Tushimpi 14 - Baibo Busansulushi Bwa Libuku Ili

¹ Mwanakashi musongo ulayaka bamuŋanda yakwe, sombi muluya uleemwaya kumilimo yakwe mwiine.

² Uyo ucita shintu shiluleme ulalemeka Mwaami Lesa, sombi uyo utaciti shiluleme, ingayi ulanyansha.

³ Mubandi wa muluya alamulengesha kukwiipwa musako kumusana, sombi maswi a muntu ululeme ulamutabilila.

⁴ Kutaaku basune, bweenshi mbuniini, sombi kuli ŋombe, shitebulwa shilafula.

⁵ Kamboni walushinisho taambiwo shabubeshi, sombi kamboni mubeshi uloomputabo shakuumputa.

⁶ Shikucelebula ulalangoola busongo cakutabucanaawo, sombi bantu bacite maano akunyumfwisha shintu, balafwambaana kuba alushibo.

⁷ Talamuka kumuntu muluya ceebo teshi ukacaneewo lushibo mukwaamba kwakwe.

⁸ Busongo bwa muntu ucenjete nkutaanguna kuyeeya pamicito yakwe, sombi buluya bwa baluya bulabalubya beene.

⁹ Baluya balaseka muntu ulyaambilila shibiibi, sombi baluleme balisuni kulekelelwa.

¹⁰ Taaku umwi weenga wanyumfwa buumba buli mumoyo wa mubye nabi weenga wanyumfwa kusangalala kwakwe.

¹¹ Ŋanda ya mucita shibi ilaakunyonyoolwa, sombi ya muntu ululeme ilaakucaala moyakeemikanina.

¹² Kuli nshila bantu njebabona ayi ililuleme, sombi kumeelelesho ilatola kulufu.

¹³ Mukusekaseka momuswa kulila, kombwe bushiku mbwaasangalala ndyaacailwa beensu.

¹⁴ Mucita shibi ulaakulambulwa kweelana amilimo yakwe, alakwe muntu ululeme ulaakulambulwa kweelana amilimo yakwe ibotu.

¹⁵ Muluya ulashoma shoonse nsheenga wanyumfwa, sombi muntu ucenjete ulataanguna kuyeeya ncaaelete kucita.

¹⁶ Musongo ulalemeka Mwaami Lesa akuswa kushibiibi, sombi muluya ulafwambaana kucita shintu cakubula kuyeeya.

¹⁷ Muntu ucite kamoyo kaniini ulacita shintu shabuluya. Taaku muntu usuni mubeshi.

¹⁸ Baluya balapekwa shintu kweelana abuluya bwabo, sombi basongo cilambu cabo ndushibo.

¹⁹ Bamucita shibi balaakufukamina bantu bali kabotu, ncakwiila babiibi balaakufukama pamilyango ya baluleme.

²⁰ Bakandu balipatitwe nabi kubeshikamukobonyinaabo, sombi babile balicite shibusa shiinji.

²¹ Uyo woonse useka shikamukobonyina, ulabisha, sombi ulicite coolwe uyo ufwita nkumbu mukandu.

²² Sa bantu bayeeya kucita shibiibi tabasowekete? Sombi abo bayeeya shintu shibotu balacana lusuno abulemu.

²³ Kusebensa cankusu nkokuleta mpindu, sombi kwaambabo akutandabala kulapa bukandu.

²⁴ Bubile ncilambu ca basongo, sombi buluya bulashala buluyanyina.

²⁵ Kamboni walushinisho ulafuna buumi bwa bantu, sombi kamboni mubeshi ulaaba bantu mububeshi bwakwe.

²⁶ Uyo woonse uloonda Mwaami Lesa ulicite kwakuyuba. Ndushinisho ulicite kwakuyuba uko bana bakwe nkweshi bakacicile.

²⁷ Kuloonda Mwaami Lesa nkokantupu ka buumi ceebo kalo nkokakusha muntu mutoose twa lufu.

²⁸ Bulemu bwa mwaami buli mukufula kwa bantu bakwe, sombi na muleli taacite bantu mucishi cakwe, taaku mbwaabete.

²⁹ Muntu ushiite caamba ulatondesha ayi ulicite maano akunyumfwisha shintu, sombi muntu ucite kamoyo kaniini ulalitondeshabo buluya.

³⁰ Moyo utacite shakulisukama ulapa buumi bubotu kumubili, sombi munyono uli anga mbulwashi bwa mumafuwa.

³¹ Muntu uyo useka mubye mukandu, ingayi ulanyansha Mulengi wakwe, sombi uyo woonse ufwita nkumbu mukandu, ulalemeka Lesa.

³² Mucita shibi ulanyonyoolwa ceebo ca shibiibi shakwe, sombi ululeme ulicite kwakuyuba ceebo cakushomeka kwakwe.

³³ Busongo buli mumuntu uyo ucite maano akunyumfwisha shintu. Sombi baluya tababuciteewo napaceyi.

³⁴ Bululami bulalengesha mushobo wa bantu kulemekwa, sombi shibiibi shilaleta musebaanyo pamushobo uli woonse.

³⁵ Mwaami ulisuni musebenshi ucita shintu sha busongo, sombi musebenshi ucita shintu shilensha nsoni, ulasonkomona bukali bwakwe.