Tushimpi 21 - Baibo Busansulushi Bwa Libuku Ili

¹ Moyo wa mwaami uli mumaansa a Mwaami Lesa. Uloolulamikabo bweenka mbwaalulamika kweenda kwa maanshi a mumulonga.

² Muntu ulabona nshila shakwe shoonse anga shililuleme, sombi nguMwaami Lesa upima miyeeyo ya mumoyo wa muntu.

³ Kucita shintu shiluleme akoombolosha cakutanyengelela kulakondelesha Mwaami Lesa kwiinda apakubenga mulambu.

⁴ Bamucita shibi baleendeshekwa amiyeeyo yabo yakulisumpula akulyuuma mucaamba.

⁵ Miyeeyo ya muntu usebensa cankusu ilamulengesha kuswitilila, sombi abo bacita shintu cakwiingana baleelabo mubukandu.

⁶ Buboni bwakucanina munshila yakutashomeka bulafwambaana kushimingana, sombi tabuciti boobo kabutana kukutola mukoose ka lufu.

⁷ Lunkutwe lwa bamucita shibi lulabacaisha beene, ceebo balakaka kucita shintu shiluleme.

⁸ Nshila ya muntu ucite mulandu njabucenjeshi sombi micito ya muntu utacite mulandu ililuleme.

⁹ Ncibotu koona pansengwe kwiinda koona muŋanda yomwi amwanakashi shikutobwa.

¹⁰ Mucita shibi ulapetelelabo kucita shibiibi, ncakwiila tafwitiwo nkumbu mubye.

¹¹ Na shikucelebula wapekwa mulandu, baluya balacenjelelaawo. Na musongo wapekwa milasho, ulaba alushibo.

¹² Lesa ululeme uleshiba shicitika mumaanda a bamucita shibi alimwi ulaakunyonyoola bamucita shibi boonse.

¹³ Na muntu wacala matwi akwe ayi atanyumfwi kulila kwa mukandu, alakwe aakulila lucafwo, taaku beshi bakamukumbule.

¹⁴ Cipo cipekwa mubushishi cilatontosha moyo. Ee, cipo cashiswa mucakufwala ca peculu cilabombya bukali buyoosha.

¹⁵ Na koombolosha kululeme kwabaawo, baluleme balasangalala, sombi cilalengesha bamucita shibi kuloonda abuumbi.

¹⁶ Muntu upambuka munshila ya maano akunyumfwisha shintu, ulaakuya mukwikala pantu pomwi abafu.

¹⁷ Uyo usuni shakulisangalasha ulaakuba mukandu. Uyo woonse usuni waini ashakulya shibotu teshi akabileewo.

¹⁸ Bamucita shibi balaliletela mapensho ayo eenka ngobayeeya kucitila baluleme.

¹⁹ Ncibotu kwikala muluyanga kwiinda kwikala amwanakashi shikutobwa ucite kamoyo kaniini.

²⁰ Mumaanda a basongo muli shakulya shibotu shiinji amafuta aanji, sombi muluya ulalita limwi shoonse nshaacite.

²¹ Uyo ukonkela shiluleme alimwi ucite nkumbu, ulacana buumi, bululami abulemu.

²² Mutanjilili wa bashilumamba musongo ulakonsha kulwana ndabala inene ya beshinkusu akuwisha lilinga balwani ndyebacinkitemo manungo.

²³ Uyo ulama mulomo amulaka wakwe ulalitabilila kumapensho.

²⁴ Muntu shikulisumpula alimwi ulyuuma mucaamba wiitwa ayi, “Shikucelebula,” ngumuntu ucita shintu shakulisumpula lyoonsebo.

²⁵ Bukata bwa mutolo bulamucaisha mwiine, ceebo taasuni kucita milimo.

²⁶ Lakwe ngushi lunkumbwa lwakuba ashimwi ciindi coonse, sombi balo baluleme mbeshi kwaababo ca moyo woonse lyoonse.

²⁷ Mulambu wa bamucita shibi Lesa tausuniiwo. Ino mbuyani walo uyo ngobabenga amyoyo yobilo?

²⁸ Kamboni mubeshi ulaakuloba, sombi maswi a muntu unyumfwila alaakukutikwa.

²⁹ Bamucita shibi baleelesha kubonesha ayi balicite nkusu shakucita shoonse, sombi baluleme balataanguna kuyeeya pamicito yabo,

³⁰ Taaku busongo bwa muntu, lushibo nabi miyeeyo yakwe isho sheenga shaswitilila mukulwana Mwaami Lesa.

³¹ Muntu ulakonsha kubamba liaki ayi liye kunkondo, sombi nguMwaami Lesa ulengesha kukoma.