Shikushimikila 11 - Baibo Busansulushi Bwa Libuku Ili

Shintu shicita musongo

¹ Bika maali mumakwebo ako aba kushishi shimwi. Paakwiinda nshiku shiinji ulaakucana mpindu.

² Bika maali ako mumisena iinji ipusenepusene mukwiinga tooshi mapensho eshi akese kuli ndiwe mucishi cino.

³ Na makumbi kaacite maanshi, alalosha mfula pacishi ca panshi. Nabi cisamu cawita kumalenge nabi kumatwa, ciloona pamusena peenka apo mpocawita.

⁴ Uyo woonse weebela muuwo, teshi akaliime. Uyo woonse ulangilishabo makumbi, teshi akatebule.

⁵ Bweenka mbomuteshi nshila ya muuwo alimwi bweenka mbomuteshi mubili mboopangwa mumala, mbweeke ubo tamukoonshi kwishiba mulimo wakwe Lesa, Mulengi wa shintu shoonse.

⁶ Koshanga mbuto yako macuunsa, utanookalabo ciindi ca macolesha. Webo tooshi mbuto yeshi ikaswitilile. Inga yaba ya macuunsa nabi ya macolesha. Cimwi ciindi mbuto shoonse shobilo inga shaba kabotu.

⁷ Mumuni ngubotu. Ee, cilakondelesha kubona lisuba.

⁸ Nakubi kwaamba ayi muntu waba amyaaka iinji buyani, ulyeelete kusangalala pamwaaka womwi awomwi ngweekala. Sombi ulyeelete kulabilila ayi nshiku shakunoofwite shilaakufula abuumbi. Shoonse ishi shitoosa taaku mboshibete.

Kulwiita bacikula bwangu

⁹ Ocikula bwangu, kosangalala koocili mwanike. Moyo wako kaukupa kusangalala koocili cikula bwangu. Kokonkela ciyanda moyo wako alimwi acili coonse meenso ako ncaabona. Sombi koshiba ayi shintu shoonse ishi Lesa ulaakukoombolosha.

¹⁰ Aboobo utanoolisukama mumoyo wako. Komanisha mapensho ako oonse ngoocite Ncakwiila bucikula bwangu ankusu taaku mboshibete.