Taitasi 1 - Baibo Busansulushi Bwa Libuku Ili

¹ Ndime Paulo musebenshi wakwe Lesa alimwi mutumwi wakwe Jesu Klistu. Ndakasalwa kwaamba ayi njumye lushomo lwa baabo Lesa mbwaakasala akubatanjilila mukwishiba shalushinisho isho shiletela buumi bwa buLesa.

² Lushinisho ulu luliimfwi pakulangila buumi butamaani ubo Lesa utabeci mbwaakatushomesha kale kale.

³ Mpeeke paciindi ceelete wakayubulula kushomesha uko mumakani akwe. Makani ayo wakaabika mumaansaangu, aboobo ndaashimikila kweelana aLesa Mupulushi wesu mbwaakandwiita.

⁴ Ntoolembela ndiwe Taitasi omwanaangu wancinencine mulushomo ndotucite. Luse aluumuno shibe awebo kuswa kuli Lesa Ishiwesu aKlistu Jesu Mupulushi wesu.

Milimo yakwe Taitasi kuKileti

⁵ Ncendakakushiila kuKileti nkwaamba ayi ululike shoonse shakalinga kuyandika kubamba akubika bamatanjilili ba shoonde mumandabala oonse kweelana ambondakakulwiita.

⁶ Mutanjilili ulyeelete kuba muntu utacite kampenda, weebetebo mwanakashi womwi alimwi bana bakwe balyeelete kuba bashomi kuteshi bacite mpuwo yakucita shintu shibiibi nabi kutanyumfwa.

⁷ Ono ceebo mutanjilili wa coonde utokweendelesha mulimo wakwe Lesa, ulyeelete kubula kampenda. Taaelete kuba muntu ulyuuma mucaamba, ufwambaana kukalala, cakolwa, mukali nabi usunishi buboni.

⁸ Ulyeelete kuba muntu utambula beensu alimwi uyanda kucita shibotu, ulitibuka, ululeme, usalalite alimwi ulilama.

⁹ Ulyeelete kucata camaansa obilo kumakani ashomeka kweelana ambwaakeeishikwa, ayi ayumyeyumye bamwi kwiinda mulushinisho alimwi akululika baabo balupikisha.

¹⁰ Ceebo mbaanji baashu abo beshikwaambabo akubeca bantu, bunene bunene abo bamulikoto lya baabo beshikupalulwa.

¹¹ Aba balyeelete kukashikwa mukwiinga batoonyonyonganya bamumaanda boonse mbobapolela kwiinda mukwiisha shintu isho nshebateelete. Balacita boobo kwaamba ayi babilile mpawo.

¹² Umwi mulaluki wabo beene wakaamba ayi, “Lyoonsebo bene Kileti mbabeshi, mbabiibi anga mbanyama, mbalyabi alimwi mbatolo.”

¹³ Bukamboni bwakwe mbwalushinisho. Paceebo ceeco ubakalalile cankusu kwaamba ayi balulame mulushomo

¹⁴ alimwi ayi bacileeke kukutika shatushiyashiya twa baJuda amilawo iswa kubantu bakaka shalushinisho.

¹⁵ Shintu shoonse shilisalalite kubantu basalalite, sombi kubaabo batasalalite akutashoma, shintu shoonse tashisalalite, mukwiinga miyeeyo amyoyo yabo njibiibi.

¹⁶ Balaamba ayi Lesa balimwishi, sombi micito yabo ilakaka sheesho nshebaamba. Balafundoosha kumoyo alimwi tabanyumfwili Lesa, aboobo tabeeleli kucita cintu cibotu nabi comwi.