Shikushimikila 10 - Baibo Busansulushi Bwa Libuku Ili

¹ Baloonshi bafwite balalengesha mafuta anunkila, kununka cibiibi. Mbweeke ubo abuluya nabuceyi bulakoma busongo abulemu.

² Moyo wa musongo ulakakatila kushiluleme, sombi moyo wa muluya ulakakatila kububi.

³ Kweenda kwa muluya kulabonesha ayi taacite maano. Ncakwiila ulatondesha bantu buluya mbwaacite.

⁴ Na muleli wakukalalila, utatakati mulimo wako. Mukwiinga kukalika moyo kulamana milandu inene.

⁵ Kuli bubi mbondakabona muno mucishi ca panshi, ee, kulubisha kulengeshekwa amuleli.

⁶ Baluya ulababika mumisena yapeculu, sombi babile ulababoosha panshi peene.

⁷ Ndabona basha kabeendela pamaaki, sombi banaabaami kabeenda panshi anga mbasha.

⁸ Uyo ukaba cilindi inga wawitaamo mwiine. Alakwe utulula cilyango mulubumbu inga walumwa nsoka.

⁹ Uyo upwaya mabwe inga ulacisikwa kumabwe, uyo upasoola shisamu inga wacisikwa anshisho.

¹⁰ Na keembe kashima alimwi kabula kunonwa, kukasebensesha kulisuniki nkusu shiinji. Ono ucenjete inga weshiba cakucita.

¹¹ Kwishiba kusangalasha nsoka takucite mpindu na nsooka yataanguna kukuluma.

¹² Maswi aswa mumulomo wa musongo alamuletela bulemu, sombi muluya ulanyonyoolwa kwiinda mumaswi akwe.

¹³ Maswi ngaataanguna kwaamba ngabuluya, sombi nkwaaya mukweela alababo abushincinko.

¹⁴ Muluya ulafusha maswi pakwaamba. Taaku muntu ushi shitoosa kunembo. Ngani weenga waamba ceshi cikacitike twaakufwa?

¹⁵ Mulimo wa muluya ulamulemya abuumbi. Taacite amaano akucana nshila yakuboola kumishaabo.

¹⁶ Mapensho kuli ndiwe ocishi cicite mwaami uli anga ngumwanike, alimwi oocite baleli baba akusekelela malumwi amashiku.

¹⁷ Acilumbaishikwe cishi ico cicite mwaami wakashalwa abulemu alimwi cicite baleli balya paciindi ceelete. Ee, abo balya kwaamba ayi babe ankusu kuteshi kukolwa.

¹⁸ Na muntu ngumutolo, ciluli cilaakukuluka, ncakwiila na maansaakwe ngatontola, ŋanda yakwe ilaloka.

¹⁹ Kusekelela kulalengesha kuseka, waini ulasangalasha moyo, sombi maali ngaaleta shoonse ishi.

²⁰ Utatukani mwaami nabibo mumiyeeyo yako. Utashingani mubile mucipinda ncoonaamo mukwiinga kayuni keenda mwiculu inga katola maswi ako. Ee, kayuni kooluka inga kaya mukuluula nceenga waamba.