Tushimpi 16 - Baibo Busansulushi Bwa Libuku Ili

¹ Miyeeyo yoonse ilaswa mumoyo wa muntu, sombi Mwaami Lesa ngoopa mulaka maswi akukumbula.

² Muntu ulabona nshila shakwe shoonse anga shililuleme, sombi Lesa ngoombolosha miyeeyo ili mumoyo wakwe.

³ Bika miyeeyo yako mumaansa a Mwaami Lesa, lyalo miyeeyo yako iyo yoonse ilaakuswitilila.

⁴ Mwaami Lesa wakabamba meelelesho a shintu shoonse. Meelelesho a bamucita shibi nkunyonyoolwa.

⁵ Mwaami Lesa ulipatite bantu boonse balisumpula, Anu amwishibe ayi teshi akabalangilishebo cakutabapa mulandu.

⁶ Lusuno alushomo nsheshileta kulekelelwa kwa shibiibi. Na kooloonda Mwaami Lesa, inga kootabishiiwo napaceyi.

⁷ Na muntu kaaenda munshila isangalasha Mwaami Lesa, ulaakulengesha balwani bakwe kunoonyumfwana anguwe.

⁸ Ncintu cibotu kuba abuboni buniini bwakucanina munshila iluleme kwiinda kuba abuboni buunji bwakucanina munshila yakutashomeka.

⁹ Muntu inga wayeeya nshila njaasuni kutola, sombi Mwaami Lesa ngootanjilila ntaamwa shakwe.

¹⁰ Mulomo wa mwaami ulaamba ankusu shiswa kuli Lesa, aboobo mulomo wakwe toomboloshi cakutalulama.

¹¹ Mwaami Lesa ulisuni ayi beshimakwebo basebenseshe shipimo shakutabeca kwaamba ayi kabatanyengeleli bamwi pakuulisha makwebo abo.

¹² Bamaami balipatite micito ibiibi ceebo bweendeleshi bulayuma kwiinda mubululami.

¹³ Bamaami balisuni bantu baamba shalushinisho. Balakondwa muntu uyo waamba shancinencine.

¹⁴ Bukali bwa mwaami bulatola kulufu, sombi musongo inga wakonsha kubootobeka.

¹⁵ Na mwaami wasekaseka cilaamba buumi, nkumbu shakwe shili anga nimfula ya kumatalikilo a meensa.

¹⁶ Kuba abusongo ncintu cibotu abuumbi kwiinda kuba agolodi. Ncintu cibotu kuba amaano akunyumfwisha shintu kwiinda kuba asilifa.

¹⁷ Nshila ya baluleme ilaseesha bubi. Uyo woonse ulilama munyendelo, ulalama buumi bwakwe.

¹⁸ Kulisumpula kulatola mukunyonyoolwa. Kulyuuma mucaamba kulalengesha muntu kuwa.

¹⁹ Ncintu cibotu kulibombya akuba mukandu kwiinda kuba womwi wa beshikulisumpula akunoobaanaabo shintu shakusaala.

²⁰ Uyo woonse ukonkela milasho ulaakuswitilila. Ulicite coolwe uyo ucinka manungo muMwaami Lesa.

²¹ Musongo ulashibilwa kumaano akunyumfwisha shintu. Mubandi ubotu ulalengesha bantu kusuna kukutika.

²² Maano nkantupu ka buumi kubaabo baacite, sombi buluya bulaletela bantu baluya milandu.

²³ Musongo ulayeeya kaatana kwaamba. Nshaamba shilalengesha kusuna kukutika.

²⁴ Maswi a nkumbu ali anga nimpuma sha buuci. Alicite mise kubuumi alimwi alacafwa mubili kuba kabotu.

²⁵ Kuli nshila bantu njebabona ayi ililuleme, sombi kumeelelesho ilatola kulufu.

²⁶ Nsala ilalengesha musebenshi kusebensa cankusu ceebo ulisuni kukuta akumana nsala yakwe iyo.

²⁷ Muntu utaaku mbwaabete ulapanga miyeeyo yakucisa babye, aalo maswi akwe alibo anga ngumulilo ukali.

²⁸ Muntu mubiibi ulaleta kwaambana. Kufuya kulapansaanya beshicibusa.

²⁹ Shilunkutwe ulayungoola mubye akumweensha munshila itabete kabotu.

³⁰ Uyo woonse ukamina kumeenso, ingayi utookakatila kubeca. Uyo woonse ushundumika mulomo, ingayi mucaamba cakwe muli muyeeyo ubiibi.

³¹ Imfwi ngumushini wa bulemu. Kubaasho cilaamba ayi muntu ulicite buumi bululeme.

³² Ncintu cibotu kuba acaamba cishiite kwiinda kuba shilumamba ucibwene kulwana. Ncibotu kuba muntu ulicata na wakalala kwiinda wooyo wakoma ndabala inene yoonse.

³³ Cisolo ciloomwa abantu, sombi Mwaami Lesa ngoopa bukumbulo.