Shikushimikila 12 - Baibo Busansulushi Bwa Libuku Ili

¹ Koibaluka Mulengi wako koocili cikula bwangu nshiku sha mapensho kashitana kushikila mukwiinga ciindi citoosa ndyeshi ukanokwaamba ayi, “Bwikaalo tabutoonsangalashaawo.”

² Ciindi cilaakushikila mumuni walisuba, wa mweenshi awa nyenyeenshi, ndyeshi ukacileeke kubonekesha. Aalo makumbi alaakuboolela mfula yaakumana.

³ Paciindi ico maansaako ayo akufuna alaakututuma, amyeendo yako iyo iyumu nta ilaakulefuka. Meeno ako alaakuceya kutafuna shakulya aalo meenso ako alaakucileka kubonesha.

⁴ Matwi ako alaakucileka kunyumfwa ciyobeyobe ca munshila. Teshi ukanoonyumfwaawo na cigayo citoopela nabi nyimbo sha tuyuni teshi shikakubushewo mutulo.

⁵ Ulaakunooloonda kutanta tulundu tulaamfu nabi kuya ceenda mumikwakwa. Ulaakuba amfwi mumutwi kukucembela alimwi cilaakuba ciyumu kweenda kuli ndiwe. Teshi ukanoociteewo nkusu shakucita cili coonse. Muntu ulaakuya kumusena wakwe wamuyayaya alimwi kulaakuba kulila mumikwakwa.

⁶ Lutambo lwa silifa lulaakusutuka, mbale ya golodi ilaakupwaika, nongo yakutekesha maanshi ilaakupasuka ayalo ndilayi ya kumukalo ilaakunyonyooka.

⁷ Mibili ilaakuboolela kubulongo nkoyakaswa. Awalo muuya ulaakuboolela kuli Lesa wakoobikaamo.

⁸ Shikushimikila wakaamba ayi, “Taaku mboshibete! Taaku mboshibete! Ncakwiila taaku mboshibete! Shintu shoonsebo taaku mboshibete.”

Makani akweelaako

⁹ Shikushimikila uyu wakalinga musongo, wakeeisha bantu shintu shiinji. Wakayeeya akuyandoola alimwi akulemba tushimpi tuunji.

¹⁰ Ncakwiila shikushimikila wakayandoola maswi eelete, nkokwaamba ayi wakalemba shintu shiluleme alimwi shalushinisho.

¹¹ Maswi aamba bantu basongo ali anga ntusamu tukolete uto beembeshi ntoobasebensesha pakubinga mbelele. Atwalo tushimpi twabo tuli anga njimisomaali yakapopwa cankusu. Tushimpi uto twakapekwa aLesa, Mweembeshi womwibo ngotucite soonse.

¹² Omwanaangu, cenjela kushintu shimwi peculu lya tushimpi. Kulemba mabuku takumaani. Kubelenga bunene kulalemya mubili.

¹³ Ono shoonse shanyumfwikwa. Anu meelelesho amakani oonse ngaaya: Kolemeka Lesa akukonkela milawo yakwe yoonse mukwiinga uyu ngomulimo woonse wakapekwa muntu.

¹⁴ Ceebo Lesa ulaakoombolosha micito yoonse, kubikaawo ashintu shicitwa mubushishi, ncakwiila micito ibotu nabi ibiibi.