Shikushimikila 9 - Baibo Busansulushi Bwa Libuku Ili

¹ Shintu shoonse ishi ndakashikutumanina akubona kwaamba ayi Lesa ngooendelesha shoonse shicita basongo abaluleme. Nkokwaamba ayi taaku ushi citoosa kunembo lyakwe, lusuno nabi lupato.

² Boonse balacitikilwa shintu sha mushobo womwi, baluleme abamucita shibi, babotu abaabo bataciti shibotu, basalalite abatasalalite kweelana aMilawo, babenga milambu abaabo batabengi. Bweenka mbocibete kumuntu mubotu, mbweeke ubo mbocibete akumucita shibi. Bweenka mbocibete kubaabo bashomesha cakulumbila, mbweeke ubo mbocibete akubaabo baloonda kushomesha.

³ Ici mbobubi buli mushintu shoonse shicitika pacishi ca panshi. Shoonse cililo ca nkumo ncimwi. Kulilabo na bantu bacili boomi, balayeeya shintu shibiibi alimwi ashabushincinko. Lyalo kumeelelesho balafwa.

⁴ Muntu woonse ucili muumi mucishi ca panshi inga kapali kulangila cibotu. Ncakwiila kabwa muumi ngumubotu kwiinda nkalamu ifwite!

⁵ Bantu boomi balishi ayi balaakufwa, sombi bafwite balo taaku ncebeshi. Taaku cilambu ncebakonsha kupekwa, camana balubwa!

⁶ Lusuno lwabo, lupato alimwi amunyono, shoonse shakamana. Ncakwiila taaku nceshi bakabeeko lubasu alimwi mucishi cino ca panshi.

⁷ Kolya shakulya shako akusangalala, konwa waini wako amoyo wakusangalala mukwiinga cino nceciindi Lesa ndyaakondwa amicito yako.

⁸ Kofwala shakufwala shacipaale lyoonse alimwi kuteenda amisusu itabikitwe mafuta.

⁹ Sangalala mubuumi amukaako uyo ngoosuni munshiku shoonse sha buumi bwako ubo butaaku mbobubete alimwi ubo bwakakupa Lesa pacishi cino. Usangalale mubushiku bomwi abomwi ubo butaaku mbobubete ceebo ico ncecilambu cako ciswa mukuyuwaana kwako pano pacishi ca panshi.

¹⁰ Mulimo woonse wapolela mumaansaako, usebense cankusu mukwiinga mucuumbwe momutooya taaku kusebensa, kupanga miyeeyo, lushibo nabi busongo.

¹¹ Kuli acimwi cintu ncendakabona pacishi ca panshi. Mulubilo lwakushiyana teshibo baabo boobite kumyeendo bashiya bamwi. Teshibo bayumu bakoma munkondo. Teshi basongo bacana shakulya lyoonse. Teshi bacenjete bacana buboni lyoonse alimwi teshi beeite basumpuka lyoonse, sombi boonse balashamwa pashiindi shipusenepusene.

¹² Peculu lya waawo, taaku muntu ushi ciindi cakwe. Bweenka mbuli nswi shacatwa mukoombe nabi bayuni bacatwa mukoose, mbweeke ubo bantu balacatwa mutoose twa shiindi sha bubi isho shibapolela kabateengashite.

Miyeeyo pabusongo abuluya

¹³ Ndakabona pano pacishi ca panshi cikoshanyo cibotu ico cakabonesha busongo mbobuyeeyelwa.

¹⁴ Kwakalinga ndabala iniini iyo yakalinga kucite bantu baniini. Ono mwaami wa nkusu wakaya mukulwana ndabala iyo. Wakaya weeshinguluka akupanga mwakutantila pakulwana.

¹⁵ Umo mundabala mwakalinga musankwa mukandu, sombi kaali musongo. Uyo musankwa wakafuna ndabala iyo mubusongo bwakwe. Sombi taaku muntu wakayeeya mukandu uyo, sobwe.

¹⁶ Nebo lyoonse ndaamba ayi busongo mbubotu kwiinda nkusu. Sombi taaku nabi womwi uyeeya mukandu ayi ngumusongo nabi ubika maano kushintu nshaamba.

¹⁷ Maswi akutepeta a musongo alanyumfwika kwiinda koolobesha kwa muleli wa baluya.

¹⁸ Busongo mbubotu kwiinda shakulwanisha sombi mucita shibi womwi ulanyonyoola shintu shibotu shiinji.