Shikushimikila 2 - Baibo Busansulushi Bwa Libuku Ili

Shakulisangalasha taaku mboshibete

¹ Mpeeke ndakayeeya ayi, “Taanguna njelesheewo shakulisangalasha kwaamba ayi nshibe cibotu.” Sombi acalo ico cakacanika ayi taaku mbocibete.

² Lyalo ndakaamba ayi, “Kuseka, mbuluya, ashalo shakulisangalasha taaku mpindu njeshipa.”

³ Mukukonkela busongo ubo ndakeelesha kulisangalasha awaini sombi ndakabaabo muluya. Ndakalinga kusuni kwishiba cintu ceelete kucita bantu munshiku shiniini sha buumi bwabo pacishi ca panshi.

⁴ Kuswawaawo ndakamanisha kucita milimo iinji. Ndakaliyakila maanda akulima myuunda ya minyansa.

⁵ Ndakalima myuunda imwi akupanga misena ibotu yakookesheshaako akushangaamo shisamu shashisepo sha mishobo yoonse.

⁶ Ndakapanga shishiba sha maanshi akutilila shisamu isho nshendakashanga.

⁷ Ndakoola basha basankwa abanakashi kubikaawo abasha bamwi bakashalilwa muŋanda yangu. Ndakalinga kucite ŋombe ambelele kwiinda bamaami bakataanguna kulela muJelusalemu.

⁸ Ndakalifushisha silifa agolodi kuswa mushishi shimwi nshendakalinga kulela. Ndakalinga kucite beshikwiimba basankwa abanakashi alimwi ndakalinga kucite abanakashi baanji abo bakalinga kunsangalasha.

⁹ Ncakwiila ndakaba abulemu kwiinda boonse bakataanguna kulela muJelusalemu. Muciindi coonse ici busongo bwangu tabukwe kunshiya.

¹⁰ Shoonse nshendakalinga kusuni ndakashicana, Nshikwe kukaka kupa moyo wangu shakulisangalasha shili shoonse. Moyo wangu wakakondwa mumilimo yangu yoonse. Aboobo ici cakaba ncecilambu cakaswa mumilimo yangu.

¹¹ Ndindakabona shintu nshendakacita, amilimo njendakasebensa amaansaangu, ndakacana ayi shoonse ishi taaku mboshibete. Cakababo anga nkutandaanya muuwo. Taaku mpindu njendakacana pacishi ca panshi.

¹² Lyalo ndakapilulula miyeeyo yangu akuyeeya busongo pantu pomwi ancinko alimwi abuluya. Sa kuliwo upyana bwaami ukonsha kucita shimwi kuleka sheesho shakacitwawo kale?

¹³ Ndakabona ayi busongo mbubotu kwiinda buluya bweenka mumuni mbooli ubotu kwiinda munshinshe.

¹⁴ Musongo ulaya cibona nkwaatooya, sombi muluya uleenda mumunshinshe. Sombi ndakabona kwaamba ayi boonse bobilo balacitikilwa cintu ca mushobo womwi.

¹⁵ Lyalo ndakayeeya mumoyo wangu ayi, “Cicitikila baluya anebo cilaakuncitikila. Ono nimpindunshi njeshi nkacane mukuba musongo?” Mpeeke ndakaamba mumoyo wangu ayi, “Acalo ici taaku mbocibete.”

¹⁶ Basongo abaluya boonse teshi bakeebalukweewo kwaciindi cilaamfu. Ee, mushinku shitoosa boonse bobilo balaakulubwa. Ncakwiila muluya amusongo boonse bobilo balaakufwa.

¹⁷ Kuswawaawo buumi ndakabupata ceebo milimo icitwa pacishi ca panshi yakandetelabo mapensho. Yoonse taaku mboibete, yakababo anga nkutandaanya muuwo.

¹⁸ Shoonse nshendakasebensela pano pacishi ca panshi ndakashisuula mukwiinga ndaakushishiilabo wooyo weshi akese pesule lyangu.

¹⁹ Ino ngani ushi na muntu uyo ulaakunooli musongo nabi muluya? Nakubi boobo ulaakubwesa shintu shoonse nshendakayuwila pacishi ca panshi alimwi shakaswa mubusongo bwangu. Ici acalo taaku mbocibete.

²⁰ Lyalo ndakatalika kuungumana ceebo cakusebensa ankusu pano pacishi ca panshi.

²¹ Muntu ulakonsha kucita shintu cabusongo, lushibo alimwi cabuuya, sombi shoonse isho ulashishiilabo muntu umwi utakwe kushisebensela. Ici acalo taaku mbocibete alimwi ncilubo.

²² Ono pacishi ca panshi nimpindunshi iswa mukusebensa cankusu akulisukama?

²³ Nshiku shakwe shoonse milimo ilaleta kulisukama amapensho. Ncakwiila nabi mashiku miyeeyo yakwe tayookeshiiwo, sobwe. Ici acalo taaku mbocibete.

²⁴ Anu cintubo ciindaawo kubota muntu nceenga wacita nkulya, kunwa akusangalala musheesho nshaakayuwila. Ono ndaboona ayi ici acalo cilaswa kuli Lesa

²⁵ mukwiinga kwakubula nguwe taaku weenga wacana cakulya akwikala kabotu.

²⁶ Ncakwiila kuli wooyo usangalasha Lesa, lakwe ulapa busongo, lushibo alimwi akukondwa. Sombi kumucita shibi ulapa mulimo wakubunganya akusunga buboni kwaamba ayi akabupe wooyo usangalasha Lesa. Ici acalo taaku mbocibete, cilibo anga nkutandaanya muuwo.