Taitasi 3 - Baibo Busansulushi Bwa Libuku Ili

Buumi bwa buKlistu

¹ Ibalusha bantu bako ayi banoonyumfwila bamaami abeendeleshi. Banoobakonkela akulibambila kucita milimo yoonse kabotu kabotu.

² Ubalwiite ayi batanokwaambila muntu shibiibi nabi womwi, sombi kuba beshiluumuno, beshikulibombya alimwi bacite bulemu kumuntu woonse.

³ Ceebo nabi swebo sobeene twakalinga baluya, batanyumfwili alimwi balubite. Twakalinga basha ba lunkumbwa lwa mubili alimwi ashakulisangalasha shipusenepusene. Twakalinga kwikala mubuumi bwa miyeeyo ya lupato amunyono. Bantu bakalinga kutupatite aswebo katubapatite.

⁴ Sombi nkumbu alusuno lwakwe Lesa Mupulushi wesu ndishakayubululwa,

⁵ wakatupulusha. Taakwe kucita boobo mukwiinga twakacita shintu shibotu, sombi ceebo ca nkumbu shakwe. Wakatupulusha kwiinda mukusanshikwa kwa kushalwa cipya alimwi abuumi bupya muMushimu Usalashi.

⁶ Lesa wakatupa Mushimu Usalashi camaansa obilo kwiinda muli Jesu Klistu Mupulushi wesu.

⁷ Wakacita boobo ayi tululamikwe muluse lwakwe akwinjila mubuumi butamaani ubo mbotutoolangila.

⁸ Makani aya ngalushinisho. Ndisuni ayi shintu ishi ushiishe cankusu kwaamba ayi bashoma muli Lesa balibeenge mumicito ibotu, iyo ibotela akucafwa bantu boonse.

⁹ Sombi webo swa kukupikishanya kwabuluya, makani amashalane, kwaambana akupikishanya shaMilawo ceebo ishi tashicafwi alimwi taaku mboshibete.

¹⁰ Muntu uleta kupansaana palikoto lyanu umucenjeshe mankanda obilo, kuswawaawo umusuule.

¹¹ Ulishi ayi muntu wa mushobo uyo ngushishibi alimwi shibiibi shakwe shatondesha kale ayi ulilubite.

Milasho yakweelaako

¹² Ndaakutuma Atemasi nabi Taikikasi kuli ndiwe, ukeeleshe cankusu kwisa kuli ndime muNikopolisi mukwiinga nkontooyeeya kuya mukwikala ciindi ca mupewo.

¹³ Elesha cankusu kucafwa Senasi ucishi milawo aApolosi mulweendo lwabo, akubona ayi shintu shoonse shiyandika kuli mbabo shakwana.

¹⁴ Bantu besu balyeelete kwiiya kusebensesha ciindi mukucita shintu shibotu, kwaamba ayi bacafwilishe mushintu shiyandika cancinencine, kuteshi kwikala buumi butacite mpindu.

¹⁵ Boonse mbondyaabo bamwaansha. Utwaanshisheko babyeesu mulushomo. Luse lwakwe Lesa lube amwebo noonse.