Shikushimikila 8 - Baibo Busansulushi Bwa Libuku Ili

¹ Ngani uli anga ngumusongo? Ngani weenga weshiba kusansulula shintu shoonse? Busongo bulalengesha muntu kusangalala alimwi bulamana mikonya pameenso akwe.

Shakunyumfwila mwaami

² Kamunyumfwila caamba mwaami mukwiinga wakashomesha cakulumbila kunembo lyakwe Lesa ayi ulaakunoocita boobo.

³ Ulyeelete kufwambaana kuswa muliimfwa lyakwe na cikani tacitoomusangalasha ceebo ulakonsha kucita cili coonse ncaasuni pali ndiwe.

⁴ Cintu ceenga caamba mwaami cilaba bweenka ubo ceebo ulicite nkusu, ino ngani weenga wamwaambila ayi, “Nciinshi ncemutoocita nobaami?”

⁵ Uyo woonse ukonkela milawo yakwe teshi akacane mulandu. Musongo uleshiba ciindi ceelete anshila yakucitilamo boobo.

⁶ Ceebo kuli ciindi ceelete anshila yakucitilamo shintu shoonse, nabi mapensho akomene buyani apolela muntu.

⁷ Ceebo taaku muntu ushi shakunembo, ino ngani weenga wamulwiita ceshi cikacitike bwaakuca?

⁸ Taaku muntu ucite nkusu shakwiimika muuwo. Mbweeke ubo taaku muntu ucite nkusu shakukasha lufu lwakwe. Bweenka shilumamba mbwaatakonshi kutandwa muciindi ca nkondo, mbweeke ubo bubi teshi bukafuune baabo babucita.

Bamucita shibi abaluleme

⁹ Ndakabona shintu isho shoonse ndindakayeeya shicitwa pacishi ca panshi. Kuli ciindi muntu ndyaatondesha nkusu nshaacite pabamwi akulicisa mwiine.

¹⁰ Ndakabona bamucita shibi kababikwa mushuumbwe. Bantu abo bakalinga kwinjila akuswa mumusena usalalite alimwi akulumbaishikwa mundabala inene umo mobakalinga kucitila shibiibi isho. Ici acalo taaku mbocibete.

¹¹ Na beshimilandu bacelwa kupekwa milandu, bantu baanji balatalika kuyeeya kucita shintu shibiibi.

¹² Mucita shibi inga wacita milandu ili mwaanda akwikala buumi bulaamfu, nabi bamwi balaamba ayi, “Na muntu walemeka Lesa, shintu shoonse shilaakumweendela kabotu.

¹³ Sombi shintu tasheendeliwo kabotu mucita shibi alimwi buumi bwakwe teshi bukalaampe buya cilaampa cimfule ceebo taalemeki Lesa.”

¹⁴ Kuli cintu acimwi citaaku mbocibete pacishi ca panshi. Kuli baluleme abo bapekwa milandu yeelete bamucita shibi, abalo bamucita shibi balapekwa shilambu sheelete baluleme. Acalo ici taaku mbocibete.

¹⁵ Anu bulya nebo ndashinisha kwaamba ayi muntu ulyeeletebo kusangalala mukwiinga taaku cibotu cicanika pano pacishi ca panshi kwiinda kulya, kunwa alimwi akusangalala. Na wacita boobo, ulaakunoosangalete mumilimo ya nshiku shoonse sha buumi bwakwe ubo Lesa mbwaakamupa pacishi ca panshi.

¹⁶ Ndindakalinga kuyandoola busongo akulangishisha mulimo ucita muntu pacishi ca panshi, ndakabona ayi nabi ndabuula koona malumwi amashiku,

¹⁷ inga ndaalilwa kwishiba isho Lesa nshaakacita. Taaku nabi womwi uyo weenga wandwiita shicitika pacishi ca panshi. Nabi muntu weelesha buyani cankusu kwaamba ayi eshibe shintu sha mushobo uyo, taakoonshi kwishiba mboshibete. Nabi musongo waamba ayi ulishishi, ncakwiila taakoonshi kushinyumfwisha.