Tushimpi 10 - Baibo Busansulushi Bwa Libuku Ili

Tushimpi tumwi twakwe Solomoni

¹ Utu ntushimpi tumwi twakwe Solomoni. Mwaana musongo ulasangalasha baishi, sombi mwaana muluya ulalensha buumba banyina.

² Buboni bucaninwa munshila ibiibi tabucite mpindu, sombi bululami bwalo bulapulusha muntu kulufu.

³ Mwaami Lesa talekeleli ululeme ayi afwe kunsala, sombi mucita shibi lakwe taamuleeki ayi acane nshaasuni.

⁴ Maansa atolo alaletela bukandu, sombi maansa acabeene kumilimo alabilisha.

⁵ Mwaana utebula shishango shakwe cilimo, ngumusongo, sombi uyo woona ciindi cakutebula ulalensha nsoni.

⁶ Coolwe cilapekwa kumuntu ululeme, sombi maswi a mucita shibi alashisa mibo yakwe ya lunkutwe.

⁷ Bantu baluleme balayeeyekwa anga ncoolwe, sombi lakwe mucita shibi ulaakufwambaana kulubwa.

⁸ Moyo wa musongo ulanyumfwila milawo, sombi uyo waamba shabuluya, ulaakunyonyoolwa.

⁹ Muntu ushomeka uleenda cakubula kulisukama, sombi uyo ucite nshila shipilingene, ulaakushibikwa.

¹⁰ Muntu ukamwita kumeenso, ngushikuleta shimfulunganya, sombi uyo ululikilabo limwi bantu, ulaleta lunyumfwano.

¹¹ Maswi a muntu ululeme nkantupu ka buumi, sombi maswi a mucita shibi alashisa mibo yakwe ya lunkutwe.

¹² Lupato lulalengesha kwaambana, sombi lusuno lulapa kulekelela shilubo shoonse.

¹³ Muntu musongo ulaamba shintu sha maano, sombi musako ngwakukwipishako muntu muluya.

¹⁴ Bantu basongo balasunga lushibo loonse ndobakonsha kucana, sombi na baluya baamba, ingayi kunyonyooka kulibo pafwaafwi.

¹⁵ Buboni bwa bantu babile, ndyelilinga lyabo, sombi bupenshi bulanyonyoola bakandu.

¹⁶ Cilambu ca muntu ululeme mbuumi, sombi mpindu ya bamucita shibi nkupekwa mulandu.

¹⁷ Muntu woonse unyumfwila kululikwa ulaba abuumi, sombi uyo utasumini ayi ulilubite, ulasoweka.

¹⁸ Muntu ushisa lupato lwakwe ngumubeshi. Uyo woonse ubekesha mubye ngumuluya.

¹⁹ Apo paambwa maswi aanji tapabulilili kubisha, sombi uyo uumuna ngumusongo.

²⁰ Maswi a muntu ululeme, ali anga ngusilifa wiine wiine, sombi miyeeyo ya mucita shibi teecite mpindu.

²¹ Maswi a muntu ululeme alacafwa bantu baanji, sombi baluya balafwa ceebo cakubula maano.

²² Coolwe ciswa kuMwaami Lesa ncecipa muntu kubila, alimwi milimo ya muntu uyo teekoonshi kwiilikaawo cili coonse.

²³ Muluya ulasangalalila mukucita shintu shibiibi, sombi ucite maano akunyumfwisha shintu ulasangalalila mubusongo.

²⁴ Bamucita shibi balapekwa shintu isho nshebaloonda, sombi baluleme balatambula shoonse nshebasuni.

²⁵ Cipuupu ndicisa cilatolelesha abamucita shibi, sombi baluleme balacaala mobakeemikanina.

²⁶ Bweenka waini usasite mboopa buwe kumeeno, nabi bweenka bwiishi mbobucisisha meenso, mbweeke ubo mutolo mbwaacisisha moyo wa muntu wamutuma.

²⁷ Kuloonda Mwaami Lesa kulafusha nshiiku kubuumi pacishi, sombi buumi bwa mucita shibi bulafwiimpishikwa.

²⁸ Kulangila kwa baluleme kulabaletela kusangalala, sombi shilangila bamucita shibi tashicitiki.

²⁹ Mwaami Lesa ngoofuna baluleme, sombi bamucita shibi ulabanyonyoola.

³⁰ Baluleme teshi bakakushikweemo mucishi, sobwe, sombi bamucita shibi balaakukushikwaamo.

³¹ Mumulomo wa muntu ushomeka mulaswa shintu sha busongo, sombi mulaka waamba shibiibi ulaakutimbulwa.

³² Mulomo wa muntu ululeme ulishi ceelete kwaambikwa, sombi mulomo wa mucita shibi ulishibo kwaamba shibiibi.