Tushimpi 20 - Baibo Busansulushi Bwa Libuku Ili

¹ Waini ulalengesha muntu kusebaana! Bwalwa bulalengesha muntu kubweka! Uyo woonse upisha mutwi muli mbubo ngumuluya.

² Bukali bwa mwaami buli anga nkubuluma kwa nkalamu. Uyo woonse usonkomona bukali bwakwe ulalicaisha.

³ Cilapa bulemu kumuntu kutasuna nkondo, sombi muluya ulafwambaana kutalika kwaambana.

⁴ Mutolo taashangi muunda wakwe paciindi ceelete. Ono pakutebula taaku ancaatebulaamo.

⁵ Miyeeyo ya muntu njiinji anga ngamaanshi a mulweenge, sombibo musongo ngookonshabo kwiishiba.

⁶ Baanji bantu balalyaamba kushomeka, ono ngani weenga wacana ushomeka calushinisho?

⁷ Muntu ululeme taacite kampenda mubuumi bwakwe, balicite coolwe bana bakwe bakonkela bwikaalo bwakwe.

⁸ Mwaami ndyeekala pacuuna cakwe ca bwaami pakoombolosha, ulapupulushabo bubi boonse ameenso akwe.

⁹ Anu ngani weenga waamba ayi, “Mumoyo wangu taamuuwo kampenda, ndisalalitebo alimwi nshicitewo cibiibi.”

¹⁰ Shipimo shakubeca amabwe akupimisha anyengelela, Mwaami Lesa ulishipatite shoonse.

¹¹ Mwaana uleshibwa mibo yakwe kwiinda mumicito yakwe. Ee, uleshibwa na mibo yakwe ililuleme alimwi teecite kampenda.

¹² Matwi akunyumfwisha ameenso akubonesha, nguMwaami Lesa wakalenga shoonse.

¹³ Na wasunisha tulo, ulaakuba mukandu. Kocabaana kumilimo, ingaawo ukabe ashakulya shiinji.

¹⁴ Muntu pakuula cintu lyoonse ulatongooka ayi mweelo watanta. Sombi amana kuula ulaya cililumbaisha ayi woola cicipite.

¹⁵ Golodi nkooli, amabwe amwi amakwebo eetwa ayi lubi ngaanji, sombi milomo yaamba sha lushibo ili anga ngamabwe amakwebo atacanikicaniki.

¹⁶ Na muntu washomesha kulipilila mweensu nkongole, ulyeelete kucatilwa cakufwala capeculu. Ee, na washomesha kucita boobo kumuswamashi ngooelete akuseswa nkongole iyo.

¹⁷ Cakulya cicaninwa munshila ya bwiipi cilicite mise abuumbi, sombi kumeelelesho mulomo wakwe ulasulabo bulongo.

¹⁸ Taanguna kwiipusha kootana kuyeeya cakucita, Kuteelesha kuya kunkondo kootana kwiipusha bwakucita.

¹⁹ Mufuyishi taakoonshi kukalika makani abushishi, aboobo amutalamuke muntu shikubwekabweka.

²⁰ Uyo woonse ushingana baishi abanyina, buumi bwakwe bulaakumanabo anga ndilampi lyashimika mumunshinshe.

²¹ Buboni bwampyani bubweswa cakufwambaana, pesule bulaba lishingo kuwooyo wabubwesa.

²² Utaambi ayi, “Ndakukubooshesha cishole.” Cinka manungo muMwaami Lesa, ngweshi akakucaafwe.

²³ Mwaami Lesa ulipatite shipimo shabubeshi, sombi shipimo shalushinisho shilamukondelesha.

²⁴ Mwaami Lesa ngoobamba nshila ya muntu woonse, ono muntu inga weshiba buyani nshila yakwe?

²⁵ Inga kwaba kulyaanga kufwambaana kushomesha ayi ishi nshakwe Lesa, pesule watalika kuliyeeya ayi na ndakashomeshelanshi bobulya.

²⁶ Mwaami musongo ulapupulusha akukusha bamucita shibi akubapa milandu kwakutabanyumfwila nkumbu.

²⁷ Buumi bwa muntu ndilampi lya mwaami Lesa, lilamunikila pali poonse mumubili wa muntu.

²⁸ Lusuno alushomo nsheshilengesha mwaami kwikala kabotu, bululami bwakwe bulamupa kukalilila pacuuna cakwe ca bwaami.

²⁹ Bulemu bwa basankwa bacikula bwangu ninkusu shabo, abwalo bulemu bwa bamacembele nimfwi shabo.

³⁰ Shuumo shipanga shilonda nsheshikusha kushibiibi, akwalo kuumwa kulakasha moyo kucita shibiibi.