya maswi a batashomeki.

¹³ Mutolo ulakalabo muŋanda akwaamba ayi, “Ntoolumwa nkalamu pansengwe!” Nabi ayi, “Bantu batooncaya mumikwakwa!”

¹⁴ Mulomo wa mwanakashi mufuule ncilindi cilaamfu. Uyo woonse Mwaami Lesa ngwaakalalila, ulawitaamo.

¹⁵ Buluya bulekala mumoyo wa mwanike, sombi na woomwa amusako, buleendela palaamfu.

¹⁶ Uyo ulyatilila bakandu ayi abililewo, awooyo upa shipo kubantu babile kale, boonse balaba bakandu.

Tushimpi tumwi tuli makumi otatwe

¹⁷ Teya kutwi akunyumfwa tushimpi twa basongo. Shoonse nsheenjiisha ushibike mumoyo

¹⁸ ceebo shilakondelesha na washibika mumoyo akunooshaamba shoonse pamulomo wako.

¹⁹ Ndisuni kwaamba ayi ucinke manungo muMwaami Lesa, nceceeco sunu webo nceentookwiishila.

²⁰ Ndakulembela tushimpi tuli makumi otatwe umo muli lushibo ashakukupandako maano shibotu.

²¹ Twalo tulaakukwiisha maswi alushinisho alimwi ashomeka kwaamba ayi ukonshe kukumbula kabotu wooyo wakakutuma.

-1-

²² Utanoolyatilila mukandu ceebo ulicite nkusu shakumulyatilila, nabi kupensha upengete munkuta.

²³ Mwaami Lesa ulaakwiimikanina makani akwe akusaala buboni bwa baabo basaala buboni bwa mukandu.

-2-

²⁴ Utapangi cibusa amuntu ucite kamoyo kaniini. Ee, utanyumfwani amuntu ufwambaana kukalala

²⁵ mukwiinga inga weeyako nshila shakwe akucatwa mukoose cakwaalilwa kusupukaamo.

-3-

²⁶ Utabi muntu ushomesha kulipilila umwi muntu nkongole. Ee, utabi muntu usuminishanya amubye ayi ulaakucita boobo

²⁷ ceebo na ukaalilwe kulipila, balaakukunyailamobo nabi bulo bwako.

-4-

²⁸ Utaseenyi libwe likulukulu lya panyinsa ilyo lyakabika bamashali banu bakulukulu.

-5-

²⁹ Sa kuli muntu ngoobwene ucishi kabotu mulimo wakwe? Uyo ulaakunoosebensela bamaami kuteshi bantubo, sobwe.