Tushimpi 18 - Baibo Busansulushi Bwa Libuku Ili

¹ Muntu utasuni bamwi ulacitabo nshaasuni mwiine. Ulalengulula shoonse isho babye nsheebaamba ayi nshamaano.

² Muluya taalisukamiwo nabi wabula kunyumfwisha shintu, sombi ulasangalalilabo mukwaamba sheesho nshaashi lakwe.

³ Pali bubi akwalo kushibulukwa mpokuli. Pali nsoni awalo musebaanyo mpooli.

⁴ Maswi amusongo ali mbuli maanshi alaamfu alimwi kantupu ka busongo kalibo anga nkalonga kakunka.

⁵ Teshi cibotu kufuninina ucite mulandu, nabi kulengesha utacite mulandu kutoomboloshekwa cabululami.

⁶ Maswi a muluya alamutola mumapensho. Mulomo wakwe ulamulengesha kuumwa.

⁷ Muluya ulalinyonyoosha kumulomo wakwe mwiine. Ncakwiila maswi akwe ali anga nkoose kuli nguwe.

⁸ Maswi akufuya alibo anga ncakulya cibotu alimwi alenjila mukati lya mubili mwiine.

⁹ Muntu mutolo kuncito, ulyeelenebo amuntu shikunyonyoola shintu.

¹⁰ Mwaami Lesa uli anga niŋanda ilaamfu iyumu uko kucicila bantu baluleme akupuluka.

¹¹ Babile balayeeya ayi buboni bwabo ndyelilinga lyabo. Ee, balayeeya ayi buli anga ndilinga lilaamfu kundabala inene.

¹² Muntu na kaatana kuwa ulalisumpula, sombi muntu ulapekwabo bulemu na waliceyesha.

¹³ Uyo ukumbula katana kunyumfwisha makani, ngumuluya alimwi ulalilenshabo nsoni.

¹⁴ Moyo wa muntu ulamucafwa mukuciswa, sombi wa muntu ufwite taaku nceenga wacafwa.

¹⁵ Moyo wa musongo ulisuni kwishiba shintu, amatwi asongo alakutika ayi anyumfwishe.

¹⁶ Cipo cilacalula mulyango kuli wooyo upa, akumulengesha kubonana abantu bacite bulemu.

¹⁷ Muntu utalikilako kukonka makani ulaboneka anga ngooluleme, kushikila shimulandunyina na watalika kumwiipusha miipusho.

¹⁸ Kuuma cisolo nkokusutula kupikishanya alimwi nkokupansaanya beshikupikishanya.

¹⁹ Mubyo na wamucafwa ulababo anga nindabala icite lilinga liyumu. Sombi kwaambana kulibo anga nimpingilo sha sheela kumwinjililo.

²⁰ Maswi aswa mumulomo wa muntu, ngweeshi kuca kwa nshiku shakwe shili kunembo. Ncakwiila nshaabona shilaswa mukwaamba kwa mulomo wakwe mwiine.

²¹ Nshewaamba shilakonsha kukupa buumi nabi kukucaisha, ee, muntu ulyeelete kutambula shisepo sha maswi ngwaamba.

²² Uyo ucana mwanakashi wakweeba, ulacana cintu cibotu alimwi Mwaami Lesa ulamunyumfwila nkumbu.

²³ Muntu mukandu ulaamba cakulikombelesha, sombi mubile ulakumbula cabukali bukali.

²⁴ Kuli beshishibusa baliboneshabo ayi mulanyumfwana, sombi inga kakuli womwi ngoonyumfwanaakwe kwiinda amukwanu.