Shikushimikila 7 - Baibo Busansulushi Bwa Libuku Ili

Miyeeyo pabuumi

¹ Mpuwo ibotu ileenda pamafuta anunkila kabotu, abushiku bwakufwa mbubotu kwiinda bushiku bwakushalwa.

² Ncibotu kuya kuŋanda ya malilo kwiinda kooko kuli kusekelela mukwiinga lufu ngomeelelesho a muntu uli woonse. Bantu boomi balyeelete kuyeeya pacikani ici.

³ Buumba mbubotu kwiinda kuseka mukwiinga nabi ciwa kacuungumene moyo inga kaukondetwe.

⁴ Moyo wa musongo ulayeeyabo shalufu, sombi moyo wa muluya ulayeeyabo shakulisangalasha.

⁵ Ncibotu kunyumfwa musongo kaakukalookila, kwiinda kunyumfwa muluya kaakulumbaisha munyimbo.

⁶ Kuseka kwa muluya, kuli anga njimyuumfwa itootataala mumulilo kuunshi lya citentu. Ici acalo taaku mbocibete.

⁷ Kulyatilila kulakonsha kulengesha musongo kuba muluya. Akwalo kutambula makulo kulanyonyoola moyo wa muntu.

⁸ Kumana kwa cintu cili coonse nkubotu kwiinda matalikilo a ncico. Kukomenya moyo nkubotu kwiinda kulisumpula.

⁹ Utafwambaani kukalala mumoyo wako ceebo bukali bulacanwa kubaluya.

¹⁰ Uteepushi ayi, “Ceebonshi ciindi cakalekale cakalinga cibotu kwiinda cecino?” Uyo teshi mwiipusho weelete kwiipusha musongo.

¹¹ Busongo mbubotu anga mbuboni bwakupyana mukwiinga bulacafwa baabo bacili boomi.

¹² Busongo bulafuna kushintu shiinji bweenka bufuna maali, ee, bulafuna buumi bwa wooyo ubucite. Ncakwiila iyo njempindu ya lushibo.

¹³ Koyeeya isho shakacita Lesa. Ngani weenga woolola cintu ncaakakonkomeka kale?

¹⁴ Na shintu shakweendela kabotu, kosekelela. Ono na shakweendela cibiibi, ibaluka kwaamba ayi Lesa ulalengesha shintu shobilo isho kucitika. Aboobo muntu taakoonshi kwishiba buumi bwakwe bwakunembo.

¹⁵ Mubuumi bwangu ubu butaaku mbobubete ndakabona shintu shobilo ishi: Muntu ululeme ulafwa cakufwambaana mubululami bwakwe, sombi mucita shibi ulekala buumi bulaamfu mububi bwakwe.

¹⁶ Utalulami cakwiindilisha alimwi uteendilishi kuba musongo. Ceebonshi utooyanda kulinyonyoola omwiine?

¹⁷ Uteendilishi kuba mucita shibi alimwi utabi muluya. Ceebonshi utooyanda kufwa ciindi cako kacitana kukwana?

¹⁸ Ncibotu kucata comwi cakutapusumusha cimwi. Muntu ulemeka Lesa ulakonsha kucita boobo.

¹⁹ Busongo bulapa muntu womwi nkusu kwiinda baleli bali likumi mundabala.

²⁰ Taaku muntu ululeme pacishi ca panshi uyo ucita shintu shiluleme, kutabishaawo napaceyi.

²¹ Utanookutika maswi oonse ayo bantu ngobaamba mukwiinga bumwi bushiku inga wanyumfwa musebeshi wako kaakushingana.

²² Webo omwiine ulishi ayi wakashingana bamwi mankanda aanji.

²³ Ndakasebensesha busongo bwangu kweelesha shintu ishi shoonse. Ndakayeeya kuba musongo, sombi ici cakanyinda ciimo.

²⁴ Busongo nabi buli buyani, nciyumu abuumbi kwaamba ayi tubunyuumfwe. Ino ngani ukonsha kubucana?

²⁵ Aboobo nebo ndakalyaaba ayi nyumfwishe shintu. Ndakalinga kusuminite kulangoola busongo abukumbulo kumiipusho yangu. Ndakalinga kusuni kunyumfwisha buluya bwa bubi alimwi akucinkuka kuli mubuluya.

²⁶ Ndibwene cintu cibiibi kwiinda lufu. Cintu ico ngumwanakashi uyo uli anga nkoose. Ncakwiila mwanakashi uyo ucite moyo uli anga ncinsaala. Maansaakwe ali anga nincetani. Musankwa usangalasha Lesa ulakonsha kumuleya, sombi mucita shibi ulaakumucatisha mukoose kakwe.

²⁷ Shikushimikila utokwaamba ayi, “Bona, nceeci ncendakacana: ndeeya cintu comwi comwi kwaamba ayi njiye shintu mboshibete.

²⁸ Ndalema kuyandoola, sombi ndaalilwa kucana nshila. Ndakacana musankwa uyo ululeme pakati ka bantu bakalinga cuulu. Sombi nshikwe kucanawo mwanakashi ululeme nabi womwi pakati kabo.

²⁹ Ncendakacanabo nceeci: Lesa wakalenga muntu kaaluleme, sombi bantu beene balipilinganya ashintu shiinji.”