Tushimpi 15 - Baibo Busansulushi Bwa Libuku Ili

¹ Kukumbula kabotu kulabombya bukali, sombi kukumbula cakucenena kulabusonkomona.

² Musongo ulaamba shipa lushibo, sombi muluya ulaambabo shintu shitacite ncito.

³ Meenso a Mwaami Lesa alabona poonse poonse, ee, alabona boonsebo bacita shibiibi abacita shibotu.

⁴ Mulaka waamba maswi ashilika uli anga ncisamu cipa buumi, sombi mulaka waamba shabubeshi, ulacisisha moyo.

⁵ Muntu muluya ulanyansha sheesho shimufunda baishi, sombi uyo ukutika kululikwa ngoocite busongo.

⁶ Muŋanda ya muntu ululeme mulacanika buboni buunji, sombi bubile bwa mucita shibi bulamuletelabo mapensho.

⁷ Milomo ya basongo ilatola lushibo kuli koonse, sombi myoyo ya baluya teshi mboicita ubo, sobwe.

⁸ Mwaami Lesa ulipatite mulambu wa mucita shibi, sombi mupailo wa muntu ululeme ulamusangalasha.

⁹ Mwaami Lesa ulipatite nshila sha mucita shibi, sombi ulisuni muntu ucita shintu shiluleme.

¹⁰ Muntu upambuka munshila iluleme ulaakupekwa mulandu unene abuumbi. Uyo ukaka kululikwa ulaakufwa.

¹¹ Ono na musena wa bafu ulibo patuba pameenso a Mwaami Lesa, ino myoyo ya bantu inga yashiswa buyani kuli Lesa?

¹² Shikucelebula taasuniiwo kululikwa, alimwi teepushiiwo kumusongo ayi amupandeko maano.

¹³ Na muntu ulisangalete ulasekaseka, sombi na moyo wakwe waciswa, uloongumana.

¹⁴ Moyo wa musongo ulayandoola lushibo, sombi mulomo wa muluya ulayandoolabo shabuluya sheenka.

¹⁵ Nshiiku sha mukandu shoonsebo nshibiibi, sombi muntu ushiite kabotu ulasangalala lyoonse.

¹⁶ Ncintu cibotu kuba abuboni buunji na kooloonda Mwaami Lesa kwiinda kuba mubile uyo uli mumapensho.

¹⁷ Ncibotu kulya nshima ya bucisa abantu bakusuni kwiinda kulya nshima anyama ya mafuta abantu bakupatite.

¹⁸ Muntu ucite kamoyo kaniini ulabusha kwaambana, sombi ushiite caamba ulaleta luumuno.

¹⁹ Nshila ya mutolo iliswitebo mapensho, sombi nshila ya ushomeka ili anga ngumukwakwa utacite mfumpu.

²⁰ Mwaana musongo ulasangalasha baishi, sombi muluya ulasebaanya banyina.

²¹ Buluya bulasangalasha uyo utacite maano, sombi muntu ucite maano akunyumfwisha shintu uleenda munshila iluleme.

²² Miyeeyo teeswitilili na pabula shikukupandako maano, sombi na kwafula beshikukupandako maano ilaswitilila.

²³ Kukumbula bweelete kulasangalasha. Ncintu cibotu kwaamba liswi lyeelete paciindi ceelete.

²⁴ Musongo uleenda munshila ya buumi itola kwiculu, kumukasha kweenda munshila iya panshi pamusena wa bafu.

²⁵ Mwaami Lesa ulamwayulula ŋanda ya shikulisumpula, sombi ulatabilila buboni bwa mukalubinje.

²⁶ Mwaami Lesa ulipatite miyeeyo ya bamucita shibi, sombi miyeeyo ya bantu basalalite ilamusangalasha.

²⁷ Uyo ubilila mukutashomeka ulaletela bamuŋanda yakwe mapensho, sombi uyo ukaka makulo, ulaakuba abuumi.

²⁸ Muntu ululeme ulayeeya kaatana kukumbula, sombi mulomo wa mucita shibi ulakumbulabo cakubwa.

²⁹ Mwaami Lesa uli kulaamfu abamucita shibi, sombi mipailo ya baluleme uleenyumfwa.

³⁰ Ciinso cisekaseka cilasangalasha kumoyo, aalo makani abotu alakalika moyo.

³¹ Uyo ukutika kukalalilwa kupa buumi ulaakunookala kaangulukite pakati ka basongo.

³² Uyo ukaka kululikwa ingayi utoolisebaanyabo mwiine, sombi uyo woonse usumina kululikwa ulaakuba amaano akunyumfwisha shintu.

³³ Kuloonda Mwaami Lesa nkokwiisha muntu kuba musongo. Ulyeelete kutaanguna kulibombya ingaawo ukalemekwe.