Shikushimikila 4 - Baibo Busansulushi Bwa Libuku Ili

¹ Ndakalangilisha alimwi akubona kulyatililana kucitika pacishi ca panshi. Ndakabona minsonshi ya bantu balyatililwa, tebakalinga kucite abeshikuboombulusha. Ndakabona ayi nkusu shakalinga kubaabo bakalinga kubalyatilila. Ncakwiila tebakalinga kucite abeshikuboombulusha.

² Lyalo ndakaamba ayi abo bakafwa kale bali kabotu kwiinda batana kufwa.

³ Sombi mubotu kwiinda boonse bobilo ngooyo utana kushalwa ee, ngumuntu utana kubonawo bubi bucitwa pacishi ca panshi.

⁴ Ndakabona alimwi ayi milimo yoonse akuswitilila koonse kwa muntu shilaswa kulunkumbwa lwa munyono pamubye. Ono ici coonse taaku mbocibete, cilibo anga nkutandaanya muuwo.

⁵ Muluya ulalikumbata akunyonyoola buumi bwakwe kunsala.

⁶ Ncibotu kuba akaniini kooli muluumuno kwiinda kuba ashiinji mukusebensa amaansa obilo kweelesha kucata muuwo.

⁷ Ndakabona alimwi cintu cimwi citaaku mbocibete pacishi ca panshi.

⁸ Kwakalinga musankwa uyo wakalingabo eenka. Taakalinga kucitewo mwaana musankwa nabi mukwabo. Wakalinga kusebensa cakutookeshaawo, nakubi boobo taakwe kukondwa abubile ubo mbwaakalinga kucite. Wakeepusha ayi, “Ino ngani ngoontoosebensela? Ino ceebonshi ntoolikasha kusangalala?” Ici acalo taaku mbocibete, ee, uku nkupengelabo kapongo kafwite!

⁹ Bekala bobilo bali kabotu kwiinda muntu womwi mukwiinga bobilo balacana mpindu inene kwiinda womwi.

¹⁰ Na umwi wawa panshi, mubye ulamucafwa kunyamuka. Sombi mapensho kuli wooyo wawa utacite wakumubushaako.

¹¹ Bantu bobilo boona pantu pomwi, balakasaashanya. Sombi muntu woona eenka, inga walikasaasha buyani?

¹² Muntu womwi inga wakomwa, sombi bobilo balakonsha kulifuna. Lutambo lwakooswa amyaando yotatwe, talusutuki bwangu.

¹³ Ncibotu kuba acikula bwangu mukandu, sombi kaali musongo kwiinda kuba amwaami mucembele utanyumfwili kucenjeshekwa.

¹⁴ Nabi na taakwe kushalwa mumukowa wa bwaami, nabi wakaswa muntolongo alimwi kaali mukandu, inga waba mwaami.

¹⁵ Ndakabona bantu baanji mucishi ca panshi kabakonkela cikula bwangu uyo wakapyana bwaami bwa mwaami.

¹⁶ Bantu bakamukonkela tebakalinga kubelengekwa, sobwe. Sombi ndipakeenda myaaka, taaku nabi womwi wakalinga kumulumbaisha. Ici acalo taaku mbocibete, cilibo anga nkutandaanya muuwo.