Tushimpi 11 - Baibo Busansulushi Bwa Libuku Ili

¹ Mwaami Lesa ulipatite shipimo shabubeshi, sombi shipimo shalushinisho shilamukondelesha.

² Na muntu walisumpula, ulalenshekwa nsoni cakufwambaana, sombi na waliceesha ulaba abusongo.

³ Kushomeka kwa baluleme kulabatanjilila, sombi abo batashomeki balanyonyoolwa ceebo ca bubeshi bwabo.

⁴ Bubile tabucafwi pabushiku bwa bukali, sombi bululami mbobufuna kuswa kulufu.

⁵ Bululami bwa baabo batacite kampenda bulalengesha nshila yabo kutuba, sombi bamucita shibi balawishikwa kushibiibi shabo beene.

⁶ Bululami bwa bantu bashomeka mbobubafuna, sombi batashomeki balacatwa kushibiibi nshebasuni.

⁷ Na mucita shibi wafwa, kulangila kwakwe koonse kulafwa. Ncakwiila kulangila kwakwe mububoni bwakwe kuleela cakubula mpindu.

⁸ Muntu ululeme ulafunwa kumapensho, sombi mapensho ayo alashikila mucita shibi.

⁹ Muntu uteshi Lesa ulanyonyoosha babye kumulomo wakwe, sombi muntu ululeme ulapulushikwa ceebo ca lushibo lwakwe.

¹⁰ Baluleme na baswitilila bamundabala balasangalala. Na bamucita shibi bafwa, bantu baloolobesha cakusangalala.

¹¹ Coolwe ca baluleme cilalengesha ndabala kuswitilila, sombi ilanyonyoolwa kwiinda mumilomo ya bamucita shibi.

¹² Muntu woonse utacite maano, ulasebaanya mubye, sombi ucite maano akunyumfwisha shintu uloomunabo.

¹³ Muntu mufuyishi ulayubulula makani abushishi, sombi ushomeka, makani ayo taayubululiiwo.

¹⁴ Na taaku butanjilili, mushobo ulafwa, sombi na kuli beshikupandako maano baanji, ncakwiila mushobo ulakoma.

¹⁵ Uyo woonse washomesha kulipilila umwi muntu nkongole, ncakwiila ulaakupengelaamo, sombi uyo ukaka kucita boobo ulibo kabotu.

¹⁶ Mwanakashi ucite nkumbu ulalemekwa, sombi basankwa beshilunkutwe baleelabo mukubila.

¹⁷ Muntu ucite nkumbu ulalambulwa pankumbu shakwe, sombi muntu shilunkutwe ulalipensha mwiine.

¹⁸ Bamucita shibi taaku mpindu njebapekwaawo, sombi bacita shiluleme balapekwa shilambu.

¹⁹ Muntu uyo utolelela kucita shiluleme ulaba abuumi, sombi utolelela kucita shibiibi ulaakufwa.

²⁰ Mwaami Lesa ulipatite bacite miyeeyo ya bubi, sombi ulasangalalila mubaabo batacite tumpenda.

²¹ Amwishibe ayi bamucita shibi balaakupekwa mulandu, sombi baluleme teshi bakapekwewo mulandu.

²² Mwanakashi mubotu utondesha buluya mumicito yakwe ulibo anga nininga ifwalikwa nkumba kunshono.

²³ Miyeeyo ya muntu ululeme ilatola kushibotu, sombi kulangila kwa mucita shibi kuleela mubukali bwakwe Lesa.

²⁴ Bamwi mbeshi kwaaba, nakubi boobo balabila. Bamwi mbakokonyo, nakubi boobo tababiliiwo.

²⁵ Muntu shikwaaba ulapekwa coolwe cakuswitilila, ucafwa bamwi, ulaakucafwikwa alakwe.

²⁶ Bantu balashingana muntu ukasha kuulisha shili anga ngamaila, sombi balalumbaisha muntu uyo ushuulisha.

²⁷ Muntu uyandoola shibotu ulashicana, sombi uyo ucita shibiibi, shilamuboolela mwiine.

²⁸ Uyo woonse ucinka manungo mububile bwakwe ulawa, sombi baluleme balaswitilila anga nkusonsa kwa matewu acilimo.

²⁹ Muntu uyo upensha bamuŋanda yakwe ulalibulisha coolwe, abalo baluya bananooba basebenshi lyoonse ba basongo.

³⁰ Cisepo ca bululami mbuumi. Uyo utanjilila bantu kubululami ngumusongo.

³¹ Ono na baluleme balalambulwa kweelana ambobeelete pacishi ca panshi cino, ino kubantu bateshi Lesa abamucita shibi cilaakweela kuli?