Tushimpi 17 - Baibo Busansulushi Bwa Libuku Ili

¹ Ncibotu kulya shikwa wakayuma na kooli muluumuno, kwiinda kusekelela muŋanda iswite kupikishanya.

² Musebenshi musongo inga walela mwanaamwaami wakwe ulensha nsoni akwaabana buboni abaana ba mwaami wakwe bamwi anga alakwe ngushikamukowa.

³ Silifa uleeleshelwa munongo inene pamulilo, mumunyumbi muleeleshelwa golodi, sombi moyo wa muntu uleeleshekwa aMwaami Lesa.

⁴ Mucita shibi ulakutika shaamba milomo ibiibi. Mubeshi ulakutika shaamba mulaka ubeca.

⁵ Muntu uyo useka bakandu, ingayi ulanyansha Mulengi wabo. Uyo woonse usangalalila mumapensho a umwi, teshi akalangwebo cakutapekwa mulandu.

⁶ Bashikulu ngomushini wa bacembele abwalo bulemu bwa baana, mbamashali babo.

⁷ Maswi abotu taaeleli kwaamba muluya, bweenka mbuli mweendeleshi mbwaateeleli kubeca.

⁸ Makulo alasebensabo mbuli musamu wa coolwe kuwooyo waapa, kuli koonse nkweenga waya, ulaswitilila.

⁹ Uyo ulekelela mubye mulandu ngayi ulisuni cibusa, sombi uya cibandika cilubo ca mubye ulalengesha cibusa kumana.

¹⁰ Musongo ulanyumfwa na waambilwabo liswi lyomwi, sombi muluya taanyumfwi nabi woomwa mankanda mwaanda.

¹¹ Mucita shibi ulisunibo sha bwaashu. Shinkombe utacite nkumbu ulaakutumwa mukumulwana.

¹² Ncibotu kukumana abeya wabweselwa baana, kwiinda kucana muluya kaacita shabuluya.

¹³ Na muntu wapilusha cibiibi pacintu cibotu, kubisha teshi kukamanewo muŋanda yakwe.

¹⁴ Kubalamuna kwaambana kuli anga nkutulula bulyango mumukuti wa cishiba. Anu ncibotu kucilekabo kwaamba pacikani ico kacitana kuya kunembo.

¹⁵ Kulekabo muntu ucite mulandu nabi kupa mulandu muntu utacite kampenda, nshikani shobilo isho Lesa nshaapatite.

¹⁶ Tacicafwi muluya nabi kaacite maali akuyandoosha busongo, mukwiinga taacitewo maano akwiiya shintu.

¹⁷ Shicibusa ulasuna mubye ciindi coonse. Mukwanu wakashalilwa kukucafwa mumapensho.

¹⁸ Muntu utacite maano ulashomesha kulipilila umwi muntu nkongole. Ee, muntu uyo ulasuminishanya amubye ayi ulaakucita boobo.

¹⁹ Uyo usuni bunene kwaambana ulisuni kubisha. Uyo ulisumpula ingayi utoolitambila kunyonyoolwa.

²⁰ Muntu ucite moyo ubiibi taaswitilili. Uyo ucite mulaka ubeca ulawita mumapensho.

²¹ Mwaana muluya ulalensha nsoni baishi, muntu na washala mwaana muluya ulaba abuumba.

²² Moyo usangalete ngu musamu ubotu kumubili, sombi kuungumana kulaletela kucisa mumafuwa.

²³ Moomboloshi mubiibi ulatambula makulo mubushishi, kwaamba ayi bafulunganye mukondo wa makani.

²⁴ Muntu ucite maano akunyumfwisha shintu ulashinkamanabo kucita shabusongo, sombi muluya ulaya bupulumpuntabo cishi coonse.

²⁵ Mwaana muluya ulalengesha baishi kuungumana alimwi akucisisha moyo banyina bakamushala.

²⁶ Tacishi cibotu kulipilisha muntu utacite mulandu, akwalo kuuma bacinenenene ceebo cakushomeka kwabo tacishi cibotu.

²⁷ Muntu ucite lushibo taabwekibweki, alakwe ucite maano akunyumfwisha shintu ulacata caamba.

²⁸ Nabi muluya inga wayeeyela kuba musongo na kaaumwitebo, akwaambwa ayi ulicite maano akunyumfwisha shintu na kaalicata mukwaamba.