Tushimpi 13 - Baibo Busansulushi Bwa Libuku Ili

¹ Mwaana musongo ulanyumfwa kululikwa kuli baishi, sombi shikucelebula taasuniiwo kukalalilwa.

² Muntu ulalambulwa kweelana ashiswa mumulomo wakwe, sombi bantu batashomeki mbamusembela kulwana.

³ Muntu uliciba pakwaamba ulafuna buumi bwakwe, sombi uyo ukuweelabo ulalicisa mwiine.

⁴ Mutolo nabi wasuna buyani kuba acintu cimwi, taacicaani, sombi uyo usebensa cankusu ulacana shintu shoonse nshaasuni.

⁵ Muntu ululeme ulipatite bubeshi, sombi bamucita shibi balalensha nsoni amusebaanyo.

⁶ Bululami bulafuna muntu ushomeka, sombi kubisha kulawisha mucita shibi.

⁷ Bamwi bantu balalibonesha kubila, sombi kabatacite nabi comwi. Bamwi balalibonesha ayi mbakandu, sombi mbobacite buboni buunji abuumbi.

⁸ Mubile ulalubula buumi bwakwe kububoni bwakwe. Sombi mukandu taaku muntu ukonga buumi bwakwe.

⁹ Baluleme bali anga ndilampi linyakisha, sombi bamucita shibi bali anga ndilampi litooyanda kushimika.

¹⁰ Kulisumpula kulaletabo kwaambana amapensho, sombi busongo bulacanwa mubaabo banyumfwa kwaambilwa.

¹¹ Maali acanwa mukutashomeka alamana bwangu, bubile bwakututukila buleenda, sombi ucana maali paniini paniini, alafula.

¹² Cilacisisha moyo na koolangila kapongo kafwite, sombi ncewalinga kulangila cacitika, kulangila kwako kulaba anga ncisamu cipa buumi.

¹³ Uyo usuula milasho ulaliletelela mwiine, sombi uyo ubikila maano kumulawo ulalambulwa.

¹⁴ Kwiisha kwa musongo nkantupu ka buumi ceebo kulalengesha muntu kuswa mutoose twa lufu.

¹⁵ Maano akunyumfwisha shintu alalengesha muntu kulemekwa, sombi batashomeki bali munshila yakunyonyoolwa.

¹⁶ Muntu ucenjete ulataanguna kuyeeya katana kucita cintu cili coonse, sombi baluya balaambabo caambaambe.

¹⁷ Shinkombe utashomeki ulaletela mapensho, sombi uyo ushomeka ulaleta luumuno.

¹⁸ Muntu ukaka kululikwa ulaba mukandu alimwi ulasebaana, sombi uyo lakwe usumina kululamikwa ulalemekwa.

¹⁹ Na cintu ncewakalinga kulangila cacitika cilasangalasha abuumbi. Baluya tabasuni kusanduka kuswa kububi bwabo.

²⁰ Muntu weenda abasongo alakwe ulaba musongo, sombi shimweenda aumineme alakwe ulaminama.

²¹ Mapensho alakonkela bamucita shibi ciindi coonse, sombi kuswitilila ncilambu cipekwa baluleme.

²² Muntu ululeme ulashiila bamulunyungu lwakwe buboni bwakwe, sombi buboni bwa mucita shibi bulaya kubaluleme.

²³ Muunda wa mukandu ulakonsha kukusha shakulya shiinji, sombi baleendwa kumaano kubataluleme pashintu nshebalima.

²⁴ Uyo utoomi mwanaakwe amusako, ingayi taamusuniiwo, sombi uyo umusuni ulamululika.

²⁵ Baluleme balalya mbuli mbobasuni, sombi bamucita shibi baleendabo ansala.