Shikushimikila 1 - Baibo Busansulushi Bwa Libuku Ili

Buumi taaku mbobubete

¹ Aya ngamaswi a Shikushimikila mwanaakwe Defedi uyo wakalinga mwaami muJelusalemu.

² Wakaamba ayi, “Taaku mboshibete! Taaku mboshibete! Ncakwiila taaku mboshibete! Shintu shoonsebo taaku mboshibete.”

³ Anu nciinshi muntu ncaacana kuswa kuncito njaacita pacishi ca panshi?

⁴ Mashalane alesa, mashalane aleenda, sombi cishi ca panshi ncalyoonse alyoonse.

⁵ Lisuba lilaswa alimwi lilepila, lyalo lilaboolela nkoliswita alimwi.

⁶ Muuwo ulapuupila kumalenge alimwi ulapuupila kumatwa. Ncakwiila ulaya cishinguluka tibili waboolela kweenka nkowatalikila.

⁷ Milonga yoonse ilakunkila mulweenge, sombi lweenge ulo talusuliiwo. Ono uko kweenka kuswita mulonga, aalo maanshi alaboolela nkomunya uko.

⁸ Shintu shoonse shilalemya, ee, kulemya uko kutakoonshi kwaambwa akwaambwa. Liinso talileemi kubona, akwalo kutwi takuleemi kunyumfwa.

⁹ Cakabawo kale cilaakubawo alimwi. Cakacitikawo kale cilaakucitika alimwi. Taaku cimwi ceensu cili pacishi ca panshi.

¹⁰ Muntu inga waamba ayi, “Bona cintu ici ncipya!” Sombi cintu ico cakalingaako kalekale, ncakwiila kalekale katutana kushalwa.

¹¹ Bantu bakulukulu teshi bakeebalukweewo. Abalo beshi bakashalwe cilaakuba bweenka ubo ncakwiila teshi bakeebalukwe kubaabo beshi bakese pesule lyabo.

Busongo taaku mbobubete

¹² Nebo neshikushimikila, ndakalinga mwaami wa bene Isilaeli muJelusalemu.

¹³ Ndakalyaaba kwaamba ayi njiye akwishiba kwiinda mubusongo shintu shoonse shicitika pacishi ca panshi. Maawe walema mukuli uyo ngwaakatupa Lesa!

¹⁴ Ono shintu shoonse shicitikwa pacishi ca panshi ndashibona. Ncakwiila shoonse taaku mboshibete, ee, cilibo anga nkutandaanya muuwo.

¹⁵ Cintu cikonkomene tacikoonshi koololwa. Shintu shitapo tashikoonshi kubelengwa.

¹⁶ Lyalo ndakayeeya nemwiine ayi, “Amubone nebo ndakuula alimwi ndaba musongo kwiinda bamwi boonse bakataanguna kulela muJelusalemu nebo kaantana. Busongo alimwi alushibo shoonse ndeendaamo.”

¹⁷ Ndakalyaaba kwaamba ayi nshibe bupusano pabusongo abuluya, sombi cakababo anga nkutandaanya muuwo.

¹⁸ Ceebo busongo buunji bulesa abuumba, nkokwaamba ayi lushibo luunji lulaamba buumba buunji.