Shikushimikila 5 - Baibo Busansulushi Bwa Libuku Ili

Kamucenjela pakulambila Lesa

¹ Kamucenjela ndyemuya muŊanda yakwe Lesa. Ncibotu kuya kuŊanda yakwe Lesa mukwiiya kwiinda kuya mukubenga milambu bucita baluya bateshi cibotu acibiibi.

² Mutanoofwambaana kwaamba nabi kushomesha cakufwambaana kuli Lesa. Lesa uli kwiculu mwebo muli pacishi ca panshi. Aboobo maswi akwaamba kaaceya.

³ Bweenka muntu ucite shakulisukama shiinji mbwaakonsha kulota cibiibi, mbweeke ubo kwaamba maswi aanji mbokukonsha kwaambisha muntu shiteelete.

⁴ Na washomesha cakulumbila kuli Lesa, utacelwi kucita kweelana ambowakashomesha ceebo Lesa taasangalalili mubaluya. Ncakwiila ucite kweelana ambowakashomesha cakulumbila.

⁵ Ncibotu kutashomesha cakulumbila kucita cimwi cintu kwiinda kushomesha, sombi wabula kucita ncewakashomesha.

⁶ Utasuminishi mulomo wako kukunjisha mucibiibi. Utaambili mupailishi ayi, “Ndakalubisha kushomesha cakulumbila.” Ceebonshi ulisuni ayi Lesa akakalale pashintu nshewaamba akunyonyoola milimo ya maansaako?

⁷ Kubumba sha muluuwo amaswi aanji taaku mboshibete. Anu cibotubo nkuloonda Mwaami Lesa.

Bubile taaku mbobubete

⁸ Na waboona muntu mupenshi kaalyatililwa mucishi akumulita masuku pamutwi mushintu shoonse, utakankamani. Ceebo wacinenenene womwi uleendeleshekwa kuumwi umwiindaawo alimwi boonse bobilo aba kuli bacinenenene babeendelesha.

⁹ Balimi boonse balabwesaako shiswa mumyuunda yabo sombi ngumwaamibo ubona mpindu ya myuunda iyo.

¹⁰ Uyo woonse usuni maali teshi akacanewo ngweenga waamba ayi afula. Uyo woonse usunishi buboni teshi akacanewo mbweshi akaambe ayi bwafula. Ici acalo taaku mbocibete.

¹¹ Na buboni bwafula abalo beshi kubulya balafula. Ono nimpindunshi njeshipa mwinesho kwiinda kunoolangoobo meenso?

¹² Tulo twa muntu uyuwaana kusebensa, ntubotu abuumbi. Sombi kufula kwa buboni bwa muntu mubile kulamulengesha kutanootukupulaawo napaceyi.

¹³ Kuli bubi bucisisha moyo mbondakabona mucishi ca panshi Buboni bucanwa, sombi kabutacite mpindu kumwinebo,

¹⁴ nabi buboni bunyonyooka kwiinda mukubula coolwe, cakwaamba ayi na ulicite mwaana musankwa, wabula ancaacaasha ayi apyane.

¹⁵ Muntu ulaswa maansabo mumala muli banyina, ono bweenka mbwaakesa, mbweshi akaye aakufwa. Taaku nabi comwi ncaatolelela kuswa kumilimo yakwe, ncakwiila taaku nabi comwi ncaafumbatilawo mulyaansa.

¹⁶ Ici acalo mbubi bucisisha moyo. Bweenka muntu mbwaakesa, mbweshi akaye aakufwa. Ino ono nimpindunshi njaacanaamo ceebo milimo yakwe ilyeelenebo akutandaanya muuwo?

¹⁷ Nshiiku sha buumi bwakwe shoonse nsha mumunshinshe amubuumba, ee, mukulisukama, mumapensho alimwi amubukali.

¹⁸ Kuswawaawo ndakayeeya ayi cintubo ciindaawo kubota muntu nceenga wacita nkulya, kunwa akusangalala musheesho nshaakayuwila pacishi ca panshi panshiku shiniini sha buumi isho Lesa nshaamupa. Mukwiinga ico ncecipo ncaakapekwa.

¹⁹ Paceebo ceeco na Lesa wapa muntu bubile abuboni akumulengesha kwaamba ayi asangalale muli nshisho, ulyeelete kulumba akusangalala mushintu nshaakayuwila. Ici ncipo kuswa kuli Lesa.

²⁰ Muntu uyo taalisukami panshiku sha buumi bwakwe shiniini mukwiinga Lesa ulasangalasha moyo wakwe lyoonse.