Shikushimikila 3 - Baibo Busansulushi Bwa Libuku Ili

Shintu shoonse shilicite ciindi

¹ Shintu shoonse shicitika pacishi ca panshi shilicite ciindi ca nshisho.

² Kuli ciindi cakushalwa aciindi cakufwa. Kuli ciindi cakushanga aciindi cakutebula.

³ Kuli ciindi cakucaya aciindi cakushilika. Kuli ciindi cakumwaya aciindi cakuyaka.

⁴ Kuli ciindi cakulila aciindi cakuseka. Kuli ciindi cakuungumana aciindi cakushana.

⁵ Kuli ciindi cakumwaya mabwe aciindi cakwaabunganya. Kuli ciindi cakukumbata aciindi cakulikasha.

⁶ Kuli ciindi cakuyandoola aciindi cakucileka. Kuli ciindi cakusunga aciindi cakusowa.

⁷ Kuli ciindi cakukwamuna aciindi cakutunga. Kuli ciindi cakukutumana aciindi cakwaamba.

⁸ Kuli ciindi cakusuna aciindi cakupata. Kuli ciindi ca nkondo aciindi ca luumuno.

⁹ Ino nciinshi musebeshi ncaacana mukusebensa cankusu kwakwe?

¹⁰ Ee, mukuli uyo Lesa ngwaakabika pabantu, ndoobona.

¹¹ Wakalengesha shintu shoonse kubota mushiindi sha nshisho. Ono wakatupa miyeeyo yakusuna kwishiba shakunembo, sombi taatupi lushibo lukwene pashintu nshaakacita asheesho nsheshi akacite.

¹² Ndishi kwaamba ayi taaku cintu ciinda kubota kumuntu kwiinda kwikala kaasangalala akucita shintu shibotu mubuumi bwakwe boonse.

¹³ Cipo cakwe Lesa kumuntu nkulya, kunwa akusangalala musheesho nshaakayuwila.

¹⁴ Ndishi kwaamba ayi isho shoonse Lesa nshaakacita, shinanoolikobo kwalyoonse alyoonse. Taaku ceenga ceelikwaawo nabi kukushikwaawo pashintu isho. Ncakwiila Lesa wakacita shintu shoonse kwaamba ayi tunoomulemeka.

¹⁵ Shoonse shitoocitwa, shakacitikawo kale, ashalo isho sheshi shikacitike, shakacitikawo kale. Lesa ulalengesha cintu comwi kucitika lyobilo lyobilo.

¹⁶ Lyalo ndakabona cintu cimwi pacishi ca panshi. Pamusena wakoombolosheshaawo, bubi bwakalingaawo. Pamusena wakoombolosha cakutanyengelela, bubi bwakalingaawo.

¹⁷ Ndakayeeya mumoyo wangu ayi, “Lesa ulaakoombolosha baluleme abamucita shibi mukwiinga kulaakuba ciindi cakucitilawo shintu shoonse. Ee, kulaakuba ciindi ca micito yoonse.”

¹⁸ Kuboolaawo ndakayeeya ayi, “Bantu boonse Lesa ulabeelesha kwaamba ayi babone ayi balibo anga mbanyama.

¹⁹ Ceebo shintu shicitikila kubantu, shilacitikila abanyama. Bweenka bufwa muntu alakwe munyama mbwaafwa. Paceebo ceeco muntu taaindi munyama. Muntu amunyama balicite buumi bwa mushobo womwi. Ncakwiila shintu shoonse taaku mboshibete.

²⁰ Shoonse shilaya kumusena womwi. Ncakwiila shakaswa kubulongo alimwi shilaakuboolela kubulongo.

²¹ Ino ngani ushi na muuya wa muntu ulaya kwiculu, sombi muuya wa munyama ulaya panshi?”

²² Munshila iyo ndakabona ayi taaku cimwi ceenga ceendaawo kusangalasha muntu kwiinda milimo yakwe mukwiinga yalo ncecipo ncaakapekwa. Taaku muntu eshi akakonshe kwishiba sheshi shikacitike pesule lya lufu lwakwe.