Tushimpi 19 - Baibo Busansulushi Bwa Libuku Ili

¹ Muntu mukandu utacite kampenda ngumubotu kwiinda muluya ucite mulomo uya bubeca.

² Teshi cibotu kusongomana omuntu nootacite lushibo, nabi kucita shintu cakwiingana wamana waluba.

³ Muntu ulalinyonyoosha kubuluya bwakwe mwiine, sombi moyo wakwe ulakalalila Mwaami Lesa.

⁴ Bubile bulalengesha kuba ashibusa shiinji, sombi mukandu babye boonse balamupalangana.

⁵ Kamboni mubeshi teshi akalangwebo cakutapekwa mulandu, ee, uyo waamba shabubeshi teshi akalekelelweewo.

⁶ Bantu baanji balisuni wooyo ubanyumfwila nkumbu, ncakwiila boonse balisuni wooyo ubapa shipo.

⁷ Muntu mukandu ulanaamwa akubeshikamukowa bakwe. Ono balo babye baleendaawobo kumunaama. Nabi weelesha buyani kubakonkela cakulikombelesha, ndushinisho ulalemabo cakutabacanaawo.

⁸ Uyo ucana busongo ingayi ulisuni buumi bwakwe mwiine, uyo ukondwa maano akunyumfwisha shintu ulaakuswitilila.

⁹ Kamboni mubeshi teshi akalangwebo cakutapekwa mulandu, alakwe waamba shabubeshi ulaakuloba.

¹⁰ Taceeleli muluya kwikala bwikaalo bubotu, nabi musha kweendelesha bacinenenene.

¹¹ Muntu ucata caamba ngumusongo, kusuula shilubo nshaacitilwa kulamuletela bulemu.

¹² Bukali bwa mwaami buli anga nkubuluma kwa nkalamu. Sombi nkumbu shakwe shili anga ngumume kubwiisu.

¹³ Mwaana muluya ulakonsha kucaisha baishi. Mwanakashi ubweka bunene uli anga nimfula ya muyoba.

¹⁴ Muntu ulakonsha kupyana buboni bwa bashali bakwe boonse, sombi mwanakashi ucenjete ncipo ciswa kuMwaami Lesa.

¹⁵ Butolo bulapa koonenena, ee, muntu utacabaani ulaba shinsala.

¹⁶ Uyo ukonkela milawo yakwe Lesa ulalama buumi bwakwe. Sombi uyo ufutatila nshila shakwe isho, ulafwa.

¹⁷ Kucafwa bakandu, cili anga nkukongosha Mwaami Lesa, lyalo Mwaami Lesa alaakubooshesha kweelana ambowakapa.

¹⁸ Funda mwanaako kaacikonsheka kufundwa, utamulekeleli ayi akanyonyoolwe.

¹⁹ Na muntu ngwa kamoyo kaniini muleke alibonene, ceebo wamufuna, ulaakucibooshawo.

²⁰ Kokutika kwaambilwa alimwi koosumina kululikwa. Na unoocita boobo bumwi bushiku ulaakuba musongo.

²¹ Muntu inga kaacite miyeeyo iinji, sombi nkuyanda kwakwe Lesa kulengesha ayi icitike.

²² Cintu cinene ciyandika kumuntu nkushomeka. Anu kuba mukandu ncibotu kwiinda kuba mubeshi.

²³ Kuloonda Mwaami Lesa nkokuletela buumi, lyalo muntu ulekala kwakubula cakulisukama alimwi kwakubula makatasho.

²⁴ Bamwi bantu mbatolo cakufwa, cakwaamba ayi balaalilwa akulilisha.

²⁵ Uma shikucelebula kwaamba ayi baluya bacenjeleewo. Kalalila muntu ucite maano akunyumfwisha shintu, ulaakuba alushibo.

²⁶ Uyo upamba shintu sha baishi akutandaanya banyina kuŋanda yakwe, ngumwaana ulensha nsoni alimwi uleta musebaanyo.

²⁷ Omwanaangu, na ucileke kukonkela milasho, ulaakupambuka munshila ya maswi alushibo.

²⁸ Kamboni mubiibi ulacobola koombolosha kululeme. Mulomo wa mucita shibi ulamina bubi.

²⁹ Milandu ilalindila beshikucelebula akwalo kuumwa kumisana nkwa baluya.