Shikushimikila 6 - Baibo Busansulushi Bwa Libuku Ili

¹ Kuli bubi bumwi mbondakabona pacishi ca panshi buli bunene bunene pabasankwa.

² Lesa ulapa muntu bubile, buboni alimwi abulemu, kwaamba ayi abe ashintu shoonse nshaasuni. Sombi Lesa taamuleeki kwaamba ayi asangalale muli nshisho. Muntu umwi ngweshi akasangalalileemo mumusena wakwe. Ici acalo taaku mbocibete. Mbubi bucisisha moyo.

³ Muntu ulakonsha kuba abaana bali mwaanda akwikala myaaka iinji. Sombi na wabula kusangalala mukuswitilila kwakwe nabi na wabula kulilwa kabotu, nebo ndaamba ayi kafunga nkabotu kwiinda nguwe.

⁴ Kafunga kaleendililabo mumunshinshe. Uko kalaya mukulubwa.

⁵ Takakwe kubonawo lisuba nabi kwishibawo cili coonse, sombi kalaya mukookesha kwiinda muntu uyo,

⁶ nabi muntu uyo wekala myaaka ili shuulu shobilo kwakubula kusangalalilawo mukuswitilila kwakwe. Ncakwiila boonse bobilo balaya kumusena womwi.

⁷ Milimo njaacita muntu njakwaamba ayi acane cakulya. Nakubi boobo taakuti napaceyi.

⁸ Anu musongo uleendawonshi pamuluya? Ino mukandu nimpindunshi njaacana mukwishiba bwakulilemeka kunembo lya bamwi?

⁹ Ncibotu kusangalala mucintu ciliiwo kwiinda kunookumbwa ncootacite. Acalo ici taaku mbocibete, cilibo anga nkutandaanya muuwo.

¹⁰ Ico coonse ciliiwo cakaambwabo kalekale ayi cibeewo. Swebo sobantu tulishi mbotubete, sombi taaku muntu ukonsha kupikisha wooyo umwiinda nkusu.

¹¹ Mukwaamba maswi aanji aanji, ndyetwaamba shamaano shiniini. Ino ico cilacafwanshi kumuntu uli woonse?

¹² Buumi bwa muntu mbufwaafwi alimwi taaku mbobubete. Ncakwiila buleendabo anga ncimfule. Ino ngani ushi cibotu kuli nguwe? Ngani weenga wakonsha kwishiba ceshi cikacitike pacishi ca panshi lakwe aakufwa?