Tushimpi 1 - Baibo Busansulushi Bwa Libuku Ili

Mpindu icanwa mutushimpi

¹ Utu ntushimpi twakwe Solomoni mwanaakwe Defedi, mwaami wa bene Isilaeli.

² Twakalembelwa kwaamba ayi bantu babe basongo balilemeka akwaamba ayi banookonsha kunyumfwisha makani abusongo.

³ Tushimpi tuleeisha kwikala cabusongo, kucita shintu shiluleme, koombolosha cakululama alimwi cakubula kasalulushi.

⁴ Tulapa maano bantu bataaku mbobabete, akupa bacikula bwangu lushibo lwakucita shintu sheelete.

⁵ Tushimpi tulalengesha muntu musongo kunungawo maano alimwi akutanjilila baabo beeite

⁶ kwaamba ayi banyumfwishe tushimpi ashikoshanyo alimwi akunyumfwisha myaambo atulabi twa basongo.

Kucenjesha kubacikula bwangu basankwa

⁷ Kuloonda Mwaami Lesa ngomatalikilo a lushibo, sombi balo baluya balanyansha busongo akukaka kulilemeka.

⁸ Omwanaangu, kokutika shitookufunda baiso, akutanyansha shitokwiisha banyoko.

⁹ Ceebo kwiisha kwabo kulaakubotesha mibo yako bweenka cisoti mbocikubotesha kumutwi akancetani munshingo.

¹⁰ Omwanaangu, na bamucita shibi bakuyungoola, webo utabakonkeleshi napaceyi.

¹¹ Cimwi ciindi inga bakwaambila ayi, “Kosa kuno atubelaminewo muntu tumucaaye, atuyubilile akuuma bantu nabi tabacite milandu!

¹² Atubamiine bweenka mbuli cuumbwe, ee, kubamina bakabumbulu mbuli bantu baya mukufukilwa.

¹³ Lyalo tulaakuba abuboni buunji akususha maandeesu ashintu nsheshi tukasaale.

¹⁴ Ono katiyabo soonse, tutokwaabana nsheshi twiipe.”

¹⁵ Omwanaangu, kutasumina kweenda abantu ba mushobo uyo. Kuteelesha nabi paniini kukonkela nshila shabo

¹⁶ ceebo balo tabacelwi kucita shintu shibiibi. Ncakwiila mbantu bafwambaana kutila bulowa.

¹⁷ Mbukaluyaluya kuteya koose bayuni mbootooyanda kucaya kabakubwene.

¹⁸ Bantu aba balayubilila bulowa bwabo beene, ndushinisho balaliteyabo toose beene.

¹⁹ Aya ngomeelelesho a bantu boonse bakakatila kubilila mubwiipi. Ee, buboni bwa mushobo uyo bulakwempula buumi bwa babulangoola.

Kucenjesha kwa busongo

²⁰ Busongo butokwiita mumikwakwa. Butokoolobesha mumisena icanika bantu baanji.

²¹ Butokoolobesha pamampambaanwa a mikwakwa alimwi apaminjililo ya ndabala.

²² Butokwaamba ayi, “Ino mwebo nobaluya, anu mulaakucileka lili kwikala mubuluya bwanu? Anu mwebo nobeshikucelebula mulaakucileka lili kusangalalila mukucelebula kwanu? Anu nobaluya mulaakucileka lili kusuula lushibo?

²³ Nimwakanyumfwila kukalooka kwangu, naakwiinga ndamwaambila shili mumoyo wangu alimwi akumulwiita nsheentooyeeya.

²⁴ Ndindakamwiita mwakankakila. Taaku muntu nabi womwi wakanyumfwila ndindakamulabula.

²⁵ Mwakasuula shoonse nshendakamufunda akukaka kunyumfwa kukalooka kwangu.

²⁶ Paceebo ceeco anebo ndaakumuseka mwaakuba mumapensho akumuwela mwakupolelwa shilensha boowa.

²⁷ Nkokwaamba ayi shilensha boowa shaakumupolela anga ncipuupu, ee, mapensho aakumupyanga anga nkapupuulwa, ncakwiila mwaakulimbwa mapensho amakatasho.

²⁸ “Mwaakunjita ciindi ico teshi nkamukumbulewo. Mulaakunyandoola, sombi teshi mukambonewo.

²⁹ Mwakalinga kusuula lushibo lyoonse alimwi akukaka kuloonda Mwaami Lesa.

³⁰ Mwakasuula shoonse nshendakamufunda akukaka kunyumfwila kukalooka kwangu.

³¹ Paceebo ceeco mulaakulya shisepo sha milimo yanu akukuta shisepo sha micito yanu.

³² Bantu batacite maano balafwa ceebo cakusuula busongo. Baluya balanyonyoolwa ceebo cakulishoma beene.

³³ Sombi abo boonse banyumfwila ndime, balekala kwakubula cakulisukama. Balekala muluumuno kwakubula cakuloonda nabi comwi.”